બર્લિન : સમગ્ર યુરોપ હાલમાં ભીષણ અને જીવલેણ હીટવેવની પકડમાં છે. સ્કેન્ડિનેવિયાથી લઈને આલ્પ્સ સુધીના વિસ્તારોમાં ગરમીએ તમામ જૂના રેકોર્ડ તોડી નાખ્યા છે. તાપમાનનો પારો ૪૦ ડિગ્રી સેલ્સિયસને ઓળંગીને ક્યાંક ૪૨ ડિગ્રી સુધી પહોંચી જતાં લોકોનું જીવન દુષ્કર બની ગયું છે. આ આત્યંતિક હવામાનને કારણે ફ્રાન્સમાં ડઝનેક લોકોના મોત નિપજ્યા હોવાના અહેવાલો છે, જ્યારે જર્મની અને ડેનમાર્કમાં પણ ગરમીએ હાહાકાર મચાવ્યો છે. હવામાન વિભાગના જણાવ્યા અનુસાર, આ ગરમીનું મોજું માનવસર્જિત આબોહવા પરિવર્તનનું પરિણામ છે, જે અગાઉના દાયકાઓ કરતા અત્યંત ગંભીર છે.

જર્મની અને ડેનમાર્કમાં ઈતિહાસનું સૌથી વધુ તાપમાન

જર્મનીમાં શુક્રવારે સારબ્રુકેન શહેર નજીક ૪૧.૩ ડિગ્રી સેલ્સિયસ તાપમાન નોંધાયું હતું, જે જર્મનીના ઇતિહાસનું અત્યાર સુધીનું સૌથી વધુ તાપમાન છે. તે જ રીતે, ડેનમાર્કમાં પણ ૧૮૭૪થી શરૂ થયેલા હવામાન માપન બાદ પ્રથમવાર આર્હુસ શહેરની ઉત્તરે ૩૭ ડિગ્રી સેલ્સિયસ તાપમાન નોંધાયું હતું. હવામાનશાસ્ત્રીઓ ચેતવણી આપી રહ્યા છે કે જર્મનીના કેટલાક વિસ્તારોમાં તાપમાન ૪૨ ડિગ્રી સુધી પહોંચી શકે છે, જેના પગલે સમગ્ર દેશમાં 'હીટ એલર્ટ' જારી કરવામાં આવ્યું છે.

રેલવે સેવાઓ ખોરવાઈ અને માર્ગો પીગળ્યા

આ ભીષણ ગરમીની સીધી અસર પરિવહન વ્યવસ્થા પર પડી છે. જર્મનીના સૌથી વ્યસ્ત મોટરવે (હાઈવે) પર ગરમીને કારણે ડામર પીગળી જતાં અને રસ્તાઓ ફાટી જતાં ટ્રાફિક વ્યવહાર ખોરવાયો છે. રેલવે સેવાઓ પર પણ તેની ગંભીર અસર જોવા મળી રહી છે. જર્મન રેલ ઓપરેટર 'ડોઇશ બાહન' એ મુસાફરોને લાંબા અંતરની મુસાફરી રદ કરવા માટે મંજૂરી આપી છે, જ્યારે અન્ય ઓપરેટરોએ સુરક્ષાના કારણોસર ટ્રેનોની સંખ્યા ઘટાડી દીધી છે. ટ્રેનના પાટા પણ ગરમીના કારણે ફૂલી ગયા હોવાના બનાવો સામે આવ્યા છે.

ઈટાલીના ૧૮ શહેરોમાં રેડ એલર્ટ

ઇટાલીના આરોગ્ય મંત્રાલયે મિલાન, રોમ, તુરિન, વેનિસ અને ફ્લોરેન્સ સહિતના ૧૮ શહેરોમાં 'રેડ એલર્ટ' જારી કર્યું છે. ત્યાંના આલ્પ્સ પર્વતીય વિસ્તારમાં પણ ગરમીનો પ્રકોપ એટલો છે કે જૂન મહિનાની સૌથી ગરમ રાતનો અનુભવ થયો હતો, જ્યાં તાપમાન ૨૫ ડિગ્રીથી નીચે નહોતું ઉતર્યું. ફ્રાન્સમાં તો સ્થિતિ એટલી ગંભીર છે કે શાળાઓ બંધ કરવી પડી છે, દારૂના વેચાણ પર પ્રતિબંધ મુકાયો છે અને બહારના તમામ કાર્યક્રમો મુલતવી રાખવામાં આવ્યા છે.

"ઓમેગા બ્લોક" ની આફત

હવામાનશાસ્ત્રીઓના મતે, આ ગરમીનું મુખ્ય કારણ 'ઓમેગા બ્લોક' નામની હવામાન પેટર્ન છે. આ પેટર્ન વાતાવરણમાં ગરમ હવાના એક ગોળાને લાંબા સમય સુધી જકડી રાખે છે, જેના કારણે નિર્ધારિત વિસ્તારોમાં તાપમાન અસહ્ય બની જાય છે. આગામી સમયમાં ભારે વાવાઝોડાની આગાહી કરવામાં આવી છે, જેનાથી કદાચ તાપમાનમાં થોડો ઘટાડો થઈ શકે છે. હાલમાં, યુરોપિયન નાગરિકો માટે એર કન્ડીશનીંગ અને પાણીનો સંગ્રહ જીવન બચાવવા માટેનો એકમાત્ર વિકલ્પ બની ગયો છે.