નવી દિલ્હી: દિલ્હીના લાખો વેપારીઓ માટે વ્યવસાય કરવાની રીત હવે સાવ સરળ બની ગઈ છે. મ્યુનિસિપલ કોર્પોરેશનના નવા આદેશ મુજબ, જનરલ ટ્રેડ અને સ્ટોરેજ લાઇસન્સ મેળવવા માટે હવે અલગથી ધક્કા ખાવાની જરૂર નહીં પડે. વેપારીઓ જ્યારે તેમનો વાર્ષિક પ્રોપર્ટી ટેક્સ ભરશે, તેની સાથે જ લાઇસન્સ ફીની ચુકવણી કરી શકશે. આ નવી સિસ્ટમ મુજબ, ટેક્સ ભર્યા પછી મળતી રસીદ જ કાયદેસરનું લાઇસન્સ ગણાશે. યુનિક પ્રોપર્ટી આઈડી (UPIC) સાથે આ પ્રક્રિયાને જોડવામાં આવી હોવાથી હવે પારદર્શિતા વધશે અને ભ્રષ્ટાચાર પર લગામ લાગશે.

આ નિર્ણયથી આર્થિક રીતે પણ વેપારીઓને મોટો ફાયદો થયો છે. અગાઉ લાઇસન્સ મેળવવા પાછળ હજારો રૂપિયાનો ખર્ચ અને ઇન્સ્પેક્ટરોની કનડગત વેઠવી પડતી હતી, પરંતુ હવે પ્રોપર્ટી ટેક્સના માત્ર 15% જેટલી રકમ વધારાની ફી તરીકે ભરીને લાઇસન્સ મેળવી શકાશે. ચેમ્બર ઓફ ટ્રેડ એન્ડ ઇન્ડસ્ટ્રીના મતે આનાથી વેપારીઓને ખર્ચમાં 70 થી 80 ટકા સુધીની રાહત મળશે. જોકે, આ સુવિધા સાથે જવાબદારી પણ વધી છે; અગ્નિ સુરક્ષા અને પ્રદૂષણ નિયંત્રણના નિયમોનું પાલન કરવાનું વેપારીએ પોતે જ સોગંદનામું આપવાનું રહેશે અને કોઈપણ ક્ષતિ બદલ માલિક પોતે જવાબદાર રહેશે.

સરકારના આ પગલાથી દિલ્હીના અંદાજે 1 લાખથી વધુ દુકાનદારોને સીધો લાભ મળશે. પેપરલેસ સિસ્ટમ અને એક જ પોર્ટલ પરથી તમામ સુવિધાઓ મળવાને કારણે 'ઇઝ ઓફ ડુઇંગ બિઝનેસ'ને મોટો વેગ મળશે. કોર્પોરેશને સત્તાવાર આદેશ જારી કરીને આ નવી વ્યવસ્થા તાત્કાલિક અસરથી લાગુ કરી દીધી છે. હવે વેપારીઓએ લાઇસન્સ રિન્યૂ કરાવવા માટે કચેરીઓના ચક્કર કાપવાને બદલે માત્ર સમયસર પ્રોપર્ટી ટેક્સ ભરવા પર ધ્યાન આપવાનું રહેશે.