મોસ્કો:  રશિયા અને યુક્રેન વચ્ચેનું યુદ્ધ હવે માત્ર સરહદી લડાઈ ન રહેતા સમગ્ર માનવજાત માટે જોખમી બની ગયું છે. રશિયાના કબજા હેઠળના ઝાપોરિઝિયા પરમાણુ પ્લાન્ટની રેડિયેશન લેબોરેટરી પર થયેલા ડ્રોન હુમલાએ યુરોપ સહિત સમગ્ર વિશ્વમાં ફફડાટ ફેલાવી દીધો છે. આ હુમલો એ સાબિત કરે છે કે યુદ્ધ હવે એવી ખતરનાક અણી પર પહોંચી ગયું છે જ્યાં એક નાની ભૂલ પણ પરમાણુ પ્રલય લાવી શકે છે. રશિયાએ આક્ષેપ કર્યો છે કે યુક્રેને આત્મઘાતી ડ્રોન દ્વારા ઇરાદાપૂર્વક રેડિયેશન મોનિટરિંગ લેબને નિશાન બનાવી છે, જેથી કટોકટીના સમયે સાચી માહિતી છુપાવી શકાય. જોકે, પ્લાન્ટ મેનેજમેન્ટે હાલ પૂરતી રાહત આપી છે કે મુખ્ય રિયેક્ટર સુરક્ષિત છે, પરંતુ "આગ સાથેની આ રમત" ગમે ત્યારે ભડકો કરી શકે છે.

પુતિન પ્રશાસને આ હુમલાને રશિયાની રાષ્ટ્રીય સુરક્ષા પરના સીધા પ્રહાર તરીકે ગણાવ્યો છે. ક્રેમલિનના સૂત્રોના જણાવ્યા અનુસાર, પુતિન આ ઉશ્કેરણીનો વળતો જવાબ આપવા માટે અત્યંત આક્રમક વ્યૂહરચના બનાવી રહ્યા છે. સંરક્ષણ નિષ્ણાતોનું માનવું છે કે જો પરમાણુ સલામતી જોખમાશે, તો રશિયા તેના પરમાણુ સિદ્ધાંત (Nuclear Doctrine) મુજબ કડક પગલાં લેતા અચકાશે નહીં. રશિયાએ આંતરરાષ્ટ્રીય મંચ પર ચેતવણી આપી છે કે પશ્ચિમી દેશો યુક્રેનને જે રીતે ટેકો આપી રહ્યા છે, તે વિશ્વને અણુ યુદ્ધ તરફ ધકેલી રહ્યું છે. રશિયાની આ આકરી પ્રતિક્રિયા બાદ પડોશી દેશોમાં આયોડિનની ગોળીઓ અને સુરક્ષા કવચની માંગ અચાનક વધી ગઈ છે.

આંતરરાષ્ટ્રીય સ્તરે પરમાણુ ઉર્જા એજન્સીએ આ હુમલાને અત્યંત ગંભીરતાથી લીધો છે. વડા રાફેલ ગ્રોસીએ સ્પષ્ટ શબ્દોમાં કહ્યું છે કે પરમાણુ પ્લાન્ટ પરના હુમલા એ લાલ રેખા ઓળંગવા સમાન છે. ઝાપોરિઝિયા પ્લાન્ટ વિશ્વના સૌથી મોટા પ્લાન્ટ્સમાંનો એક હોવાથી, જો અહીં રેડિયેશન લીક થાય છે, તો તેની અસરો હજારો કિલોમીટર સુધી ફેલાઈ શકે છે, જે ખેતી, પાણી અને માનવ જીવનને પેઢીઓ સુધી બરબાદ કરી નાખશે. હાલમાં સમગ્ર વિશ્વની નજર પુતિનના આગામી કદમ પર છે, કારણ કે તેમની એક "હા" કે "ના" વિશ્વના નકશા પરથી અનેક દેશોનું અસ્તિત્વ ભૂંસી નાખવાની શક્તિ ધરાવે છે.