એલોન મસ્કે પોતાના સોશિયલ મીડિયા પ્લેટફોર્મ ‘X’ ને સુપર એપ બનાવવાની દિશામાં મોટું પગલું ભર્યું છે. કંપનીએ X Money નામે નવી ડિજિટલ પેમેન્ટ અને બૅન્કિંગ સર્વિસ લોન્ચ કરી છે. આના દ્વારા યુઝર્સ પૈસા ટ્રાન્સફર કરવા, બિલ ભરવા, વિઝા ડેબિટ કાર્ડ વાપરવા અને અન્ય ઘણી બૅન્કિંગ સુવિધાઓનો લાભ સીધો X એપ પર જ મેળવી શકશે. હાલમાં આ સેવા અમેરિકામાં X Premium અને Premium Plus સબસ્ક્રાઇબર્સ માટે શરૂ કરવામાં આવી છે.

X Money એ સોશિયલ મીડિયા પ્લેટફોર્મ X ની અંદર જ મોજૂદ એક ડિજિટલ બૅન્કિંગ અને પેમેન્ટ સર્વિસ છે. આનો ઉદ્દેશ્ય સોશિયલ નેટવર્કિંગ, ડિજિટલ પેમેન્ટ અને રોજિંદી બૅન્કિંગ સેવાઓને એક જ એપમાં ઉપલબ્ધ કરાવવાનો છે. આ સર્વિસ હેઠળ યુઝર્સને ડિપોઝિટ એકાઉન્ટ, પીઅર-ટુ-પીઅર પેમેન્ટ, ડાયરેક્ટ ડિપોઝિટ અને વિઝા ડેબિટ કાર્ડ જેવી સુવિધાઓ મળશે. આ સિવાય યુઝર્સ કોઈપણ ટ્રાન્સફર ફી વગર બીજા X યુઝર્સને પૈસા મોકલી શકશે. બિલ પેમેન્ટ, વાયર ટ્રાન્સફર અને ફિઝિકલ ચેક મોકલવા જેવી સુવિધાઓ પણ આ પ્લેટફોર્મ પર ઉપલબ્ધ થશે. કંપનીનો દાવો છે કે તેના મેટલ ફિનિશવાળા વિઝા ડેબિટ કાર્ડ પર યુઝરનું X હેન્ડલ પણ હશે. સાથે જ 3 ટકા કેશબેક અને જમા રકમ પર વાર્ષિક 6.00 ટકા સુધી વ્યાજ (APY) મળવાનો દાવો કરવામાં આવ્યો છે

X Money પોતે બેંક તરીકે કામ કરતું નથી. યુઝર્સની જમા રકમ ન્યૂ જર્સી સ્થિત રેગ્યુલેટેડ બેંક ‘ક્રોસ રિવર બેંક’ (Cross River Bank) માં રાખવામાં આવશે. આ બેંક ફેડરલ ડિપોઝિટ ઇન્સ્યોરન્સ કોર્પોરેશન (FDIC) ના દાયરામાં આવે છે, જે હેઠળ પાત્ર જમા રકમ પર પ્રતિ ડિપોઝિટર 2,50,000 ડોલર સુધીનો વીમો મળશે. X કેશ સ્વીપ પ્રોગ્રામ દ્વારા ગ્રાહકોની રકમને અનેક પાર્ટનર બેંકોમાં વહેંચે છે. ફાસ્ટ મની ટ્રાન્સફર માટે તેમાં વિઝા ડાયરેક્ટ ટેકનોલોજીનો ઉપયોગ કરવામાં આવ્યો છે, જેથી બેંક એકાઉન્ટ અને ડેબિટ કાર્ડ વચ્ચે ઝડપથી વ્યવહારો થઈ શકશે. સુરક્ષા માટે તેમાં પાસવર્ડની જગ્યાએ પાસકી (Passkey) નું સપોર્ટ આપવામાં આવ્યું છે, જેનાથી ફિંગરપ્રિન્ટ, ફેસ રિકગ્નિશન કે ડિવાઇસ પીન દ્વારા લોગિન કરી શકાશે. આ સિવાય ટ્રાન્ઝેક્શન લિમિટ અને પસંદગીના પેમેન્ટ્સ માટે વેરિફિકેશન જેવી સુવિધાઓ પણ આપવામાં આવી છે.