<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 17th November 2026

બંગાળની ખાડીમાં ‘અક્‍વાન' ચક્રવાતનું મહાસંકટઃ આંધ્રપ્રદેશના દરિયાકાંઠે ૧૪૫ કિમીની ઝડપે ત્રાટકવાની શકયતા

હવામાન વિભાગની આગાહી મુજબ ૨૦ નવેમ્‍બરે નેલ્લોર અને ટુની વચ્‍ચે વાવાઝોડું લેન્‍ડફોલ કરશેઃ તંત્ર દ્વારા સાવચેતીના પગલાં તેજ

ભુવનેશ્વર, તા.૧૭: બંગાળની ખાડીમાં સક્રિય થયેલું ચક્રવાત અક્‍વાન હવે અત્‍યંત ખતરનાક સ્‍વરૂપ ધારણ કરી રહ્યું છે, જેને પગલે પૂર્વ ભારતના દરિયાકાંઠાના રાજ્‍યોમાં હાઈ એલર્ટ જાહેર કરવામાં આવ્‍યું છે. સોમવારે સાંજે ચક્રવાતી વાવાઝોડામાં પરિવર્તિત થયેલી આ સિસ્‍ટમ મંગળવારે વધુ મજબૂત બનીને તીવ્ર ચક્રવાતમાં ફેરવાઈ ગઈ છે. ભારતીય હવામાન વિભાગના જણાવ્‍યા અનુસાર, આ વાવાઝોડું ૨૦ નવેમ્‍બરના રોજ આંધ્રપ્રદેશના નેલ્લોર અને ટુની તેમજ યાનમ દરિયાકાંઠા વચ્‍ચે ત્રાટકશે. લેન્‍ડફોલ સમયે તે ખૂબ જ તીવ્ર ચક્રવાતી વાવાઝોડાનું સ્‍વરૂપ ધારણ કરશે, જેના કારણે દરિયાકાંઠાના વિસ્‍તારોમાં ૧૨૦ થી ૧૩૦ કિલોમીટર પ્રતિ કલાકની ઝડપે તોફાની પવન ફૂંકાશે અને પવનના ઝટકા ૧૪૫ કિલોમીટર પ્રતિ કલાક સુધી પહોંચી શકે છે.

ચક્રવાત અક્‍વાન ભલે આંધ્રપ્રદેશના કાંઠે સીધું ત્રાટકવાનું હોય, પરંતુ તેની વ્‍યાપક અસર પડોશી રાજ્‍ય ઓડિશામાં પણ જોવા મળશે. IMD ના મહાનિર્દેશક મળત્‍યુંજય મહાપાત્રાએ સ્‍પષ્ટ કર્યું છે કે ૧૮ નવેમ્‍બરથી જ ઓડિશાના વાતાવરણમાં પલટો આવશે અને વરસાદનો દોર શરૂ થશે. ખાસ કરીને દક્ષિણ અને દરિયાકાંઠાના ઓડિશાના જિલ્લાઓમાં ભારે વરસાદની સંભાવના છે, જ્‍યારે ઉત્તર ઓડિશામાં પણ વરસાદી માહોલ રહેશે. ચક્રવાતના બાહ્ય વર્તુળમાં આવતા વિસ્‍તારોમાં ૧૯ અને ૨૦ નવેમ્‍બરે પવનની ગતિમાં નોંધપાત્ર વધારો થવાની ધારણા હોવાથી, ઓડિશા સરકારે સંભવિત પરિસ્‍થિતિને પહોંચી વળવા માટે વહીવટી તંત્રને એલર્ટ મોડ પર રાખીને સાવચેતીની તૈયારીઓ યુદ્ધના ધોરણે તેજ કરી દીધી છે.

જોકે, ચક્રવાતની તીવ્રતા અને તેના માર્ગ અંગે હવામાન નિષ્‍ણાતોમાં બે અલગ-અલગ મત પણ સામે આવ્‍યા છે. શિક્ષા ઓ અનુસંધાન યુનિવર્સિટીના ક્‍લાઈમેટ એન્‍ડ વેધર સેન્‍ટરના ડિરેક્‍ટર ડૉ. શરત સાહુએ IMD કરતા થોડું અલગ મૂલ્‍યાંકન રજૂ કર્યું છે. તેમના મતે, તમિલનાડુના દરિયાકાંઠા તરફથી લાંબા સમયથી આવી રહેલું પવનનું દબાણ ચક્રવાતને વધુ શક્‍તિશાળી બનાવવાને બદલે તેની તાકાતને નબળી પાડી રહ્યું છે, જે વાદળોના સંગઠિત વિકાસને અટકાવે છે. ડૉ. સાહુના અંદાજ મુજબ, આ સિસ્‍ટમ ૨૦ નવેમ્‍બરની સવારે દક્ષિણ આંધ્રપ્રદેશના ટુની અને ઉત્તરી તમિલનાડુના દરિયાકાંઠા આસપાસ ત્રાટકશે અને ઓડિશા પર તેની કોઈ મોટી વિનાશક અસર નહીં થાય, માત્ર ૧૮ થી ૨૧ નવેમ્‍બર દરમિયાન રાજ્‍યના વિવિધ ભાગોમાં હળવો થી મધ્‍યમ વરસાદ વરસી શકે છે.

(3:55 PM IST)