નવી દિલ્હી:  ભારત અને અમેરિકા વચ્ચેના વ્યૂહાત્મક સંબંધોમાં ટૂંક સમયમાં એક નવો વળાંક આવવા જઈ રહ્યો છે. વિદેશ મંત્રી એસ. જયશંકર સાથેની મુલાકાત બાદ હવે અમેરિકાના વિદેશ મંત્રી માર્કો રુબિયો ભારતના રાષ્ટ્રીય સુરક્ષા સલાહકાર  અજિત ડોભાલ સાથે હાઈ-પ્રોફાઈલ બેઠક કરવાના છે. આ બેઠક માત્ર ઔપચારિક રાજદ્વારી મુલાકાત નહીં, પરંતુ એશિયાની જમીની વાસ્તવિકતાથી અમેરિકાને રૂબરૂ કરાવનારો એક મોટો સ્ટેજ સાબિત થશે. દિલ્હીના સુરક્ષા વર્તુળોમાં ચાલી રહેલી ચર્ચા મુજબ, અજિત ડોભાલ દક્ષિણ એશિયાની સુરક્ષા અંગે ભારતની ચિંતાઓ અને સરહદ પારથી ચાલતા આતંકવાદી નેટવર્કને લઈને અત્યંત મક્કમ અને આક્રમક વલણ અપનાવશે. હવે માત્ર વાતો કે નિવેદનોનો સમય પૂરો થઈ ગયો છે અને ભારત અમેરિકા પાસે સંયુક્ત કાર્યવાહીની અપેક્ષા રાખે છે.

આ મહાબેઠકમાં ભારતનું મુખ્ય ધ્યાન પડોશી દેશોના નાપાક ગઠબંધન અને જમીની સ્થિતિ પર રહેશે. વોશિંગ્ટન ઘણીવાર નકશાઓ અને કાગળો પર નીતિઓ ઘડે છે, પરંતુ વાસ્તવિક ખતરો જમીન પર છે તે વાત ડોભાલ પુરાવા સાથે રજૂ કરશે. પાકિસ્તાન પ્રેરિત આતંકવાદી ઇકોસિસ્ટમ, લશ્કર-એ-તૈયબા અને જૈશ-એ-મોહમ્મદ જેવા સંગઠનો તેમજ ડ્રગ્સ, ગેંગસ્ટર અને ટેરર ફંડિંગના કનેક્શનને તોડી પાડવા માટે સંકલિત એક્શન પ્લાન પર ભાર મૂકવામાં આવશે. આ ઉપરાંત, અફઘાનિસ્તાન અને દક્ષિણ એશિયાના પટ્ટામાં અસ્થિરતા ફેલાવવા પાછળ ચીન અને પાકિસ્તાનની જે જુગલબંધી કામ કરી રહી છે, તેનો પર્દાફાશ કરીને ભારત સ્પષ્ટ સંદેશ આપશે કે તે હવે માત્ર સતર્ક રહેવાને બદલે સીધા એક્શન મોડમાં આવવા માંગે છે.

બીજી તરફ, હિંદ મહાસાગર અને દક્ષિણ ચીન સમુદ્રમાં ચીનની વધી રહેલી દાદાગીરીને ડામવા માટે દરિયાઈ સુરક્ષા આ બેઠકનું કેન્દ્રબિંદુ બનશે. ક્વાડ  સંગઠનને વધુ સક્રિય બનાવવાની સાથે 'માલાબાર' જેવી સંયુક્ત નૌકાદળ કવાયતોનો વ્યાપ વધારવા અને રિયલ-ટાઇમ મેરીટાઇમ ડેટા શેરિંગ સિસ્ટમ ઊભી કરવા અંગે ગંભીર મંથન થશે. આ ઉપરાંત, ભારત હવે માત્ર ડિફેન્સ પ્રોડક્ટ્સનો ખરીદદાર રહેવા માંગતું નથી, જેથી ક્રિટીકલ એન્ડ ઇમર્જિંગ ટેકનોલોજી પ્રોગ્રામ હેઠળ સંરક્ષણ ક્ષેત્રે સંયુક્ત ઉત્પાદન અને ટેકનોલોજી ટ્રાન્સફર પર વિશેષ ભાર મૂકાશે. સાથે જ, વૈશ્વિક સપ્લાય ચેઈનને સુરક્ષિત રાખવા માટે ઊર્જા સુરક્ષા, એલએનજી પુરવઠો અને પશ્ચિમ એશિયા (ગાઝા-ઈરાન) સંકટની તેલના ભાવો પર પડનારી અસરો અંગે પણ બંને નેતાઓ વ્યાપક રણનીતિ તૈયાર કરશે.