ગુવાહાટી : આસામ સરકારે ટકાઉ પરિવહન (Sustainable Transport) અને પર્યાવરણ સંરક્ષણની દિશામાં એક ક્રાંતિકારી પગલું ભરતાં સંપૂર્ણપણે વાંસથી બનેલી સાયકલ લોન્ચ કરી છે. શુક્રવારે આસામના મુખ્યમંત્રી હિમંતા બિસ્વા શર્માએ આ ખાસ 'આસામ બાંબો સાયકલ'નું અનાવરણ કર્યું હતું અને પોતે તેની સવારી કરીને સ્થાનિકોનું ધ્યાન ખેંચ્યું હતું. તેમણે જાહેરાત કરી હતી કે ગુવાહાટીના તમામ જાહેર ઉદ્યાનો અને પાર્કમાં આ સાયકલો ઉપલબ્ધ કરાવવામાં આવશે, જેથી સામાન્ય લોકો તેનો ઉપયોગ કરી શકે અને પોતાના પ્રતિસાદ આપી શકે.

₹૧૫ કરોડનો ડ્રીમ પ્રોજેક્ટ અને દર મહિને ૧,૦૦૦ સાયકલનું ઉત્પાદન

આ અનોખી સાયકલ પુણેની 'બાંબો ઈન્ડિયા' કંપનીના સહયોગથી ચાયગાંવ ખાતે આવેલા 'બાંબો ટેકનોલોજી પાર્ક'માં વિકસાવવામાં આવી છે. આ માટેનો કાચો માલ સમગ્ર આસામમાંથી એકત્રિત કરવામાં આવી રહ્યો છે. ૧૫ કરોડ રૂપિયાના આ પ્રોજેક્ટનો મુખ્ય લક્ષ્યાંક દર મહિને ૧,૦૦૦ વાંસ સાયકલોનું ઉત્પાદન કરવાનો છે. આ પ્લાન્ટ દ્વારા ૫૦ થી ૧૦૦ લોકોને પ્રત્યક્ષ રોજગારી મળશે, જ્યારે લણણીથી લઈને એસેમ્બલી સુધીની સમગ્ર પ્રોસેસથી ગ્રામીણ આજીવિકાને મોટો ટેકો મળશે.

BIS પ્રમાણપત્ર અને વાંસની અસીમ ક્ષમતા

મુખ્યમંત્રી સરમાએ જણાવ્યું હતું કે વાંસ એ આસામની કુદરતી સંપત્તિ છે, જેમાંથી ૮૦૦ થી વધુ ઉપ-ઉત્પાદનો બનાવી શકાય છે. મિથેનોલ અને વિમાનના એવિએશન ફ્યુઅલથી લઈને મજબૂત સ્ટ્રક્ચર બનાવવા સુધી વાંસ ઉપયોગી છે. કેન્દ્ર સરકારે વાંસને ઘાસની શ્રેણીમાં વર્ગીકૃત કર્યા બાદ આ ક્ષેત્રમાં તકોના નવા દ્વાર ખુલ્યા છે. આ સાયકલની ફ્રેમ સંપૂર્ણપણે વાંસની બનેલી છે અને તેને 'બ્યુરો ઓફ ઈન્ડિયન સ્ટાન્ડર્ડ્સ' (BIS) દ્વારા ગુણવત્તા અને મજબૂતાઈનું સત્તાવાર પ્રમાણપત્ર પણ મળેલું છે.

ગ્રીન ફ્યુચર તરફ મોટું પગલું

મુખ્યમંત્રીએ ઉમેર્યું હતું કે આ સાયકલ આસામની સમૃદ્ધ વાંસ સંસ્કૃતિને આધુનિક ટેકનોલોજી સાથે જોડે છે. શરુઆતમાં ગુવાહાટીમાં લોકોના ફીડબેક લીધા બાદ રાજ્યભરમાં તેનો વ્યાપ વધારવામાં આવશે. આ પહેલ પર્યાવરણ સુરક્ષા અને 'ગ્રીન ટ્રાન્સપોર્ટ' માટે આસામનું એક મોટું અને ગૌરવપૂર્ણ કદમ સાબિત થશે.