ઉજ્જૈન :   ધાર્મિક જુલુસ અને રેલીઓ સામાન્ય રીતે સમાજમાં ભાઈચારો અને સૌહાર્દ વધારવાનું કામ કરે છે, પરંતુ ઉજ્જૈન જિલ્લાના બડનગરમાં મોહરમના જુલુસ દરમિયાન એક અત્યંત ચોંકાવનારો અને જોખમી નજારો જોવા મળ્યો હતો. અદાન વિસ્તારમાંથી નીકળેલા આ જુલુસમાં ક્રેનની મદદથી એક આખી મારુતિ વાન (ટાટા મેજિક)ને હવામાં અંદાજે ૪૦ ફૂટની ઊંચાઈ પર લટકાવી દેવામાં આવી હતી. આ હવામાં લટકતી કારની ઉપર બે યુવાનો હાથમાં લાલ ઝંડા લહેરાવી રહ્યા હતા અને ત્યારે જ અચાનક તે વાનની અંદર એક જોરદાર વિસ્ફોટ કરવામાં આવ્યો હતો. આ ભયાનક દ્રશ્ય જોઈને ત્યાં હાજર લોકોના શ્વાસ અધ્ધર થઈ ગયા હતા.

આ સમગ્ર ઘટના ૨૩ જૂનની રાત્રે બની હોવાનું સામે આવ્યું છે, જેનો વીડિયો સોશિયલ મીડિયા પર આગની જેમ વાયરલ થઈ રહ્યો છે. આ વાન પર "આપણે ફરી જઈએ છીએ..." જેવું લખાણ લખેલું હતું અને વિસ્ફોટ થતાં જ આજુબાજુનો વિસ્તાર ધુમાડાથી ભરાઈ ગયો હતો. આ સિવાય જુલુસ દરમિયાન અન્ય કેટલાક જોખમી પ્રદર્શનો અને વિસ્ફોટોના દ્રશ્યો પણ સામે આવ્યા છે. પ્રાથમિક માહિતી અનુસાર, 'પરવેઝ એડિટ્સ-૨.૦' નામના ઇન્સ્ટાગ્રામ એકાઉન્ટ પરથી આ ભયાનક સ્ટન્ટના વીડિયો રીલ્સ બનાવીને શેર કરવામાં આવ્યા હતા, જેને કારણે સમગ્ર પંથકમાં આતંક અને ભયનો માહોલ જોવા મળ્યો હતો.

વીડિયો વાયરલ થતાં જ પોલીસ પ્રશાસન તાત્કાલિક એક્શનમાં આવ્યું હતું અને આ ગંભીર લાપરવાહી બદલ કડક કાર્યવાહી શરૂ કરી દીધી છે. ઉજ્જૈનના એડિશનલ એસપી કરણદીપ સિંહના આદેશ અનુસાર, સાર્વજનિક સ્થળે લોકોના જીવ જોખમમાં મૂકવા બદલ આયોજક શોએબ ખાન, વાહન પર ધ્વજ લહેરાવનારા તાલીમ ખાન અને ઝાહિદ ખાન તેમજ ક્રેનના માલિક ગોપાલ માલી વિરુદ્ધ ભારતીય ન્યાય સંહિતા (BNS) ની કલમ ૧૨૫, ૨૮૫, ૨૮૬ અને ૨૮૭ હેઠળ ગુનો દાખલ કરીને આગળની તપાસ હાથ ધરવામાં આવી છે.