મુંબઈ : ઓનલાઈન બેંકિંગ અને ડિજિટલ લેણદેણના આ યુગમાં એક નાની બેદરકારી તમારા આખા બેંક ખાતાને ખાલી કરી શકે છે. સાયબર ગુનેગારો હવે અસલી બેંકોના જેવી જ આકર્ષક અને હૂબહૂ નકલી વેબસાઇટ્સ બનાવીને સામાન્ય નાગરિકો સાથે લાખો રૂપિયાની છેતરપિંડી આચરી રહ્યા છે. તાજેતરમાં જ મુંબઈમાં એક ચોંકાવનારો કિસ્સો સામે આવ્યો છે જેમાં સાયબર ઠગોએ કેનેરા બેંકની નકલી વેબસાઈટ ઊભી કરીને એક વ્યક્તિ સાથે રૂપિયા ૨૭ લાખની મસમોટી ઠગાઈ આચરી હતી. આ મામલે પાંચ વર્ષની લાંબી તપાસ બાદ પોલીસે બે આરોપીઓની ધરપકડ કરીને આ સમગ્ર રેકેટનો પર્દાફાશ કર્યો છે.

આજકાલ હેકર્સ અને સાયબર અપરાધીઓ એટલા ચાલાક બની ગયા છે કે તેઓ અસલી વેબસાઈટની ડિઝાઇન, લોગો અને કલર કોમ્બિનેશનની નકલ કરીને અદલ નકલી પોર્ટલ બનાવી દે છે. જ્યારે સામાન્ય લોકો ગૂગલ પર પોતાની બેંકનું નામ સર્ચ કરે છે, ત્યારે અજાણતાં જ સ્પોન્સ્ડ એડ્સ કે નકલી લિંક્સના માધ્યમથી આ ફ્રોડ વેબસાઇટ્સના શિકાર બની જાય છે. રિઝર્વ બેંક ઓફ ઇન્ડિયા (RBI) દ્વારા હવે છેતરપિંડી રોકવા માટે તમામ બેંકોને .bank.in ડોમેન વાપરવાનો નિર્દેશ અપાયો છે, છતાં URL ના સ્પેલિંગમાં ઝીણી ભૂલો કરીને જેમ કે આઈ (I) ને એલ (l) કે શૂન્યને ઓ (o) તરીકે દર્શાવીને લોકોને છેતરવામાં આવે છે.

આ પ્રકારના ખતરનાક સાયબર ફ્રોડથી સુરક્ષિત રહેવા માટે હંમેશાં વેબસાઈટના એડ્રેસ બારમાં HTTPS:// અને પેડલોક પ્રતીકની ખાતરી કરવી અનિવાર્ય છે. ગૂગલ સર્ચ કરતી વખતે ટોપ પર દેખાતી 'સ્પોન્સર્ડ' કે પ્રમોટેડ એડ્સ પર ક્લિક કરવાનું ટાળવું જોઈએ અને હંમેશાં અધિકૃત સત્તાવાર લિંકનો જ ઉપયોગ કરવો જોઇએ. આ ઉપરાંત, જો કોઈ વેબસાઈટ પર શંકા જાય તો તેના 'About Us' કે 'Contact Us' જેવા પેજ તપાસી લેવા, કારણ કે નકલી વેબસાઇટ્સમાં માત્ર લોગિન પેજ જ બનાવવામાં આવે છે અને અન્ય લિંક્સ કામ કરતી નથી.

આ ઘટના બાદ સાયબર ક્રાઈમ બ્રાન્ચ દ્વારા દેશભરમાં એલર્ટ જાહેર કરવામાં આવ્યું છે અને નાગરિકોને અપીલ કરવામાં આવી છે કે કોઈપણ બેંક ક્યારેય લોગ ઇન કરતી વખતે એકસાથે એટીએમ પિન, સીવીવી કે ઓટીપી (OTP) માંગતી નથી. જો કોઈ શંકાસ્પદ પેજ આ પ્રકારની ખાનગી વિગતો માંગે તો તાત્કાલિક તે વેબસાઈટ બંધ કરી દેવી. આ કિસ્સામાં પકડાયેલા આરોપીઓની સઘન પૂછપરછ ચાલી રહી છે ત્યારે ભવિષ્યમાં આવા ઓનલાઈન કૌભાંડોથી બચવા માટે યુઝર્સે વધુ સતર્ક અને જાગૃત રહેવાની તાકીદ કરવામાં આવી છે.