લોસ એન્જલસ:  ફિફા (FIFA) આ વર્ષે ફૂટબોલ વિશ્વ કપના ઈતિહાસમાં અત્યાર સુધીનું સૌથી ભવ્ય આયોજન કરવા જઈ રહ્યું છે. ટૂર્નામેન્ટના પ્રારંભે ત્રણ અલગ-અલગ યજમાન દેશો - કેનેડા, મેક્સિકો અને અમેરિકામાં વિશેષ ઉદ્ઘાટન સમારોહ યોજાશે. આ સાથે જ 4 જુલાઈના રોજ અમેરિકાની સ્વતંત્રતાના 250 વર્ષ પૂર્ણ થવાની ઉજવણીને પણ વર્લ્ડ કપ સાથે જોડી દેવામાં આવી છે, જેના ભાગરૂપે હ્યુસ્ટન અને ફિલાડેલ્ફિયામાં ખાસ કાર્યક્રમો યોજાશે.
ટૂર્નામેન્ટની પ્રથમ મેચ 11 જૂને મેક્સિકોના પ્રસિદ્ધ એઝ્ટેકા સ્ટેડિયમમાં મેક્સિકો અને દક્ષિણ આફ્રિકા વચ્ચે રમાશે. આ સમારોહમાં મેક્સિકન રોક બેન્ડ 'માના', પોપસ્ટાર અલેજાન્દ્રો ફર્નાન્ડીઝ અને દક્ષિણ આફ્રિકાની ગાયિકા ટાયલા પ્રદર્શન કરશે. ત્યારબાદ 12 જૂને કેનેડાના ટોરોન્ટોમાં માઈકલ બુબલે અને એલેનિયા મોરિસેટ જેવા કલાકારો ધૂમ મચાવશે. તે જ દિવસે લોસ એન્જલસના સોફી સ્ટેડિયમમાં અમેરિકાની પ્રથમ મેચમાં વિશ્વવિખ્યાત સિંગર કેટી પેરી હેડલાઈનર તરીકે જોવા મળશે. આ ઉપરાંત, બ્લેકપિંક ગ્રુપની લિસા અને જે બાલ્વિન જેવા આંતરરાષ્ટ્રીય કલાકારો પણ વિવિધ શહેરોમાં પર્ફોર્મ કરશે.
આ વખતે ફિફાએ અમેરિકાની 'સેમિક્વિનસેન્ટેનિયલ' (250મી વર્ષગાંઠ) ને ધ્યાનમાં રાખીને 4 જુલાઈએ યોજાનારી રાઉન્ડ ઓફ 16 ની મેચોમાં ખાસ શ્રદ્ધાંજલિ કાર્યક્રમો રાખ્યા છે. રાષ્ટ્રપતિ ડોનાલ્ડ ટ્રમ્પે પણ આ વર્ષગાંઠને ભવ્ય બનાવવા માટે 'વ્હાઈટ હાઉસ ટાસ્ક ફોર્સ 250' ની સ્થાપના કરી છે. એન્ડ્રુ ગિયુલિયાનીના નેતૃત્વમાં વર્લ્ડ કપના વિવિધ સ્થળોએ અમેરિકન મહાનતા અને આઝાદીના પ્રતીક સમાન 'ફ્રીડમ' ટ્રેલર-ટ્રક્સ પણ પ્રદર્શિત કરવામાં આવશે.
ફિફાના પ્રમુખ જિઆન્ની ઇન્ફેન્ટિનોએ આ આયોજનને માત્ર રમત જ નહીં પણ શાંતિ અને એકતાના પ્રતીક તરીકે ઓળખાવ્યું છે. ટૂર્નામેન્ટની ફાઈનલ 19 જુલાઈના રોજ મેટલાઇફ સ્ટેડિયમમાં રમાશે, જેમાં ઉદ્ઘાટન અને હાફ-ટાઈમ શો માટેના કલાકારોના નામ હજુ ગુપ્ત રાખવામાં આવ્યા છે. સંગીત પ્રેમીઓ માટે ફિફા વર્લ્ડ કપનું ખાસ આલ્બમ પણ રિલીઝ કરવામાં આવશે, જેમાં 'ઇલ્યુમિનેટ' જેવી હિટ સિંગલ્સનો સમાવેશ થાય છે.