મુંબઈ, તા.26: મુંબઈના ઘાટકોપર રેલવે સ્ટેશન નજીક આવેલા સ્કાયવોક પર રવિવારે રાત્રે દંપતી વચ્ચે થયેલા હિંસક ઝઘડામાં એક પિતાએ પોતાના જ ૯ મહિનાના પિશાચ જેવા કૃત્યથી માસુમ પુત્રને સ્કાયવોક પરથી નીચે ફેંકી દીધો હતો. રવિવારે રાત્રે લગભગ ૧૦:૩૦ વાગ્યે બનેલી આ સનસનાટીભરી ઘટનામાં આરવ નામનું બાળક ગંભીર રીતે ઘવાયેલો હોવાથી તેને સારવાર માટે સાયન હોસ્પિટલમાં દાખલ કરવામાં આવ્યો છે. ઘટના બાદ બાળકની માતાની ફરિયાદના આધારે ઘાટકોપર પોલીસે ૨૩ વર્ષીય આરોપી પિતા જાફર શેખની ધરપકડ કરી કાયદેસરની કાર્યવાહી હાથ ધરી છે.

પોલીસ અને સ્થાનિક વર્તુળો પાસેથી મળતી માહિતી મુજબ, આરોપીની ૨૨ વર્ષીય પત્ની આરતી પોતાના ૯ મહિનાના બાળકને લઈને ઘાટકોપર સ્કાયવોક પર ઊભી હતી ત્યારે તેનો પતિ ત્યાં આવી પહોંચ્યો હતો. કૌટુંબિક બાબતોને લઈને બંને વચ્ચે ઉગ્ર બોલાચાલી શરૂ થઈ ગઈ હતી. ઝઘડો એટલી હદે વધી ગયો કે ગુસ્સામાં અંધ થયેલા જાફરે માતાના હાથમાંથી બાળકને છીનવીને સ્કાયવોક પરથી નીચે જમીન પર ફેંકી દીધું હતું, જેના કારણે બાળકને માથાના ભાગે અને શરીરે ગંભીર ઈજાઓ પહોંચી હતી.

ઘટના બાદ તરત જ ગભરાયેલી માતા તાત્કાલિક પોતાના લોહીલુહાણ બાળકને સારવાર માટે નજીકની રાજાવાડી હોસ્પિટલ લઈ ગઈ હતી. જોકે, બાળકની નાજુક સ્થિતિ અને ગંભીર ઈજાઓને ધ્યાનમાં રાખીને તબીબોએ તેને વધુ આધુનિક સારવાર માટે સાયન હોસ્પિટલમાં રિફર કર્યો હતો. જ્યાં આઈસીયુ વિભાગમાં તબીબોની ટીમ દ્વારા બાળકની સારવાર કરવામાં આવી રહી છે અને તેની હાલત હજુ પણ ગંભીર હોવાનું જાણવા મળ્યું છે.

પોલીસ તપાસમાં બહાર આવ્યું છે કે આરોપી જાફર કપડાં વેચવાનો ધંધો કરે છે અને તેણે બે વર્ષ પહેલાં પ્રેમલગ્ન કર્યા હતા. આરોપી નશાની લત ધરાવતો હોવાથી દંપતી વચ્ચે અવારનવાર ઘરકંકાશ અને વિવાદ થતા હતા. રવિવારે રાત્રે પણ નશાની ધૂનમાં થયેલા આંતરિક કલેશના પરિણામે પિતાએ આ નિષ્ઠુર પગલું ભરી લીધું હતું.

આ માનવતાને શરમસાર કરતી ઘટનાને પગલે ઘાટકોપર પોલીસે આરોપી સામે હત્યાના પ્રયાસ સહિતની ગંભીર કલમો હેઠળ ગુનો નોંધી વધુ તપાસ આદરી છે. ઘટનાસ્થળના સીસીટીવી ફૂટેજ પણ ચકાસવામાં આવી રહ્યા છે જેથી બનાવના સમયના કાનૂની પુરાવાઓ એકત્રિત કરી શકાય.

હાલમાં પોલીસે આરોપીને કસ્ટડીમાં લઈને કોર્ટમાં રજૂ કરવાની તજવીજ હાથ ધરી છે. બીજી તરફ, માસુમ શિશુની તબીબી સ્થિતિ પર ડોક્ટરો સતત નજર રાખી રહ્યા છે. આ ઘટનાથી સમગ્ર મુંબઈ શહેરમાં અરેરાટી વ્યાપી ગઈ છે અને નશાખોરી તથા કૌટુંબિક હિંસાના ગંભીર પરિણામો સામે તંત્ર દ્વારા કડક દાખલો બેસાડવાની માંગ થઈ રહી છે.