મુંબઈ,તા.૯: આજે મહારાષ્ટ્રના મરાઠવાડા ક્ષેત્રના નાંદેડ, હિગોલી અને પરભણી જિલ્‍લામાં ભૂકંપ અનુભવાયો. ભૂકંપ બાદ લોકો ઘરોમાંથી બહાર દોડી આવ્‍યા. જોકે, હજુ સુધી કોઈ નુકસાન થયું નથી.

એક અધિકારીએ જણાવ્‍યું હતું કે ભૂકંપના આંચકા સવારે ૧:૩૭ થી ૩:૨૩ ની વચ્‍ચે અનુભવાયા હતા અને રિક્‍ટર સ્‍કેલ પર તેની તીવ્રતા ૩.૬ અને ૪.૬ ની વચ્‍ચે માપવામાં આવી હતી. એવું નોંધાયું છે કે બે કલાકથી ઓછા સમયમાં લગભગ ચાર ભૂકંપ આવ્‍યા હતા.

પ્રારંભિક અહેવાલો અનુસાર, પહેલો ભૂકંપ લગભગ ૧:૩૭ વાગ્‍યે આવ્‍યો હતો. સિરલી-પાંગરા શિદે ગામ નજીક આવેલા ભૂકંપથી લોકો જાગી ગયા હતા અને ગભરાટમાં બહાર દોડી ગયા હતા. ભૂકંપનું કેન્‍દ્ર જમીનથી આશરે ૧૦ કિલોમીટર નીચે હતું.

બીજો ભૂકંપ કાકરધાબા ગામ નજીક ૨:૧૫ વાગ્‍યે અનુભવાયો હતો. તેની તીવ્રતા ૩.૬ નોંધાઈ હતી. માત્ર બે મિનિટ પછી, ત્રીજો ભૂકંપ ૨:૧૭ વાગ્‍યે અને ચોથો ભૂકંપ ૩:૨૩ વાગ્‍યે અનુભવાયો હતો.

આ વર્ષે એપ્રિલની શરૂઆતમાં, હિગોલી વિસ્‍તારમાં ૪.૭ ની તીવ્રતાનો ભૂકંપ અનુભવાયો હતો. પાંગરા શિદે ગામમાં કેટલાક ઘરો અને કોમ્‍યુનિટી હોલમાં તિરાડો જોવા મળી હતી. નાંદેડ, અર્ધપુર, હડગાંવ, હિમાયતનગર અને પરભણી વિસ્‍તારોમાં પણ આંચકા અનુભવાયા હતા.