મુંબઈ : મુંબઈના વ્યસ્ત છત્રપતિ શિવાજી મહારાષ્ટ્ર ટર્મિનસ (CSMT) ખાતે મધ્ય રેલવેમાં ઓન ડ્યૂટી ફરજ બજાવતા એક ટિકિટ ચેકિંગ કર્મચારી સાથે મારપીટ અને ગાળાગાળી કરવાનો અત્યંત ચોંકાવનારો કિસ્સો પ્રકાશમાં આવ્યો છે. ગત ૨૫ ઓક્ટોબર, ૨૦૨૬ ના રોજ સાંજના સમયે પ્લેટફોર્મ નંબર ૫ અને ૬ નજીક આવેલા કૉન્કોર્સ વિસ્તારમાં ટિકિટ તપાસવાની સામાન્ય પ્રક્રિયા દરમિયાન એક દંપતીએ પોતાની ઓળખ છુપાવવા માટે રેલવે કર્મચારી હોવાનો ખોટો દાવો કરીને ટીસી પર હુમલો કરી દીધો હતો.

પ્રાપ્ત વિગતો અનુસાર, ઘટનાના દિવસે ટિકિટ ચેકિંગ કર્મચારી જિગ્નેશ ભાવસાર પોતાની નિયમિત ફરજ પર હતા અને તે દરમિયાન તેમણે એક પુરુષ અને મહિલા મુસાફર પાસે મુસાફરીની અધિકૃત ટિકિટ માંગવા માટે સંપર્ક કર્યો હતો. ટિકિટ માંગતા જ મામલો અચાનક વણસ્યો હતો અને પુરુષ મુસાફરે ટિકિટ બતાવવાને બદલે પોતે રેલવેનો જ કર્મચારી હોવાની દલીલ શરૂ કરી દીધી હતી.

જ્યારે કર્મચારી દ્વારા તેમની પાસે રેલવે ઓળખપત્ર કે નોકરી અંગેનો કોઈ માન્ય પુરાવો રજૂ કરવાનું કહેવામાં આવ્યું ત્યારે પુરુષે પુરાવો આપવાનો સ્પષ્ટ ઇનકાર કરી દીધો હતો અને ત્યાંથી ભાગવાનો પ્રયાસ કર્યો હતો. તેને અટકાવવા જતાં તેણે ફરજ પરના કર્મચારી સાથે મારામારી શરૂ કરી દીધી હતી, જેમાં સાથે રહેલી મહિલા મુસાફરે પણ ગાળાગાળી કરીને કર્મચારી પર હુમલો કર્યો હોવાનો ગંભીર આરોપ છે.

આ મામલાની ગંભીરતાને ધ્યાનમાં રાખીને રેલવે પ્રોટેક્શન ફોર્સ (RPF) અને અન્ય કર્મચારીઓની સક્રિય મદદથી બંને આરોપીઓને તાત્કાલિક પકડીને CSMT રેલવે પોલીસ સ્ટેશન લઈ જવામાં આવ્યા હતા. તપાસ દરમિયાન તેમની ઓળખ ઋષિકેશ સંજય પવાર (૨૪ વર્ષ) અને નિકિતા ઋષિકેશ પવાર (૨૩ વર્ષ) તરીકે થઈ હતી અને પૂછપરછમાં બહાર આવ્યું કે તેમની પાસે ન તો કોઈ માન્ય ટિકિટ હતી કે ન તો તેઓ રેલવે વિભાગ સાથે સંકળાયેલા હતા.

ત્યારબાદ બંને આરોપીઓને આગળની કાનૂની કાર્યવાહી માટે સરકારી રેલવે પોલીસ (GRP) ને સોંપવામાં આવ્યા હતા, જ્યાં તેમની વિરુદ્ધ સત્તાવાર રીતે એફઆઈઆર નોંધવામાં આવી છે. પોલીસે ભારતીય રેલવે અધિનિયમની કલમ ૧૩૭, ૧૩૮ અને ૧૪૫ તેમજ ભારતીય ન્યાય સંહિતા (BNS) ની સંબંધિત કલમો હેઠળ વિનિમય ભંગ, છેતરપિંડી અને સરકારી કર્મચારી પર હુમલો કરવા બદલ ગુનો દાખલ કર્યો છે.

આ ઘટનાને પગલે રેલવે કર્મચારીઓની સુરક્ષા અને સ્ટેશન પરિસરમાં ડ્યુટી દરમિયાન થતી આવી હિંસાની ઘટનાઓ સામે ફરી એકવાર ગંભીર ચર્ચાઓ શરૂ થઈ છે. મધ્ય રેલવે પ્રશાસન દ્વારા આ મામલાને અત્યંત ગંભીરતાથી લેવામાં આવ્યો છે અને કાયદાકીય પ્રક્રિયા પૂર્ણ કરીને દોષિતો સામે કડકમાં કડક સજા થાય તેવા પગલાં લેવામાં આવી રહ્યા છે.