મુંબઈ : મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) દ્વારા ખાદ્ય સુરક્ષાના નિયમોનું સખત પાલન કરાવવા માટે રાજ્યવ્યાપી નિરીક્ષણ અભિયાન હાથ ધરવામાં આવ્યું છે. આ અભિયાન દરમિયાન મુંબઈના બોરીવલી વિસ્તારમાં આવેલી એક જાણીતી 'બેસ્ટ કેન્ટીન' (BEST Canteen) માં ભારે અનિયમિતતાઓ અને ગંદકી પકડાતા તેનું લાઇસન્સ તાત્કાલિક અસરથી સસ્પેન્ડ કરી દેવામાં આવ્યું છે. રાજ્યભરમાં કરવામાં આવેલી આ મોટી કાર્યવાહીથી ખાદ્ય પદાર્થોનું વેચાણ કરતા એકમોમાં ફફડાટ વ્યાપી ગયો છે.

પ્રાપ્ત વિગતો અનુસાર, FDA ના અધિકારીઓ દ્વારા બોરીવલી સ્થિત LIC કોલોનીમાં આવેલા સાંઈ આશ્રમ બસ સ્ટોપ પાસેની બેસ્ટ કેન્ટીન પર અચાનક દરોડો પાડવામાં આવ્યો હતો. તપાસ દરમિયાન કેન્ટીનના રસોડામાં અને ડ્રેનેજ સિસ્ટમમાં અત્યંત અસ્વચ્છતા જોવા મળી હતી. એટલું જ નહીં, રસોડામાં ઉપયોગમાં લેવાતા લોખંડના રેક અને વાસણો પર કાટ લાગી ગયો હતો. ખાદ્ય પદાર્થોનો સંગ્રહ અયોગ્ય રીતે કરવામાં આવતો હતો અને તાપમાનના રેકોર્ડ્સ પણ અધૂરા હતા, જે 'ફૂડ સેફ્ટી એન્ડ સ્ટાન્ડર્ડ્સ રેગ્યુલેશન્સ, 2011' ના નિયમોનું સ્પષ્ટ ઉલ્લંઘન છે.

તપાસમાં વધુ ચોંકાવનારા ખુલાસા કરતા અધિકારીઓએ જણાવ્યું હતું કે કેન્ટીનમાં પરત આવેલી જૂની બ્રેડને તાજી બ્રેડ સાથે ભેળવવામાં આવી રહી હતી. આ ઉપરાંત, ત્યાં કામ કરતા કર્મચારીઓ પાસે જરૂરી તબીબી પ્રમાણપત્રોનો પણ અભાવ હતો અને મીઠાઈઓ તથા અન્ય ખાદ્ય ચીજોમાં અમાન્ય ફૂડ કલરનો ઉપયોગ થતો હોવાનું બહાર આવ્યું હતું. ગ્રાહકોના સ્વાસ્થ્ય સાથે ચેડાં કરતી આ ગંભીર બેદરકારીને ધ્યાનમાં રાખીને વહીવટીતંત્ર દ્વારા કડક પગલાં લેવામાં આવ્યા છે.

મુંબઈ જ નહીં પરંતુ સમગ્ર મહારાષ્ટ્રમાં FDA દ્વારા એક વિશેષ નિરીક્ષણ ઝુંબેશ ચલાવવામાં આવી રહી છે, જેના હેઠળ અત્યાર સુધીમાં આશરે ૩૫,૫૪૭ કિલોગ્રામ જેટલો શંકાસ્પદ અને અસુરક્ષિત ખોરાક જપ્ત કરવામાં આવ્યો છે, જેની અંદાજિત કિંમત રૂ. ૭૯.૯૭ લાખ થાય છે. સૌથી મોટી કાર્યવાહી છત્રપતિ સંભાજીનગર વિભાગમાં કરવામાં આવી હતી, જ્યાં પાંચ અલગ-અલગ સ્થળોએથી લાખો રૂપિયાનો જથ્થો જપ્ત કરાયો હતો. આ ઉપરાંત હિંગોલી અને પરભણી જિલ્લાઓમાં પણ હળદર ઉત્પાદક એકમો પર દરોડા પાડીને લાયસન્સ સસ્પેન્ડ કરવાની કાર્યવાહી કરવામાં આવી છે.

નાગરિકોના આરોગ્ય અને સુરક્ષા સાથે કોઈ પણ પ્રકારની બાંધછોડ ન થાય તે માટે FDA દ્વારા આગામી દિવસોમાં પણ આ પ્રકારની આક્રમક તપાસ ઝુંબેશ ચાલુ રાખવામાં આવશે. નિયમોનું ખુલ્લેઆમ ઉલ્લંઘન કરનાર ખાદ્ય વ્યવસાયો સામે કાનૂની શિકંજો વધુ મજબૂત બનાવવામાં આવી રહ્યો છે, જેથી બજારમાં ગુણવત્તાયુક્ત અને સુરક્ષિત ખાદ્ય પદાર્થો જ ઉપલબ્ધ થઈ શકે.