નવી દિલ્હી, : દેશના પ્રતિષ્ઠિત પ્રોફેસરો અને પીએચડી સ્કોલર્સની યોગ્યતા નક્કી કરનારી UGC-NET ની પરીક્ષા ફરી એકવાર મોટા વિવાદના વમળમાં ફસાઈ ગઈ છે. આ વખતે વિવાદ કોઈ પેપર લીકનો નથી, પરંતુ નેશનલ ટેસ્ટિંગ એજન્સી (NTA) ની અણઘડ અને બેજવાબદાર શૈલીનો છે. UGC-NET ની સમાજશાસ્ત્ર (Sociology) અને અંગ્રેજી (English) ની પરીક્ષાના પ્રશ્નપત્રોમાં એટલી ગંભીર અને હાસ્યાસ્પદ ભૂલો સામે આવી છે જેને લઈને દેશભરમાં હોબાળો મચી ગયો છે. મુખ્ય વિરોધ પક્ષ કોંગ્રેસે આ મુદ્દે કેન્દ્ર સરકારને ઘેરીને રાષ્ટ્રીય પરીક્ષણ એજન્સી (NTA) ની વિશ્વસનીયતા પર ગંભીર સવાલો ઉઠાવ્યા છે અને શિક્ષણ મંત્રી ધર્મેન્દ્ર પ્રધાનના રાજીનામાની માંગ તેજ કરી છે.
સમાજશાસ્ત્રના પેપરમાં વિદ્વાનોના નામનું 'પોસ્ટમોર્ટમ' કરી નાખ્યું!
૩૦ જૂને યોજાયેલી UGC-NET સમાજશાસ્ત્રની પરીક્ષા આપનારા ઉમેદવારો ત્યારે સ્તબ્ધ થઈ ગયા જ્યારે તેમણે પ્રશ્નપત્રમાં જોડણી અને વ્યાકરણની અસંખ્ય ભૂલો જોઈ. હદ તો ત્યારે થઈ ગઈ જ્યારે પેપર સેટરોએ દુનિયાભરના જાણીતા સમાજશાસ્ત્રીઓ અને ભારતીય વિદ્વાનોના નામ જ બદલી નાખ્યા!
•    પ્રખ્યાત સમાજશાસ્ત્રી 'રિટ્ઝર' (Ritzer) ને બદલે "પુટ્ઝર" લખવામાં આવ્યું.
•    'પાર્સન્સ' (Parsons) ને બદલે "પાર્સો" કરી દેવાયું.
•    ભારતના મહાન સમાજશાસ્ત્રી 'જી. એસ. ઘુર્યે' ને બદલે "ઘુન્યે" છાપવામાં આવ્યું.
•    'એ. આર. દેસાઈ' નું નામ બદલીને "એ. કે. દેસાઈ" અને 'નુસ્બૌમ' ને બદલે "નુસ્બૌટ" લખીને પરીક્ષાની ગંભીરતાના ધજાગરા ઉડાડવામાં આવ્યા હતા.
અંગ્રેજીના પેપરમાં ૨૦૨૪નું પેપર 'કોપી-પેસ્ટ' કરી દીધું!
બીજી તરફ, અંગ્રેજી વિષયની પરીક્ષામાં તો આનાથી પણ મોટો કાંડ સામે આવ્યો છે. એક જાગૃત ઉમેદવારે દાવો કર્યો છે કે અંગ્રેજીના કુલ ૧૫૦ પ્રશ્નોમાંથી ૬૭ પ્રશ્નો કોઈ પણ જાતના ફેરફાર વગર વર્ષ ૨૦૨૪ની જૂની પરીક્ષામાંથી બેઠા ઉપાડી લેવામાં આવ્યા હતા. આશ્ચર્યની વાત એ છે કે પ્રશ્નોના જવાબ માટેના જે ચાર વિકલ્પો (Options) હોય છે, તેનો ક્રમ પણ બદલવાની તસ્દી NTA ના મહાશયોએ લીધી નહોતી! આ આળસુ અને બિનવ્યાવસાયિક અભિગમે પ્રશ્નપત્રની ગુણવત્તા અને પરીક્ષાની પવિત્રતા સામે મોટું પ્રશ્નાર્થ ચિહ્ન મૂકી દીધું છે.
જયરામ રમેશનો સરકાર પર પ્રહાર: "સુધારાના મોટા-મોટા વચનો આપવા છતાં NTAનું પ્રદર્શન સાવ નબળું રહ્યું છે. ૨૧ જૂને ફરીથી NEET પરીક્ષા યોજવા માટે આ સરકારે સશસ્ત્ર દળો અને આખી સરકારી મશીનરીને કામે લગાડવી પડી હતી. આ એ વાતની સાબિતી છે કે આવી ભારે સુરક્ષા અને એકત્રીકરણ વિના મોદી સરકાર એક સામાન્ય પરીક્ષા યોજવામાં પણ સંપૂર્ણ નિષ્ફળ સાબિત થઈ રહી છે. NTA હવે કોઈપણ રીતે લાયક નથી રહી અને શિક્ષણ મંત્રી પોતાની ફરજમાં તદ્દન બેદરકાર સાબિત થયા છે."
લાખો ઉમેદવારોના ભવિષ્ય સાથે ચેડાં, NTA મૌન
આટલો મોટો વિવાદ જગજાહેર થયો હોવા છતાં, નેશનલ ટેસ્ટિંગ એજન્સી (NTA) એ હજી સુધી આ ભૂલો અંગે સત્તાવાર રીતે કોઈ સ્પષ્ટતા કે જવાબ આપ્યો નથી, જેના કારણે વિદ્યાર્થીઓમાં ભારે આક્રોશ છે. ઉલ્લેખનીય છે કે UGC-NET ની પરીક્ષા દેશની યુનિવર્સિટીઓમાં આસિસ્ટન્ટ પ્રોફેસર બનવા અને પીએચડીમાં એડમિશન મેળવવા માટેની રાષ્ટ્રીય કક્ષાની મુખ્ય પરીક્ષા છે. તેમાં બે પેપર હોય છે, જેમાં પેપર-૧ જનરલ એપ્ટિટ્યુડનું અને પેપર-૨ વિષય-વિશિષ્ટ હોય છે. હવે જોવાનું એ રહેશે કે આ આખીય ગડબડ બાદ સરકાર વિદ્યાર્થીઓ માટે કોઈ ન્યાયી નિર્ણય લે છે કે પછી હંમેશની જેમ મામલો દબાવી દેવામાં આવે છે.