કોઈમ્બતુર : તમિલનાડુના વાલપારાઈ પહાડી વિસ્તારમાં એક ભયાનક માર્ગ અકસ્માત સર્જાયો છે. કેરળના પ્રવાસીઓને લઈ જઈ રહેલી એક ટેમ્પો ટ્રાવેલર ઊંડી ખાઈમાં ખાબકતા 8 લોકોના કરુણ મોત નીપજ્યા છે અને અનેક લોકો ગંભીર રીતે ઘાયલ થયા છે. અકસ્માત એટલો ભયાનક હતો કે વાહન પહાડી માર્ગના એક વળાંક પરથી સીધું નીચેના વળાંક પર જઈને પટકાયું હતું.

13માં વળાંક પરથી કાબૂ ગુમાવ્યો:

વાલપારાઈ પોલીસના જણાવ્યા અનુસાર, કેરળના પેરિન્થલમન્ના વિસ્તારના 13 પ્રવાસીઓ ટેમ્પો ટ્રાવેલરમાં સવાર થઈને પર્યટન સ્થળોની મુલાકાત લઈને પરત ફરી રહ્યા હતા. પહાડી રસ્તા પર મુસાફરી દરમિયાન 13માં હેરપિન બેન્ડ (તીવ્ર વળાંક) પાસે ચાલકે વાહન પરથી કાબૂ ગુમાવી દીધો હતો. બેકાબૂ બનેલું વાહન પહાડ પરથી નીચે ફેંકાયું હતું અને સીધું 9માં હેરપિન બેન્ડ પર જઈને પડ્યું હતું. આ ગમખ્વાર અકસ્માતમાં સાત મહિલાઓ અને એક પુરુષ સહિત કુલ 8 લોકોના ઘટનાસ્થળે જ મોત નીપજ્યા હતા.

પ્રધાનમંત્રીએ શોક વ્યક્ત કર્યો:

આ દુર્ઘટના અંગે પ્રધાનમંત્રી નરેન્દ્ર ભાઈએ ઊંડા દુઃખની લાગણી વ્યક્ત કરી છે. તેમણે સોશિયલ મીડિયા પ્લેટફોર્મ X પર પોસ્ટ કરતા જણાવ્યું હતું કે, “તમિલનાડુના કોઈમ્બતુર નજીક થયેલા અકસ્માતના સમાચાર સાંભળીને અત્યંત વ્યથિત છું. જેમણે પોતાના સ્વજનો ગુમાવ્યા છે તેમના પ્રત્યે હું મારી સંવેદના વ્યક્ત કરું છું અને ઈજાગ્રસ્તો ઝડપથી સ્વસ્થ થાય તેવી પ્રાર્થના કરું છું.”

રાહત અને બચાવ કામગીરી:

અકસ્માતની જાણ થતા જ સ્થાનિક તંત્ર અને પોલીસ કાફલો ઘટનાસ્થળે દોડી ગયો હતો. વાહનના ડ્રાઈવર સહિત અન્ય ચાર પ્રવાસીઓને ગંભીર હાલતમાં બચાવી લેવામાં આવ્યા છે અને તેમને તાત્કાલિક સારવાર માટે પોલાચીની સરકારી હોસ્પિટલમાં ખસેડવામાં આવ્યા છે. કેરળના મુખ્યમંત્રી પિનરાઈ વિજયને પણ આ ઘટના પર શોક વ્યક્ત કર્યો છે અને ઈજાગ્રસ્તોને શ્રેષ્ઠ સારવાર મળે તે માટે અધિકારીઓને જરૂરી નિર્દેશો આપ્યા છે. કેરળ સરકારે મૃતકોના પરિવારોને જરૂરી તમામ સહાય પૂરી પાડવાની ખાતરી પણ આપી છે. પહાડી વિસ્તારોમાં તીવ્ર વળાંક પર ડ્રાઈવિંગ દરમિયાન રાખવામાં આવતી બેદરકારી અથવા બ્રેક ફેલ થવાને કારણે આ અકસ્માત સર્જાયો હોવાની પ્રાથમિક આશંકા સેવાઈ રહી છે.