ફરીદાબાદ તા.૩૦ હરિયાણા સરકારે ફરીદાબાદના NIT ઝોનમાં આજે 30 મેના રોજ થનારી તોડફોડની કાર્યવાહીને ધ્યાનમાં રાખીને સાવચેતીના ભાગરૂપે મોબાઇલ ઇન્ટરનેટ સેવાઓને અસ્થાયી રૂપે બંધ કરવાનો આદેશ જારી કર્યો છે. ગૃહ વિભાગ દ્વારા જારી કરાયેલા આદેશમાં જણાવાયું છે કે આ પગલું અફવાઓ, ભ્રામક સમાચારો અને સોશિયલ મીડિયા પર ભડકાઉ સામગ્રીના પ્રસારને રોકવા માટે લેવામાં આવ્યું છે.

વહીવટી તંત્ર દ્વારા NIT ફરીદાબાદ વિસ્તારમાં ગેરકાયદેસર બાંધકામો, મસ્જિદો અને મંદિરો વિરુદ્ધ તોડફોડની કાર્યવાહી હાથ ધરવાની છે. આ કાર્યવાહી દરમિયાન કોઈપણ પ્રકારની અપ્રિય ઘટના, સાંપ્રદાયિક તણાવ અથવા ભીડ એકઠી થવાની આશંકાને ધ્યાનમાં રાખીને સરકારે આ સાવચેતીનું પગલું ભર્યું છે. જિલ્લા વહીવટી તંત્રને આશંકા છે કે કેટલાક અસામાજિક તત્વો વોટ્સએપ, ફેસબુક, એક્સ અને ઇન્સ્ટાગ્રામ જેવા સોશિયલ મીડિયા પ્લેટફોર્મ દ્વારા ભડકાઉ વીડિયો અને મેસેજ વાયરલ કરીને માહોલ બગાડી શકે છે.

ગૃહ વિભાગના આદેશ મુજબ, ફરીદાબાદના NIT ઝોનમાં મોબાઇલ ઇન્ટરનેટ 2G/3G/4G/5G, ડોંગલ સેવાઓ વગેરે અસ્થાયી રૂપે નિલંબિત રહેશે. જોકે, આ દરમિયાન વોઈસ કોલ, SMS અને લેન્ડલાઈનની સેવાઓ સામાન્ય રીતે ચાલુ રહેશે. સાથે જ બ્રોડબેન્ડ અને લીઝ લાઈન ઈન્ટરનેટ સેવાઓ પર આ આદેશની કોઈ અસર થશે નહીં, જેથી બેંકિંગ, હોસ્પિટલ અને અન્ય જરૂરી સેવાઓ પ્રભાવિત ન થાય

તોડફોડની કાર્યવાહી દરમિયાન NIT ઝોનમાં મોટી સંખ્યામાં પોલીસ દળ તૈનાત કરવામાં આવ્યું છે. સમગ્ર વિસ્તારમાં કલમ 144 લાગુ કરી દેવામાં આવી છે. ડ્રોન કેમેરાથી પણ નજર રાખવામાં આવી રહી છે. વહીવટી તંત્રે લોકોને અપીલ કરી છે કે તેઓ કોઈપણ પ્રકારની અફવા પર ધ્યાન ન આપે અને શાંતિ વ્યવસ્થા જાળવવામાં સહયોગ કરે.

નોંધનીય છે કે આ પહેલા પણ સંવેદનશીલ પ્રસંગોએ હરિયાણા સરકાર દ્વારા કાયદો અને વ્યવસ્થા જાળવવા માટે ઇન્ટરનેટ બંધ કરવાના આદેશો જારી કરવામાં આવતા રહ્યા છે.