નવી દિલ્હી : ભારતના વિદેશ મંત્રી ડૉ. એસ. જયશંકરે નવી દિલ્હી ખાતે જાપાનના વિદેશ મંત્રી તોશિમિત્સુ મોતેગીનું ઉષ્માભર્યું સ્વાગત કર્યું હતું અને બંને નેતાઓ વચ્ચે વિવિધ વૈશ્વિક તેમજ પ્રાદેશિક મુદ્દાઓ પર વ્યાપક ચર્ચા થઈ હતી. સોશિયલ મીડિયા પર આ મુલાકાતની વિગતો શેર કરતા વિદેશ મંત્રીએ જણાવ્યું કે, બેઠક દરમિયાન બંને દેશો વચ્ચે આર્થિક સુરક્ષા, વેપાર, ઉર્જા, સપ્લાય ચેઈન લવચીકતા, શિપિંગ, ટેકનોલોજી અને ઈનોવેશન તેમજ પરસ્પર લોકસંપર્ક સહિતના અનેક મહત્વના ક્ષેત્રોમાં સહયોગ વધારવા અંગે સકારાત્મક ચર્ચા થઈ છે. 

 આ ઉપરાંત, બંને નેતાઓએ મિડલ ઈસ્ટની વર્તમાન પરિસ્થિતિ અને તેની વૈશ્વિક અસરો સહિતના આંતરરાષ્ટ્રીય ઘાટો પર પણ વિચારોનું આદાન-પ્રદાન કર્યું હતું. ભારત અને જાપાન વચ્ચેના રાજદ્વારી સંબંધોની આગામી 75મી વર્ષગાંઠનો ઉલ્લેખ કરતા ડૉ. જયશંકરે ઉમેર્યું કે, બંને દેશો વચ્ચેની 'સ્પેશિયલ સ્ટ્રેટેજિક એન્ડ ગ્લોબલ પાર્ટનરશિપ' પરસ્પર હિતો માટે વધુ મજબૂત અને વ્યાપક બની રહી છે. નોંધનીય છે કે, જાપાનના વિદેશ મંત્રી આવતીકાલે નવી દિલ્હીમાં યોજાનારી ક્વાડ (Quad) દેશોના વિદેશ મંત્રીઓની મહત્વપૂર્ણ બેઠકમાં પણ ભાગ લેશે.