બેઇજિંગ, તા. ૨૪ : તિબેટમાં ગુરુવારે આવેલા શક્તિશાળી ભૂકંપ બાદ શનિવારે પણ ધરતીકંપના આંચકા નોંધાયા છે. અત્યાર સુધી ૧૬ લોકોનાં મોત થયાં છે અને ૭૬ ઘાયલ થયા છે. ૩૩૯ મકાનોને નુકસાન પહોંચ્યું છે અથવા ધરાશાયી થયાં છે.**

ચીનના તિબેટ વિસ્તારમાં સતત નોંધાઈ રહેલા ભૂકંપના આંચકાઓ વચ્ચે બચાવ અને રાહત કામગીરી ચાલી રહી છે. ગુરુવાર, તા. ૨૨ ઓક્ટોબરની રાત્રે નાગકુ શહેરના બાકેન જિલ્લામાં ૭.૦ની તીવ્રતાનો વિનાશક ભૂકંપ આવ્યો હતો. આ દુર્ઘટનામાં અત્યાર સુધી ૧૬ લોકોનાં મોત અને ૭૬ લોકોને ઈજા થયાની પુષ્ટિ થઈ છે.

ભારતના રાષ્ટ્રીય ભૂકંપવિજ્ઞાન કેન્દ્રના રેકોર્ડ મુજબ શનિવારે ભારતીય સમય પ્રમાણે રાત્રે ૧.૦૮ વાગ્યે ૪.૦ની તીવ્રતાનો ભૂકંપ આવ્યો હતો. ત્યારબાદ રાત્રે ૨.૦૭ વાગ્યે ૪.૬ અને વહેલી સવારે ૫.૩૮ વાગ્યે ૪.૫ની તીવ્રતાના આંચકા નોંધાયા હતા. આ ભૂકંપનાં કેન્દ્રો જમીનથી ૧૦થી ૧૫ કિલોમીટરની ઊંડાઈએ હતાં.

વિનાશક ભૂકંપને કારણે ૩૩૯ રહેણાક મકાનો તથા પશુઓ માટેના ૨૦ આશ્રયસ્થાનોને નુકસાન થયું છે. અસરગ્રસ્ત વિસ્તારોમાંથી ૧૨,૪૮૯ લોકોને સુરક્ષિત સ્થળે ખસેડવામાં આવ્યા છે.

ચીનના પ્રમુખ શી જિનપિંગે બચાવકાર્ય ઝડપી બનાવવા અને ઈજાગ્રસ્તોને સારવાર આપવાનો આદેશ આપ્યો છે. રાહત કામગીરીમાં પાંચ હજારથી વધુ કર્મચારીઓ જોડાયા છે.

તિબેટનો અસરગ્રસ્ત વિસ્તાર સમુદ્રસપાટીથી લગભગ ૪,૮૦૦ મીટરની ઊંચાઈએ હોવાથી કડકડતી ઠંડી, ઓક્સિજનની અછત અને દુર્ગમ રસ્તાઓ બચાવકાર્યમાં અવરોધ ઊભા કરી રહ્યા છે. વધુ આંચકાઓને કારણે નબળાં મકાનો ધરાશાયી થવાનું જોખમ પણ છે.