ડ્રાઈવિંગ લાયસન્સની ઘણીવાર લોકો વેલિડિટી ચેક કરવાનું ભૂલી જાય છે, જે પાછળથી મોટી મુસીબતનું કારણ બની શકે છે. મોટર વાહન અધિનિયમ મુજબ, એક્સપાયર થયેલા લાયસન્સ સાથે વાહન ચલાવવું એ ગંભીર ગુનો છે અને તેનાથી તમારું લાયસન્સ કાયમી ધોરણે રદ પણ થઈ શકે છે.

સામાન્ય રીતે, ડ્રાઈવિંગ લાયસન્સ વ્યક્તિની 20 કે 40 વર્ષની વય સુધી માન્ય રહે છે. જો કે, વય વધવાની સાથે તેના નિયમોમાં ફેરફાર થાય છે:

50 વર્ષની વય બાદ: લાયસન્સની માન્યતા ઘટીને માત્ર 5 વર્ષની રહી જાય છે. એટલે કે, દર 5 વર્ષે તમારે તેને રિન્યૂ કરાવવું પડે છે.

ગ્રેસ પીરિયડ (સવલતનો સમય): જો તમારું લાયસન્સ એક્સપાયર થઈ જાય, તો સરકાર 30 દિવસનો વધારાનો સમય આપે છે. આ એક મહિના દરમિયાન તમે કોઈપણ વધારાની પેનલ્ટી વગર લાયસન્સ રિન્યૂ કરાવી શકો છો.

જો તમે સમય મર્યાદા પૂરી થયા પછી પણ લાયસન્સ રિન્યૂ નથી કરાવતા, તો નીચે મુજબની મુશ્કેલીઓ નડી શકે છે:

ભારે દંડ: ટ્રાફિક પોલીસ દ્વારા પકડાયા પર તમારે મોટો દંડ ભરવો પડી શકે છે.

લાયસન્સ રદ: લાંબા સમય સુધી રિન્યૂ ન કરાવેલ લાયસન્સ આરટીઓ (RTO) દ્વારા રદ કરવામાં આવી શકે છે.

ફરીથી ટેસ્ટ: જો લાયસન્સ રદ થાય, તો તમારે નવા લાયસન્સ માટે ફરીથી ડ્રાઈવિંગ ટેસ્ટ આપવાની પ્રક્રિયામાંથી પસાર થવું પડશે.

હવે લાયસન્સ રિન્યૂ કરાવવા માટે આરટીઓના ધક્કા ખાવાની જરૂર નથી. તમે માર્ગ પરિવહન મંત્રાલયની સત્તાવાર વેબસાઇટ દ્વારા આ કામ કરી શકો છો.

• સૌ પ્રથમ 'પરિવહન સેવા' ની વેબસાઇટ પર જાઓ.
• ત્યાં 'Driving License Related Services' વિકલ્પ પસંદ કરો.
• તમારું રાજ્ય પસંદ કર્યા બાદ 'Apply for DL Renewal' પર ક્લિક કરો.
• તમારો લાયસન્સ નંબર અને જન્મ તારીખ દાખલ કરવાથી તમારી બધી વિગતો સ્ક્રીન પર દેખાશે.
• જરૂરી દસ્તાવેજો અપલોડ કરી ઓનલાઇન ફી ભરો અને રસીદ ડાઉનલોડ કરી લો.

રિન્યુઅલ માટે અરજી કરતી વખતે નીચેના ડોક્યુમેન્ટ્સ તૈયાર રાખવા -

• જૂનું (એક્સપાયર થયેલું) ડ્રાઈવિંગ લાયસન્સ.
• ઓળખનો પુરાવો અને રહેઠાણનો પુરાવો (જેમ કે આધાર કાર્ડ અથવા અન્ય માન્ય આઈડી).
• પાસપોર્ટ સાઈઝના ફોટા અને ડિજિટલ સહી.
• મેડિકલ સર્ટિફિકેટ: જો તમારી ઉંમર 40 વર્ષથી વધુ હોય, તો તમારે 'ફોર્મ 1-એ' (Medical Certificate) જમા કરાવવું ફરજિયાત છે.