બાકુ, તા.૨૧: મોટરસ્પોર્ટ્સ અને ફોર્મ્યુલા ૧ (F1) ના ચાહકો માટે એક અત્યંત ઉત્સાહજનક સમાચાર આવ્યા છે. બાકુ ખાતે યોજાનારી ૨૦૨૬ ફોર્મ્યુલા ૧ કતાર એરવેઝ અઝરબૈજાન ગ્રાન્ડ પ્રિક્સ જોવા માટે મુસાફરી કરતા ભારતીય પાસપોર્ટ ધારકો સહિત તમામ પાત્ર વિદેશી પ્રવાસીઓ માટે અઝરબૈજાન સરકારે 'વિઝા-ઓન-અરાઇવલ' (આગમન સમયે વિઝા) ની ખાસ અને કામચલાઉ સુવિધા જાહેર કરી છે. અઝરબૈજાનના રાષ્ટ્રપતિ ઇલ્હામ અલીયેવ દ્વારા બહાર પાડવામાં આવેલા ખાસ આદેશ (ડિક્રી) અનુસાર, ૨૫ ઓગસ્ટથી ૩૦ સપ્ટેમ્બર, ૨૦૨૬ દરમિયાન દેશના આંતરરાષ્ટ્રીય એરપોર્ટ પર ઉતરતા તમામ ટિકિટધારક પ્રવાસીઓને સ્થળ પર જ વિઝા આપવામાં આવશે, જેથી સામાન્ય વિઝા પ્રક્રિયામાં લાગતો સમય બચી શકશે.

આ વિઝા-ઓન-અરાઇવલ સુવિધાનો લાભ લેવા માટે પ્રવાસીઓએ એરપોર્ટ પર પોતાના મૂળ પાસપોર્ટ સાથે બાકુ ૨૦૨૬ ફોર્મ્યુલા ૧ ઇવેન્ટની ભૌતિક (ફિઝિકલ) કે ઇલેક્ટ્રોનિક રેસ ટિકિટ અથવા ટિકિટ ખરીદીનો સત્તાવાર પુરાવો રજૂ કરવાનો રહેશે. આ ઉપરાંત ફોર્મ્યુલા વન મેનેજમેન્ટ, FIA નિયમો હેઠળ જારી કરાયેલ એક્રેડિટેશન કાર્ડ અથવા 'બાકુ સિટી સર્કિટ' ઓપરેટિંગ કંપની દ્વારા જારી કરાયેલ મંજૂરી પત્ર ધરાવતા વ્યક્તિઓ પણ આ સરળ વિઝા સુવિધા માટે પાત્ર ઠરશે. જોકે, જે પ્રવાસીઓ પાસે F1 રેસની ટિકિટ કે માન્ય દસ્તાવેજો નથી, તેમણે અઝરબૈજાનની સત્તાવાર ASAN ઈ-વિઝા સિસ્ટમ અથવા દૂતાવાસ (એમ્બેસી) દ્વારા સામાન્ય વિઝા પ્રક્રિયા જ અનુસરવી પડશે.

૨૪ થી ૨૬ સપ્ટેમ્બર દરમિયાન બાકુ સિટી સર્કિટ ખાતે ખેલાશે સ્પીડનો રોમાંચક જંગ

ઉલ્લેખનીય છે કે ૨૦૨૬ ફોર્મ્યુલા ૧ અઝરબૈજાન ગ્રાન્ડ પ્રિક્સનું આયોજન ૨૪ થી ૨૬ સપ્ટેમ્બર દરમિયાન જાણીતા બાકુ સિટી સર્કિટ ખાતે થવા જઈ રહ્યું છે. જેમાં ૨૪ અને ૨૫ સપ્ટેમ્બરે પ્રેક્ટિસ સત્રો યોજાશે, જ્યારે ૨૫ સપ્ટેમ્બરે ક્વોલિફાઇંગ રાઉન્ડ રમાશે. આ ટુર્નામેન્ટની મુખ્ય રેસ શનિવાર, ૨૬ સપ્ટેમ્બરના રોજ યોજાશે, જેમાં વિશ્વના શ્રેષ્ઠ રેસર્સ ૬.૦૦૩ કિલોમીટર લાંબા પડકારજનક ટ્રેકના ૫૧ લેપ્સ (ચક્કર) લગાવીને વિજય માટે ટકરાશે. સ્પીડ અને રોમાંચના શોખીન ભારતીય મુસાફરો માટે આ ટૂંકી વિઝા પ્રક્રિયાને કારણે અઝરબૈજાન પ્રવાસ વધુ સરળ અને આકર્ષક બની ગયો છે.