નવી દિલ્હી,: દેશના કરોડો ખાનગી અને સંગઠિત ક્ષેત્રના કર્મચારીઓ માટે એક અત્યંત મહત્વપૂર્ણ અને સ્પષ્ટતા કરનારા સમાચાર સામે આવ્યા છે. છેલ્લા કેટલાક દિવસોથી ફેસબુક અને વોટ્સએપ સહિતના વિવિધ સોશિયલ મીડિયા પ્લેટફોર્મ પર એવા દાવાઓ જોરશોરથી વાયરલ થઈ રહ્યા છે કે કર્મચારી પેન્શન યોજના (EPS-95) હેઠળ મળતું લઘુત્તમ માસિક પેન્શન વધારીને ₹૭,૫૦૦ કરી દેવામાં આવ્યું છે. આ અફવાઓ પર હવે એમ્પ્લોઇઝ પ્રોવિડન્ટ ફંડ ઓર્ગેનાઇઝેશન (EPFO) એ સત્તાવાર રીતે પૂર્ણવિરામ મૂકતા આખા સત્યનો ખુલાસો કર્યો છે.

સોશિયલ મીડિયા પર એક નકલી સરકારી પત્ર ફરતો કરવામાં આવ્યો હતો, જેમાં એવો દાવો કરાયો હતો કે વધેલું પેન્શન ૩૦ એપ્રિલ ૨૦૨૬ થી અમલમાં આવી ગયું છે અને મે મહિનાથી સુધારેલા દરે ચુકવણી પણ શરૂ થઈ જશે. તંત્રએ આ પત્રને તદ્દન બોગસ અને ભ્રામક ગણાવ્યો છે. EPFO એ પોતાની સત્તાવાર સોશિયલ મીડિયા પોસ્ટમાં સ્પષ્ટપણે જણાવ્યું છે કે, "લઘુત્તમ EPS પેન્શનમાં જંગી વધારા અંગે સોશિયલ મીડિયા પર જે પત્ર વાયરલ થઈ રહ્યો છે તે સંપૂર્ણપણે નકલી (Fake) છે અને ગેરમાર્ગે દોરનારો છે."

પેન્શન વધારવા અંગે શું છે વાસ્તવિક સ્થિતિ?

જો કે, વાસ્તવિકતા એ છે કે શ્રમ અને રોજગાર મંત્રાલય હાલના લઘુત્તમ EPS પેન્શનને, જે હાલમાં માત્ર ₹૧,૦૦૦ પ્રતિ માસ છે, તેને વધારીને વધુ આદરજનક કરવા માટે સક્રિયપણે વિચારણા કરી રહ્યું છે. પરંતુ સરકાર દ્વારા હજુ સુધી આ રકમ કેટલી વધશે કે ક્યારથી અમલમાં આવશે, તે અંગે કોઈ સત્તાવાર મંજૂરી કે જાહેરાત કરવામાં આવી નથી. આ સંભવિત વધારાથી દેશના એવા લાખો પેન્શનરોને મોટો આર્થિક ફાયદો થશે જેઓ હાલમાં ખૂબ જ નજીવી રકમ મેળવી રહ્યા છે. નિયમ મુજબ, જે કર્મચારીઓ પોતાના માસિક પગારમાંથી (મહત્તમ ₹૧૫,૦૦૦ ની મર્યાદા સાથે) EPS ફંડમાં ઓછામાં ઓછા ૧૦ વર્ષ સુધી સતત યોગદાન આપે છે, તેઓ આ પેન્શન મેળવવા માટે હકદાર બને છે.

હાયર પેન્શનના સભ્યો પર અસર નહીં થાય

જે કર્મચારીઓ ૧ સપ્ટેમ્બર ૨૦૧૪ પહેલા આ યોજનામાં જોડાયા હતા અને સુપ્રીમ કોર્ટના ઐતિહાસિક આદેશ બાદ પોતાના વાસ્તવિક ઉચ્ચ પગારના આધારે વધુ યોગદાન આપવાનું પસંદ કર્યું હતું, તેઓ ઓલરેડી હાયર પેન્શન મેળવી રહ્યા છે. તેથી લઘુત્તમ પેન્શન મર્યાદામાં થનારા ફેરફારની તેમના પર કોઈ ખાસ અસર થવાની સંભાવના નથી.

વર્ષ ૨૦૧૪ માં આ યોજનામાં એક મોટો ફેરફાર કરવામાં આવ્યો હતો, જે મુજબ ૧ સપ્ટેમ્બર ૨૦૧૪ પછી જો કોઈ નવો કર્મચારી ₹૧૫,૦૦૦ થી વધુના મૂળ પગાર સાથે નોકરીમાં જોડાય છે, તો તે માત્ર EPF (પ્રોવિડન્ટ ફંડ) નો સભ્ય બની શકે છે, તેને EPS પેન્શન યોજનાનો લાભ મળતો નથી.

હાલમાં કેવી રીતે થાય છે EPS માં યોગદાન?

હાલની વ્યવસ્થા મુજબ, દર મહિને કર્મચારીના પગારમાંથી પેન્શન માટે એક નિશ્ચિત રકમ કાપવામાં આવે છે. નિયમ પ્રમાણે, કંપનીના ઔદ્યોગિક યોગદાનમાંથી કર્મચારીના મૂળ પગાર અને મોંઘવારી ભથ્થા (DA) ના ૮.૩૩% અથવા મહત્તમ ₹૧,૨૫૦ (જે ઓછું હોય તે) પેન્શન ફંડમાં જમા થાય છે. નિવૃત્તિ સમયે પેન્શનની ગણતરી નોકરીના વર્ષો અને પેન્શનપાત્ર પગારના આધારે થાય છે. હાલની જોગવાઈ મુજબ, મુખ્ય સભ્ય માટે લઘુત્તમ પેન્શન ₹૧,૦૦૦, જ્યારે વિધવા કે આશ્રિત માતા-પિતા માટે ₹૨૫૦ અને અનાથ બાળકો માટે લઘુત્તમ ₹૭૫૦ ની મર્યાદા નક્કી કરવામાં આવેલી છે. તેથી કર્મચારીઓએ સત્તાવાર જાહેરાત ન થાય ત્યાં સુધી સોશિયલ મીડિયાની આવી અફવાઓથી દૂર રહેવું જોઈએ.