નવી દિલ્હી : સમગ્ર વિશ્વમાં તાપમાનમાં થઈ રહેલા અસાધારણ અને રેકોર્ડબ્રેક વધારા વચ્ચે વૈજ્ઞાનિકો અને આબોહવા નિષ્ણાતોએ ઓક્ટોબરથી ફેબ્રુઆરી ૨૦૨૭ સુધી અત્યંત શક્તિશાળી 'સુપર-ડુપર અલ નીનો' સક્રિય થવાની ગંભીર ચેતવણી આપી છે. પેસિફિક મહાસાગરની સપાટીનું તાપમાન સામાન્ય કરતાં ૩.૭ ડિગ્રી સેલ્સિયસ સુધી વધી જવાની આગાહીના કારણે વિશ્વના મોટાભાગના દેશોમાં ગરમી, દુષ્કાળ અને અનિયમિત ભયાનક વરસાદની કુદરતી આફતો આવવાની દહેશત વ્યક્ત કરવામાં આવી છે.

સંયુક્ત રાષ્ટ્ર (UN) ની હવામાન સંસ્થા 'વર્લ્ડ મેટિયોરોલોજિકલ ઓર્ગેનાઈઝેશન' (WMO) ના રિપોર્ટ અનુસાર, આ વર્ષે જોવા મળી રહેલી અલ નીનોની ઘટના ૧૯૫૦ પછીની સૌથી વિનાશક અને શક્તિશાળી ઘટનાઓમાંથી એક સાબિત થઈ શકે છે. પેસિફિક મહાસાગરમાં સંગ્રહાયેલી પ્રચંડ ગરમી બહાર ફેંકાવાના કારણે માનવ-પ્રેરિત ગ્લોબલ વોર્મિંગની અસર બમણી થઈ જશે. હવામાનશાસ્ત્રી રાયન માઉએ સોશિયલ મીડિયા પર સેટેલાઇટ મેપ શેર કરતા જણાવ્યું હતું કે વર્તમાન સ્થિતિ જોતાં આખી પૃથ્વી લાલચોળ તાપમાનના ઝોનમાં આવી ગઈ છે.

હવામાન વૈજ્ઞાનિક ઝીક હૌસફાધર અને લિયોન સિમોન્સે પેસિફિક મહાસાગરના તાપમાનમાં થયેલા અભૂતપૂર્વ વધારા પર ચિંતા વ્યક્ત કરતા જણાવ્યું છે કે નીનો3.4 પ્રદેશની વિસંગતતાઓ તમામ જૂના રેકોર્ડ તોડી ચૂકી છે. આ ક્રાંતિકારી હવામાન બદલાવ સામાન્ય ગરમીથી ઘણો આગળ વધીને એક મહા-આફતનું રૂપ ધારણ કરી રહ્યો છે. અમેરિકા સિવાય સમગ્ર વિશ્વમાં શિયાળા દરમિયાન પણ સરેરાશથી ઘણું વધારે તાપમાન નોંધાશે અને ગરમીનું પ્રમાણ તેની મહત્તમ ક્ષમતા પર રહેશે.

કુદરતી રીતે દર બે થી સાત વર્ષે સર્જાતી અલ નીનો ઘટના દરમિયાન મહાસાગરો ગરમ થાય છે જેનાથી વૈશ્વિક હવામાનની સમગ્ર પેટર્ન ખોરવાઈ જાય છે. આ પરિસ્થિતિને કારણે વિશ્વના કેટલાક ભાગોમાં લાંબા ગાળાનો વિનાશક દુષ્કાળ પડી શકે છે, જ્યારે અન્ય નીચાણવાળા વિસ્તારોમાં અસામાન્ય ભારે વરસાદ અને વાવાઝોડાની સ્થિતિ સર્જાઈ શકે છે. આબોહવા પરિવર્તનના નિષ્ણાતો આ ગંભીર બદલાવ પર સતત નિરીક્ષણ રાખી રહ્યા છે.

આ અસાધારણ આબોહવાકીય ફેરફારના માનવજીવન પર પડનારા ગંભીર પરિણામો અંગે શિકાગો યુનિવર્સિટીની 'ક્લાઇમેટ ઇમ્પેક્ટ લેબ' દ્વારા એક ચોંકાવનારો અભ્યાસ જાહેર કરવામાં આવ્યો છે. સંશોધકોના મતે, આ 'સુપર અલ નીનો'ના લીધે જૂન ૨૦૨૬થી ફેબ્રુઆરી ૨૦૨૭ વચ્ચે વિશ્વભરમાં અતિશય ગરમી, લૂ અને કુદરતી હોનારતોને કારણે અંદાજે ૪.૫૧ લાખથી વધુ લોકો પોતાના જીવ ગુમાવી શકે છે.

વિશ્વભરની પર્યાવરણીય એજન્સીઓ અને આંતરરાષ્ટ્રીય સંગઠનોએ તમામ દેશોની સરકારોને આપત્તિ વ્યવસ્થાપન અગાઉથી મજબૂત કરવા સૂચના આપી છે. ફેબ્રુઆરી ૨૦૨૭ સુધી સક્રિય રહેનારા આ આબોહવાકીય સંકટ સામે રક્ષણ મેળવવા માટે ખાદ્ય સુરક્ષા, જળ વ્યવસ્થાપન અને આરોગ્ય સેવાઓને એલર્ટ મોડ પર રાખવાની કામગીરી તાકીદે શરૂ કરી દેવામાં આવી છે.