કોવેન્ટ્રી:  બ્રિટનના વેસ્ટ મિડલેન્ડ્સમાં આવેલું અને 90 વર્ષના ગૌરવશાળી ઈતિહાસ ધરાવતું કોવેન્ટ્રી એરપોર્ટ આગામી 11 જૂન, 2026ના રોજ કાયમ માટે બંધ થવા જઈ રહ્યું છે. વર્ષ 1936માં 'બેગિન્ટન એરોડ્રોમ' તરીકે શરૂ થયેલું આ એરપોર્ટ બીજા વિશ્વયુદ્ધ દરમિયાન RAF બેઝ તરીકે પણ સેવા આપી ચૂક્યું છે. આ એરપોર્ટ પરથી છેલ્લી ફ્લાઇટ આવતીકાલે ઉડાન ભરશે, ત્યારબાદ તેના રનવે પર વિમાનોની અવરજવર બંધ કરી દેવામાં આવશે.
જોકે, આ એરપોર્ટ સાવ વેરાન નહીં રહે. આ જગ્યાનો હવે એક વિશાળ ઔદ્યોગિક કેન્દ્ર તરીકે વિકાસ કરવામાં આવશે. કોવેન્ટ્રી સિટી કાઉન્સિલ અને રિગ્બી ગ્રુપના સંયુક્ત સાહસ હેઠળ અહીં 'ગ્રીનપાવર પાર્ક' (GreenPower Park) બનાવવામાં આવશે. આ 2.5 બિલિયન પાઉન્ડ (આશરે ₹25,000 કરોડ)નો પ્રોજેક્ટ છે, જે મુખ્યત્વે ઇલેક્ટ્રિક વાહનો (EV) માટેની બેટરીઓ બનાવશે. આ નવા મેન્યુફેક્ચરિંગ યુનિટથી અંદાજે 6,000 લોકોને રોજગારી મળવાની અપેક્ષા છે.
કોવેન્ટ્રી સિટી કાઉન્સિલના કાઉન્સિલર જિમ ઓ'બોયલે જણાવ્યું હતું કે, "ગ્રીનપાવર પાર્ક યુકેની ઇલેક્ટ્રિફાઇડ ઇકોનોમી તરફની ગતિને ઝડપી બનાવવામાં મહત્વની ભૂમિકા ભજવશે. આ યુકેનું એકમાત્ર એવું સ્થળ છે જે ઇન્વેસ્ટમેન્ટ ઝોનમાં આવેલું છે અને બેટરી ઉત્પાદન તેમજ રિસાઇકલિંગ માટે તમામ મંજૂરીઓ ધરાવે છે." આ પ્રોજેક્ટ કોવેન્ટ્રીને 'ઇલેક્ટ્રિક સિટી' બનાવવાના મહત્વકાંક્ષી પ્લાનનો એક ભાગ છે.
આ એરપોર્ટ એક સમયે વિઝ એર (Wizz Air) જેવી બજેટ એરલાઇન્સ માટે જાણીતું હતું અને અહીંથી સ્પેન, ઇટાલી, ફ્રાન્સ અને ઓસ્ટ્રિયા જેવા દેશો માટે ફ્લાઇટ્સ ઉપલબ્ધ હતી. પરંતુ છેલ્લા કેટલાક સમયથી તેનો ઉપયોગ મુખ્યત્વે એર એમ્બ્યુલન્સ અને ખાનગી ચાર્ટર પ્લેન માટે થતો હતો. હવે, બદલાતા સમય સાથે આ ઐતિહાસિક સ્થળ દેશના સ્વચ્છ ઉર્જા અને ટેકનોલોજીના નવા કેન્દ્ર તરીકે ઉભરી આવશે.