નવી દિલ્હી : બેંક કર્મચારીઓ અને અધિકારીઓના સંગઠનોના સંયુક્ત મંચે કેન્દ્ર સરકાર તથા બેંક વ્યવસ્થાપન સામે આંદોલન વધુ તીવ્ર બનાવવાની જાહેરાત કરી છે. મંચે તા. ૧૧ સપ્ટેમ્બરે એક દિવસની દેશવ્યાપી હડતાળ બોલાવી છે. માંગણીઓનું નિરાકરણ નહીં આવે તો તા. ૨૮, ૨૯ અને ૩૦ સપ્ટેમ્બરે સતત ત્રણ દિવસ કામ બંધ રાખવામાં આવશે. ત્યારબાદ પણ ઉકેલ નહીં આવે તો તા. ૨૬ ઓક્ટોબરથી અનિશ્ચિત મુદતની હડતાળ શરૂ કરવાની ચીમકી આપવામાં આવી છે.

સંગઠનોની મુખ્ય માંગ તમામ શનિવારે બેંકો બંધ રાખીને પાંચ દિવસનું કાર્યસપ્તાહ લાગુ કરવાની છે. વર્ષ ૨૦૧૫થી બીજા અને ચોથા શનિવારે રજા અમલમાં આવ્યા બાદ પાંચ દિવસની બેંકિંગ અંગે વારંવાર ચર્ચા થઈ હોવા છતાં અંતિમ અમલ થયો નથી. ઉપરાંત કામગીરી આધારિત પ્રોત્સાહન યોજનામાં ફેરફાર કરવાની પણ માગ છે.

તા. ૨૬ અને ૨૭ સપ્ટેમ્બરે શનિવાર-રવિવાર બાદ તા. ૨૮થી ૩૦ હડતાળ થાય તો કેટલીક શાખાઓમાં સતત પાંચ દિવસ કામગીરીને અસર થઈ શકે છે. જોકે ઓનલાઇન વ્યવહારો તથા સ્વચાલિત સેવાઓ સામાન્ય રીતે ચાલુ રહેવાની શક્યતા છે.