લંડન, : બ્રિટનના વડા પ્રધાન કીર સ્ટાર્મર સતત વધતા રાજકીય દબાણ અને પોતાની જ લેબર પાર્ટીમાં ઉઠેલા બળવાને પગલે સોમવારે રાજીનામું આપે તેવી પ્રબળ શક્યતાઓ સેવાઈ રહી છે. 'ધ ઓબ્ઝર્વર' ના અહેવાલ મુજબ, સરકારી કૌભાંડો અને જનતા સાથેના વચનો પૂરા કરવામાં નિષ્ફળતાના કારણે સ્ટાર્મરના નેતૃત્વ સામે ખતરો ઊભો થયો છે, જેના કારણે તેઓ તેમના નિવાસસ્થાન ચેકર્સ ખાતે ભવિષ્યના નિર્ણયો અંગે મંથન કરી રહ્યા છે.

છેલ્લા ઘણા મહિનાઓથી, લેબર પાર્ટીમાં વડા પ્રધાન સ્ટાર્મર સામે અસંતોષ વધી રહ્યો છે, જે શુક્રવારે જ્યારે તેમના સૌથી મોટા હરીફ, એન્ડી બર્નહામે પેટાચૂંટણીમાં સંસદીય બેઠક જીતી ત્યારે ચરમસીમાએ પહોંચ્યો હતો. આ જીતથી બર્નહામ માટે સ્ટાર્મર સામે નેતૃત્વ પડકારનો ઔપચારિક રીતે પ્રારંભ કરવાનો માર્ગ મોકળો થયો છે. અહેવાલો અનુસાર, સ્ટાર્મરે કેબિનેટ મંત્રીઓ, સલાહકારો, દાતાઓ અને ટ્રેડ યુનિયન નેતાઓ સાથે ચર્ચા કર્યા પછી, નિષ્કર્ષ કાઢ્યો કે વડા પ્રધાન તરીકેનું તેમનું પદ હવે ટકતું નથી.

૨૦૨૪ ની સામાન્ય ચૂંટણીમાં પ્રચંડ બહુમતી મેળવ્યા બાદ, સ્ટાર્મરની લોકપ્રિયતામાં મોટો ઘટાડો થયો છે અને ૧૦૦ થી વધુ લેબર સાંસદોએ જાહેરમાં તેમના રાજીનામાની માગ કરી છે. સંભવિત ઉત્તરાધિકારી તરીકે ૫૬ વર્ષીય એન્ડી બર્નહામનું નામ સૌથી આગળ છે, જેઓ ગ્રેટર માન્ચેસ્ટરના મેયર તરીકે મજબૂત પકડ ધરાવે છે. બર્નહામના આગમન સાથે નાણામંત્રી રશેલ રીવ્સના રાજીનામા કે ફેરબદલની પણ રાજકીય ગલિયારાઓમાં ભારે ચર્ચાઓ ચાલી રહી છે.

જો સ્ટારમર પદ છોડે છે, તો બ્રિટનને છેલ્લા એક દાયકામાં સાતમા વડા પ્રધાન મળશે, જે દેશના ઇતિહાસમાં સૌથી ઝડપી રાજકીય પરિવર્તન સાબિત થશે. હાલમાં દેશ ગેરકાયદેસર ઇમિગ્રેશન અને જાહેર સેવાઓના પતન જેવા ગંભીર મુદ્દાઓ સાથે ઝઝૂમી રહ્યો છે, ત્યારે નવું નેતૃત્વ કેવી રીતે આ આર્થિક અને વહીવટી પડકારોને પહોંચી વળશે, તેના પર સમગ્ર વિશ્વની નજર ટકેલી છે. આગામી સોમવાર બ્રિટિશ રાજકારણ માટે નિર્ણાયક સાબિત થશે.