નવી દિલ્હી, તા. 18 જૂન 2026: દેશમાં રાજકીય પક્ષોમાં ચાલી રહેલા આયાત-નિકાસ અને પક્ષપલટાના ખેલ પર હવે ન્યાયતંત્ર પણ સક્રિય થયું છે. જોકે, શુક્રવારે સુપ્રીમ કોર્ટમાં પક્ષપલટાને અટકાવવા માટે દાખલ કરવામાં આવેલી એક અરજી પર ભારે નાટ્યાત્મક દ્રશ્યો જોવા મળ્યા હતા. ભારતના મુખ્ય ન્યાયાધીશ (CJI) સૂર્યકાંતે આ અરજીને માત્ર ફગાવી જ નહીં, પરંતુ અરજદારના વકીલને આકરા સવાલોના ઘેરામાં પણ લીધા હતા.
'તમે તો માત્ર અસ્પષ્ટ આક્ષેપો કરો છો'
સુનાવણી દરમિયાન વકીલ સી.આર. જયા સુકિને દલીલ કરી હતી કે દેશમાં નેતાઓ કાં તો લાંચ આપીને ભ્રષ્ટાચાર કરે છે અથવા પરિવારને નુકસાન પહોંચાડવાની ધમકી આપીને પક્ષ બદલવા મજબૂર કરાય છે. આ સાંભળીને CJI સૂર્યકાંતે તીખી પ્રતિક્રિયા આપતા પૂછ્યું હતું કે, "તમે કયા શાસક પક્ષનો ઉલ્લેખ કરી રહ્યા છો? તમારા રાજ્યમાં તો પાર્ટીઓ સતત બદલાતી રહે છે. તમારી પાસે આ આરોપો સાબિત કરવા માટે કોઈ નક્કર પુરાવા છે?" વકીલે પૂર્વ અને મધ્ય ભારતના રાજ્યોનો ઉલ્લેખ કરી લોકશાહીના નાશની ચિંતા વ્યક્ત કરી હતી, પરંતુ કોર્ટે તેને પાયાવિહોણી માનીને અરજી નામંજૂર કરી દીધી હતી.
મમતા બેનર્જી માટે મુશ્કેલીઓનો દોર
એક તરફ સુપ્રીમ કોર્ટમાં આ મામલો ચાલતો હતો, ત્યારે બીજી તરફ કોલકાતામાં મમતા બેનર્જીની તૃણમૂલ કોંગ્રેસ (TMC) મુશ્કેલીમાં મુકાઈ છે. વરિષ્ઠ નેતા કાકોલી ઘોષ દસ્તીદારના નેતૃત્વમાં 20 સાંસદો TMC થી અલગ થઈને નવી પાર્ટી 'NCPI' માં જોડાયા છે. આ આંચકા વચ્ચે કોલકાતા હાઈકોર્ટે પણ TMC ને મોટો ઝટકો આપ્યો છે. હાઈકોર્ટે બળવાખોર ધારાસભ્ય ઋતાબ્રત બેનર્જીને વિધાનસભામાં વિપક્ષના નેતા તરીકે માન્યતા આપવાના નિર્ણયને પડકારતી TMC ની અરજી પર સ્ટે આપવાનો ઇનકાર કરી દીધો છે.
મહારાષ્ટ્રમાં પણ પક્ષપલટાના સંકેત
બીજી તરફ મહારાષ્ટ્રમાં શિવસેના (ઉદ્ધવ ઠાકરે) ના છ સાંસદો પણ પાર્ટીથી અલગ થવાના આરે હોવાની અટકળો તેજ બની છે. ગુરુવારે યોજાયેલી સંસદીય પક્ષની બેઠકમાં નવમાંથી માત્ર છ સાંસદોની હાજરીએ રાજકીય ગલીઓમાં ખળભળાટ મચાવ્યો છે. પક્ષપલટાના આ વધતા વલણને કારણે લોકશાહીના મૂલ્યો પર હવે ગંભીર ચર્ચાઓ શરૂ થઈ છે, પરંતુ સુપ્રીમ કોર્ટે સ્પષ્ટ કરી દીધું છે કે પુરાવા વગરની અરજીઓ સ્વીકારવામાં આવશે નહીં.