નવી દિલ્હી :  ભારતીય ઉડ્ડયન ક્ષેત્રમાં સ્થાનિક સ્તરે ૬૬% હિસ્સો ધરાવતી ઇન્ડિગો હવે આંતરરાષ્ટ્રીય સ્તરે ગલ્ફ એરલાઇન્સના વર્ચસ્વને મોટો પડકાર ફેંકવા જઈ રહી છે. અત્યાર સુધી ભારતથી યુરોપ, અમેરિકા કે આફ્રિકા જતાં મોટાભાગના મુસાફરોને દુબઈ, દોહા કે અબુ ધાબી જેવા ગલ્ફ હબ પર નિર્ભર રહેવું પડતું હતું. આ પરિસ્થિતિને બદલવા ઇન્ડિગો અને એર ઇન્ડિયા સાથે મળીને એક વિશાળ માસ્ટરપ્લાન પર કામ કરી રહી છે, જેથી વિદેશી જહાજો પરની નિર્ભરતા ઘટે અને ભારતીય એરલાઇન્સ આંતરરાષ્ટ્રીય રૂટ પર સીધી કનેક્ટિવિટી આપી શકે.

આ વ્યૂહરચનાના ભાગરૂપે, પોતાના ૨૦ વર્ષ પૂર્ણ કરી રહેલી ઇન્ડિગો ટૂંક સમયમાં પોતાના કાફલામાં 'એરબસ A321 XLR' અને ૨૦૨૮ સુધીમાં લાંબા અંતરના 'A350' વિમાનો ઉમેરશે. આ નવા એરક્રાફ્ટની મદદથી ભારતથી યુરોપ, યુએસ અને અન્ય દુરના દેશો માટે સીધી ફ્લાઇટ્સ શરૂ થશે, જેનાથી મુસાફરોને ગલ્ફ દેશોમાં પ્લેન બદલવાની ઝંઝટમાંથી મુક્તિ મળશે. આ પગલાનો મુખ્ય હેતુ ભારતીય મુસાફરો દ્વારા જનરેટ થતી ટિકિટ આવકને વિદેશી એરલાઇન્સમાં જતી અટકાવીને સીધી ભારતીય અર્થતંત્ર અને ઉડ્ડયન ક્ષેત્રને મજબૂત કરવાનો છે.

આંતરરાષ્ટ્રીય સ્તરે પોતાના નેટવર્કને ઝડપથી વિસ્તૃત કરવા માટે ઇન્ડિગો પોતાના નેતૃત્વમાં પણ મોટો ફેરફાર કરી રહી છે. IATA ના પૂર્વ ડિરેક્ટર જનરલ વિલી વોલ્શ ૩ ઓગસ્ટે એરલાઇનના નવા CEO તરીકે કાર્યભાર સંભાળશે. વિશ્વભરમાં વસતા કરોડો ભારતીયોને દેશ સાથે સીધા જોડવા માટે નવા આંતરરાષ્ટ્રીય રૂટ ઉમેરવામાં આવી રહ્યા છે. જો આ ગેમ પ્લાન સફળ રહેશે તો આંતરરાષ્ટ્રીય ઉડ્ડયન બજારમાં ગલ્ફ એરલાઇન્સની મોનોપોલી તૂટશે અને ભારતીય એરલાઇન્સ વૈશ્વિક સ્તરે મજબૂત બને તેવી પૂરી શક્યતા છે.