તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
બ્રિટનના પીટરબરોમાં ૪૦ વર્ષ જૂના હિન્દુ મંદિરનું અસ્તિત્વ જોખમમાં: સિટી કાઉન્સિલના વિવાદાસ્પદ નિર્ણય સામે હાઈકોર્ટમાં જંગ
સ્થાનિક વહીવટીતંત્ર દ્વારા મંદિરની જમીન મુસ્લિમ સંસ્થાને વેચવાના નિર્ણયને પગલે ૧૪,૦૦૦થી વધુ હિન્દુ શ્રદ્ધાળુઓમાં ભારે રોષ: ટ્રસ્ટીઓ દ્વારા ન્યાયિક તપાસની માંગણી
પીટરબરો: યુનાઇટેડ કિંગડમના પીટરબરો શહેરમાં દાયકાઓ જૂના એક હિન્દુ મંદિરના અસ્તિત્વને લઈને ઊભો થયેલો વિવાદ હવે લંડનની હાઈકોર્ટ સુધી પહોંચ્યો છે. 'ભારત હિન્દુ સમાજ' (BHS) દ્વારા સંચાલિત આ મંદિર, જે ૧૯૮૬થી ન્યૂ ઇંગ્લેન્ડ કોમ્પ્લેક્સમાં કાર્યરત છે અને લગભગ ૪૦ વર્ષથી હજારો હિન્દુ પરિવારો માટે આસ્થાનું કેન્દ્ર છે, તેને પીટરબરો સિટી કાઉન્સિલે વેચી દેવાનો નિર્ણય લેતા વિવાદનો વંટોળ સર્જાયો છે.
શું છે સમગ્ર વિવાદ?
પીટરબરો સિટી કાઉન્સિલે પોતાની આર્થિક તંગી દૂર કરવાના ભાગરૂપે આ મિલકતને ખુલ્લા બજારમાં વેચવાનો નિર્ણય લીધો હતો. મંદિરના ટ્રસ્ટીઓનો દાવો છે કે તેઓ છેલ્લા એક દાયકાથી આ મિલકત ખરીદવા માટે કાઉન્સિલ સાથે વાટાઘાટો કરી રહ્યા હતા અને ૧.૩ મિલિયન પાઉન્ડમાં સોદો કરવા માટે સહમત પણ થયા હતા. જોકે, ટ્રસ્ટીઓના આક્ષેપ મુજબ, કાઉન્સિલે ગુપ્ત રીતે આ મિલકતને હરાજીમાં મૂકી અને અંતે 'યુનાઇટેડ કિંગડમ ઇસ્લામિક મિશન' (UKIM) ને વેચવાનો નિર્ણય કર્યો, જેઓ આ સ્થળ પર મસ્જિદ અને ઇસ્લામિક સેન્ટર બનાવવા માંગે છે.
ન્યાય માટે હાઈકોર્ટના દરવાજે
આ નિર્ણયના વિરોધમાં સ્થાનિક હિન્દુ સમુદાયે રસ્તા પર ઉતરીને વિરોધ નોંધાવ્યો હતો અને ત્યારબાદ હાઈકોર્ટમાં ન્યાયિક સમીક્ષા માટે અરજી કરી હતી. ટ્રસ્ટીઓનું કહેવું છે કે કાઉન્સિલની પ્રક્રિયા અન્યાયી અને પક્ષપાતી છે. ૩૫ માઈલની ત્રિજ્યામાં આ એકમાત્ર હિન્દુ મંદિર છે, જે ૧૪,૦૦૦થી વધુ હિન્દુઓ માટે પ્રાર્થના અને સાંસ્કૃતિક પ્રવૃત્તિઓનું એકમાત્ર માધ્યમ છે. હાઈકોર્ટમાં સુનાવણી દરમિયાન અરજદારોએ દલીલ કરી હતી કે કાઉન્સિલે 'ઇક્વાલિટી એક્ટ ૨૦૧૦'નું ઉલ્લંઘન કર્યું છે અને આ નિર્ણય લેતી વખતે હિન્દુ સમુદાય પર પડનારી નકારાત્મક અસરોને સંપૂર્ણપણે અવગણી છે.
કાઉન્સિલનો બચાવ અને સ્થાનિકોનો વિરોધ
બીજી તરફ, પીટરબરો સિટી કાઉન્સિલના વકીલોએ કોર્ટમાં દલીલ કરી છે કે મિલકત વેચવાની પ્રક્રિયા સંપૂર્ણપણે પારદર્શક અને કાયદેસર હતી. કાઉન્સિલનું કહેવું છે કે હિન્દુ સમુદાયને મંદિરની જગ્યા ખાલી કરવા માટે પૂરતો સમય આપવામાં આવશે અને તેમને અન્ય વૈકલ્પિક જગ્યાઓ ઓફર કરવામાં આવી છે. જોકે, કાઉન્સિલના આ દાવાઓને કોર્ટ રૂમમાં હાજર રહેલા શ્રદ્ધાળુઓએ સદંતર નકારી કાઢ્યા હતા.
હાલમાં આ મામલો કાયદાકીય વળાંક પર છે. મંદિરના ટ્રસ્ટીઓએ ક્રાઉડફંડિંગ દ્વારા ૧,૧૯,૦૦૦ પાઉન્ડથી વધુની રકમ એકત્ર કરીને આ કાયદાકીય લડાઈ મજબૂત બનાવી છે. હવે સમગ્ર હિન્દુ સમાજની નજર હાઈકોર્ટના આગામી ચુકાદા પર ટકેલી છે, જે આ ઐતિહાસિક મંદિરનું ભવિષ્ય નક્કી કરશે.
(12:36 PM IST)
છેલ્લા 8 દિવસમાં સૌથી લોકપ્રિય 
