મુંબઈ: ભારતીય શેરબજારમાં છેલ્લા કેટલાક સમયથી એક જ ચર્ચા છે કે વિદેશી સંસ્થાગત રોકાણકારો (FIIs) સતત વેચવાલી કેમ કરી રહ્યા છે? જાન્યુઆરી 2026 થી 7 મે 2026 સુધીમાં વિદેશી રોકાણકારોએ ભારતીય બજારમાંથી અંદાજે ₹2,47,713 કરોડના શેર વેચી નાખ્યા છે. ખાસ કરીને માર્ચ 2026 માં ₹1,22,540 કરોડની વિક્રમી વેચવાલી જોવા મળી હતી. આ આંકડાઓ જોતા પ્રશ્ન થાય છે કે શું ભારત હવે રોકાણકારોનું મનપસંદ બજાર નથી રહ્યું?
ઈનામ હોલ્ડિંગ્સના ઇન્વેસ્ટમેન્ટ ડાયરેક્ટર શ્રીધર શિવરામે આ અંગે ઊંડી સમજણ આપતા જણાવ્યું છે કે, અત્યારે રોકાણકારો માત્ર વાર્તાઓ કે અપેક્ષાઓ પર નહીં, પણ કંપનીઓની વાસ્તવિક કમાણી (Earning Growth) પર દાવ લગાવી રહ્યા છે. ભારતની તમામ કોર્પોરેટ કંપનીઓનો કુલ નફો અંદાજે 200 બિલિયન ડોલર છે, જ્યારે એકલી 'સેમસંગ' જેવી કંપની 250 બિલિયન ડોલરનો નફો કરવાની ક્ષમતા ધરાવે છે. તાઇવાન અને કોરિયાની ચિપ બનાવતી કંપનીઓ અત્યારે 'ચિપ સુપર સાયકલ' અને AI (આર્ટિફિશિયલ ઇન્ટેલિજન્સ) ના કારણે અઢળક કમાણી કરી રહી છે.
વિશ્વભરના રોકાણકારો અત્યારે એવા બજારો તરફ વળ્યા છે જ્યાં નફો 100 ટકાની ઝડપે વધી રહ્યો છે. ભારતની અર્નિંગ ગ્રોથ અંદાજે 15 ટકા છે, જે સારી હોવા છતાં વૈશ્વિક સ્પર્ધામાં ઓછી દેખાઈ રહી છે. તાઇવાનની TSMC અને કોરિયાની SK Hynix જેવી કંપનીઓ પાસે આગામી 18 મહિનાના ઓર્ડર અત્યારથી બુક છે. આ કંપનીઓ જે ટેકનોલોજી અને હાઈ-એન્ડ ચિપ્સ બનાવી રહી છે, તે બીજું કોઈ સરળતાથી બનાવી શકતું નથી. પરિણામે, રોકાણકારો ભારતમાંથી નાણાં કાઢીને કોરિયા અને તાઇવાન જેવા બજારોમાં રોકી રહ્યા છે.
ભારત માટે અત્યારે સૌથી મોટો પડકાર પોતાની કંપનીઓની કમાણીની રફ્તાર વધારવાનો છે. આ ઉપરાંત, રૂપિયાની નબળાઈ અને ટેક્સેશન સિસ્ટમ જેવી બાબતો પણ વિદેશી રોકાણકારો માટે ચિંતાનો વિષય છે. જો ભારતીય કંપનીઓ ફરીથી મજબૂત અર્નિંગ ગ્રોથ બતાવવાનું શરૂ કરશે, તો જ વિદેશી રોકાણકારો ફરીથી ભારતીય બજાર તરફ આકર્ષાય તેવી શક્યતા છે. અત્યારે તો દુનિયાનો પૈસો ત્યાં જઈ રહ્યો છે જ્યાં રોકડમાં નફો દેખાઈ રહ્યો છે.