નવી દિલ્હી:ભારતના ચૂંટણી પંચ દ્વારા ઉત્તર પ્રદેશના પીલીભીત જિલ્લામાં મતદાર યાદીમાં આચરવામાં આવેલી ગેરરીતિઓ અને ગંભીર બેદરકારી સામે અત્યંત કડક અને લાલ આંખ કરતી કાર્યવાહી કરવામાં આવી છે. પંચે ૧૨૭-પીલીભીત વિધાનસભા મતવિસ્તારના બે ચૂંટણી નોંધણી અધિકારીઓ (EROs) મયંક ગોસ્વામી અને હેમંત ચૌધરીને તાત્કાલિક અસરથી સસ્પેન્ડ કરવાનો આદેશ આપ્યો છે. આ સાથે જ બે અધિકારીઓ અને વીઆરસી કમ્પ્યુટર ઓપરેટર અનિલ કુમાર સામે અગાઉથી દાખલ કરાયેલી એફઆઈઆરમાં ભારતીય ન્યાય સંહિતા (BNS), ૨૦૨૩ ની કલમ ૧૯૮ ઉમેરવા માટે પણ સખત નિર્દેશ આપવામાં આવ્યા છે.

ચૂંટણી પંચ દ્વારા ગત ૩૧ ઓક્ટોબરે ઉત્તર પ્રદેશના મુખ્ય ચૂંટણી અધિકારીને મોકલેલા પત્રમાં આ સ્પષ્ટ સૂચનાઓ જારી કરવામાં આવી છે. પંચે પીલીભીતના પાંચ સહાયક ચૂંટણી નોંધણી અધિકારીઓ (AEROs) ની આ સમગ્ર પ્રકરણમાં શંકાસ્પદ ભૂમિકા અંગે ત્રણ દિવસની અંદર વિગતવાર અહેવાલ રજૂ કરવા તાકીદ કરી છે. આ ઉપરાંત, જિલ્લાના તમામ ચારેય વિધાનસભા મતવિસ્તારો માટે મતદાર યાદીઓનું ઝીણવટભર્યું ઓડિટ કરવા અને એક અઠવાડિયામાં તેની રિપોર્ટ સુપરત કરવા માટે પણ આદેશ આપવામાં આવ્યો છે.

આ કેસમાં કમિશને સ્પષ્ટ કર્યું છે કે સસ્પેન્ડ કરાયેલા બંને અધિકારીઓ સામેની ચાર્જશીટ તપાસ માટે પંચને મોકલવી પડશે અને કમિશનની પૂર્વ મંજૂરી વગર તેમને ફરીથી હોદ્દા પર પુનઃસ્થાપિત કરી શકાશે નહીં. સાથે જ, કોર્ટમાં આ કેસોની સુનાવણી ખૂબ જ ગંભીરતાથી ચલાવવા નિર્દેશ અપાયો છે. પીલીભીતની આ ઘટના બાદ પંચે સમગ્ર ઉત્તર પ્રદેશના તમામ જિલ્લા ચૂંટણી અધિકારીઓને ફોર્મ ૬, ૭ અને ૮ દ્વારા થતી મતદાર નામ નોંધણી, કમી અને સુધારાના રેકોર્ડનું સંપૂર્ણ પુનઃપરીક્ષણ કરવાના આદેશો જારી કર્યા છે.

આગામી સમયમાં ચૂંટણી પંચ દ્વારા રાજ્યભરમાં મતદાર યાદીની પારદર્શિતા સુનિશ્ચિત કરવા માટે ઓનલાઈન પોર્ટલ અને ડેટા એન્ટ્રી ઓપરેટરોની કામગીરી પર બાજ નજર રાખવામાં આવશે. નિયમો વિરુદ્ધ કામ કરનારા કર્મચારીઓ અને અધિકારીઓ સામે કડક દાખલો બેસાડવા માટે આ કાર્યવાહીને એક મોટા પગલા તરીકે જોવામાં આવી રહી છે,