અમારા માટે દરેક નાગરિક સમાનઃ રાહુલ ગાંધી કોઈ VVIP નથી
ચીન સરહદ વિવાદ પર ટિપ્પણી બદલ માનહાનિ કેસમાં વહેલી સુનાવણીની અરજી પર સુપ્રીમ કોર્ટનું આકરું વલણઃ યોગ્ય પ્રક્રિયા અનુસરવા આદેશ
નવી દિલ્હી, તા.૯: રાહુલ ગાંધી સામે દાખલ થયેલા ફોજદારી માનહાનિના એક હાઈ-પ્રોફાઈલ મામલામાં સુપ્રીમ કોર્ટે દેશના ન્યાયતંત્રની ન્યાયી અને સમાન નીતિ પુનઃસ્થાપિત કરતા સખત શબ્દોમાં આકરું વલણ અપનાવ્યું છે. કોર્ટમાં ફરિયાદી પક્ષ વતી ઉપસ્થિત રહેલા વરિષ્ઠ વકીલે ત્વરિત સુનાવણીની માંગ કરતા એવી દલીલ રજૂ કરી હતી કે સામે પક્ષે રાહુલ ગાંધી કોઈ VVIP નથી અને આ કેસ છેલ્લા પાંચ મહિનાથી સુનાવણી વિના અટકેલો છે. આ દલીલનો વેધક જવાબ આપતાં ચીફ જસ્ટિસ સૂર્યકાન્ત, ન્યાયાધીશ જોયમલ્યા બાગચી અને ન્યાયાધીશ વી. મોહનાની ખંડપીઠે તીખી ટિપ્પણી કરી હતી કે, અમારા માટે દરેક વ્યક્તિ સંપૂર્ણપણે સમાન છે અને અદાલત સમક્ષ કોઈ પણ નાગરિક વિશેષ નથી. જો તમે કેસની વહેલી સુનાવણી ઈચ્છતા હોવ તો ચોક્કસ કાનૂની પ્રક્રિયાનું પાલન કરીને યોગ્ય અરજી દાખલ કરો, અમે તેની સુનાવણી હાથ ધરીશું.
આ સમગ્ર વિવાદ ૧૬ ડિસેમ્બર ૨૦૨૨ ના રોજ વાસ્તવિક નિયંત્રણ રેખા પર ભારત અને ચીનની સેના વચ્ચે થયેલી હિંસક આમને-સામનેની ઘટના પર રાહુલ ગાંધી દ્વારા કરવામાં આવેલા એક વિવાદાસ્પદ નિવેદનમાંથી જન્મ્યો છે. રાહુલ ગાંધીએ તત્કાલીન સરકારની સીમા સુરક્ષા નીતિઓ પર આકરા પ્રહારો કરતાં આરોપ લગાવ્યો હતો કે ચીની દળો ભારતીય સેનાના જવાનો પર હુમલો કરી રહ્યા છે. આ નિવેદનને ભારતીય સશષા દળો માટે અપમાનજનક અને મનોબળ તોડનારું ગણાવીને બોર્ડર રોડ્સ ઓર્ગેનાઇઝેશનના પૂર્વ ડિરેક્ટર ઉદય શંકર શ્રીવાસ્તવ વતી એડવોકેટ વિવેક તિવારીએ ફોજદારી માનહાનિની ફરિયાદ નોંધાવી હતી. આ કેસમાં લખનૌની એડિશનલ ચીફ જ્યુડિશિયલ મેજિસ્ટ્રેટ કોર્ટે રાહુલ ગાંધીને વ્યક્તિગત રીતે હાજર રહેવા સમન્સ પાઠવ્યા હતા, જેને અલ્હાબાદ હાઈકોર્ટે પણ કાયદેસર ઠેરવ્યા હતા.
અલ્હાબાદ હાઈકોર્ટના આ ચુકાદા સામે રાહુલ ગાંધીએ દેશની સર્વોચ્ચ અદાલતમાં અપીલ દાખલ કરી હતી. અગાઉ આ મામલાની સુનાવણી કરતી વખતે જસ્ટિસ દીપાંકર દત્તા અને જસ્ટિસ ઓગસ્ટિન જ્યોર્જ મસીહની પિઠે નીચલી અદાલતની કાર્યવાહી પર સ્ટે આપ્યો હતો. જોકે, સુપ્રીમ કોર્ટે રાહુલ ગાંધીના વલણ સામે ગંભીર સવાલો પણ ઉઠાવ્યા હતા અને પૂછયું હતું કે, સંસદ જેવા મહત્વપૂર્ણ અને જવાબદાર મંચ પર આવા મુદ્દા ઉઠાવવાને બદલે સોશિયલ મીડિયા કે જાહેર સભાઓમાં આવા નિવેદનો કેમ આપવામાં આવે છે? અને શું આ નિવેદનો પાછળ કોઈ પુષ્ટિ થયેલી અધિકળત માહિતી હતી કે નહીં? હાલ સુપ્રીમ કોર્ટે સ્ટે યથાવત રાખીને ફરિયાદી પક્ષને વહેલી સુનાવણી મેળવવા માટે યોગ્ય નિયમ મુજબ અરજી દાખલ કરવાનો માર્ગ ચીંધ્યો છે.
(2:44 PM IST)
છેલ્લા 8 દિવસમાં સૌથી લોકપ્રિય 
