લખનૌ : ઉત્તર પ્રદેશના શામલીમાં એક વેપારીના પુત્રને પ્રેમજાળમાં ફસાવી, તેનું ઇસ્લામમાં ધર્માંતરણ કરાવી સંપત્તિ પડાવવાના આરોપમાં પોલીસે એક મહિલા જીમ ટ્રેનર અને તેના પિતાની ધરપકડ કરી છે. આ મામલે સ્પેશિયલ ઇન્વેસ્ટિગેશન ટીમ વધુ તપાસ કરી રહી છે.

પ્રાપ્ત અહેવાલો મુજબ, ઉત્તર પ્રદેશના શામલીમાં બળજબરીપૂર્વક ધર્માંતરણનો એક ચોંકાવનારો મામલો સામે આવ્યો છે. પોલીસે પચ્ચીસ વર્ષીય મહિલા જીમ ટ્રેનર ચાંદની કુરેશી અને તેના પિતા ઇસ્લામ કુરેશીની ધરપકડ કરી છે. સ્થાનિક વેપારી દેવરાજ મલિકે આરોપ લગાવ્યો છે કે આશરે પાંચ વર્ષ પહેલાં ચાંદનીએ તેમના પુત્ર આયુષને પ્રેમજાળમાં ફસાવ્યો હતો. આયુષ, જે તેમના પારિવારિક મેડિકલ સ્ટોર પર કામ કરતો હતો, 

તેણે કથિત રીતે ઇસ્લામ ધર્મ અંગીકાર કરી લીધો હતો, પોતાનું નામ બદલીને 'રહેમાન' રાખી લીધું હતું અને ઇસ્લામિક રીતિ-રિવાજો અપનાવ્યા હતા. 

વેપારીનો આરોપ છે કે આરોપીઓએ પારિવારિક સંપત્તિ પડાવવાના હેતુથી વર્ષો સુધી તેમને બ્લેકમેલ કર્યા અને તેમની પાસેથી ખંડણી માંગી. 

આ ગંભીર મામલે નોંધાયેલી એફઆઈઆરમાં કુટુંબના સભ્યો અને મૌલવીઓ સહિત કુલ દસ લોકોના નામ સામેલ છે. પોલીસ દ્વારા ગેરકાયદેસર ધર્માંતરણ, ખંડણી અને ધાકધમકી વિરોધી કાયદા હેઠળ ગુનો નોંધવામાં આવ્યો છે. 

હાલમાં એક વિશેષ તપાસ ટીમ (એસઆઈટી) આ સમગ્ર પ્રકરણની ઊંડાણપૂર્વક તપાસ કરી રહી છે, જ્યારે પીડિત યુવાન આયુષ હજુ પણ અજ્ઞાત સ્થળે છુપાયેલો હોવાનું જાણવા મળે છે.