વોશિંગ્ટન: અમેરિકા અને ઈરાન વચ્ચે  રહેલા યુદ્ધ વચ્ચે પ્રમુખ ડોનાલ્ડ ટ્રમ્પે અમેરિકન મીડિયા અને ડેમોક્રેટ્સ પર આકરા પ્રહારો કર્યા છે. ટ્રમ્પે જણાવ્યું છે કે અમેરિકન સૈન્યએ ઈરાનની નૌકાદળને દરિયામાં ડુબાડી દીધી છે અને હવાઈ દળનો સંપૂર્ણ નાશ કર્યો છે. જો ઈરાન સફેદ ઝંડો લહેરાવીને સંપૂર્ણ હાર સ્વીકારી લે અને તમામ નેતાઓ શરણાગતિના દસ્તાવેજો પર સહી કરી દે, તો પણ કેટલાક ભ્રષ્ટ મીડિયા હાઉસો અને વિરોધીઓ આ ઘટનાને અમેરિકાની હાર અને ઈરાનની ઐતિહાસિક જીત ગણાવશે. હાલમાં અમેરિકા અને ઈરાન વચ્ચે ભીષણ સંઘર્ષ ચાલુ છે અને અમેરિકન સૈન્યએ ઈરાનના મોટાભાગના લશ્કરી અને નૌકા મથકોને નિશાન બનાવીને તબાહી મચાવી હોવાનો દાવો કર્યો છે.

અમેરિકા અને ઈરાન વચ્ચે ચાલી રહેલા યુદ્ધ દરમિયાન અમેરિકન પ્રમુખ ડોનાલ્ડ ટ્રમ્પે અમેરિકાના ન્યૂઝ મીડિયા અને રાજકીય વિરોધીઓ પર સીધો શાબ્દિક હુમલો કર્યો છે. તાજેતરમાં જારી કરાયેલા એક નિવેદનમાં પ્રમુખ ટ્રમ્પે મીડિયાની વિશ્વસનીયતા પર સવાલ ઉઠાવતા જણાવ્યું હતું કે જો ઈરાન સંપૂર્ણપણે હાર માની લે તો પણ મીડિયા તેને અમેરિકાની હાર તરીકે જ ખપાવશે.

ટ્રમ્પે પોતાના સત્તાવાર નિવેદનમાં આકરા શબ્દોનો ઉપયોગ કરતા કહ્યું હતું કે, જો ઈરાન શરણાગતિ સ્વીકારે અને કબૂલ કરે કે તેમની નૌકાદળ ખતમ થઈ ગઈ છે તથા દરિયાના તળિયે પહોંચી ગઈ છે, અને તેમની હવાઈ દળ હવે હયાત નથી. જો તેમનું આખું સૈન્ય હથિયારો નીચે મૂકીને અને હાથ ઊંચા કરીને તેહરાનમાંથી બહાર આવે, અને સફેદ ઝંડો લહેરાવતા સતત એવી બૂમો પાડે કે અમે શરણાગતિ સ્વીકારીએ છીએ, તેમજ જો તેમના તમામ નેતાઓ શરણાગતિના તમામ જરૂરી દસ્તાવેજો પર સહી કરીને મહાન અમેરિકાની તાકાત સામે પોતાની હાર કબૂલી લે, તો પણ અમેરિકન મીડિયા સાચું રિપોર્ટિંગ નહીં કરે.

પ્રમુખે કેટલીક જાણીતી મીડિયા સંસ્થાઓના નામ જોગ પ્રહાર કરતા જણાવ્યું હતું કે નિષ્ફળ જઈ રહેલું ન્યૂયોર્ક ટાઇમ્સ, ધ ચાઇના સ્ટ્રીટ જર્નલ, ભ્રષ્ટ અને હવે સાવ અપ્રસ્તુત બની ગયેલું સીએનએન તથા ફેક ન્યૂઝ મીડિયાના અન્ય તમામ સભ્યો એવી જ હેડલાઇન બનાવશે કે ઈરાને અમેરિકા સામે અત્યંત શાનદાર અને જંગી જીત મેળવી છે. તેમણે વધુમાં ઉમેર્યું હતું કે ડેમોક્રેટ્સ અને મીડિયા પોતાનો રસ્તો સંપૂર્ણપણે ભટકી ગયા છે અને તેઓ બિલકુલ પાગલ થઈ ગયા છે.

ડિજિટલ મીડિયા અને આંતરરાષ્ટ્રીય અખબારોના સત્તાવાર અહેવાલો અનુસાર, હાલમાં અમેરિકન અને ઈરાની દળો વચ્ચે હોર્મુઝની સામુદ્રધુની અને અન્ય વિસ્તારોમાં ભારે ઘર્ષણ ચાલી રહ્યું છે. અમેરિકન લશ્કરી કાર્યવાહીમાં ઈરાનની મિસાઈલ અને ડ્રોન ક્ષમતાઓને ભારે નુકસાન પહોંચાડવામાં આવ્યું છે. અમેરિકન દળોએ ઈરાનના મોટાભાગના નૌકા જહાજોને ડુબાડી દીધા હોવાનો દાવો કર્યો છે. આ ઉપરાંત, પ્રમુખ ટ્રમ્પે અગાઉ ઈરાનના ખાર્ગ આઇલેન્ડનો નાશ કરવાની ચેતવણી પણ આપી હતી, જ્યાંથી ઈરાન તેના ક્રૂડ ઓઇલની ૯૦ ટકા નિકાસ કરે છે.

બીજી તરફ, ઈરાનની સંસદની રાષ્ટ્રીય સુરક્ષા સમિતિના અધ્યક્ષ એબ્રાહિમ અઝીઝીએ સ્પષ્ટ કર્યું છે કે તેઓ અમેરિકા સાથે કોઈ પણ પ્રકારની વાટાઘાટો કરવા માંગતા નથી. સત્તાવાર આંકડાઓ દર્શાવે છે કે ઈરાન પાસે હાલમાં ૬૦ ટકા સુધીની શુદ્ધતા ધરાવતું આશરે ૪૪૦ કિલોગ્રામ યુરેનિયમ ઉપલબ્ધ છે. આવી પરિસ્થિતિમાં પ્રમુખ ટ્રમ્પનું આ નિવેદન દર્શાવે છે કે તેઓ યુદ્ધના મેદાનની સાથે સાથે દેશની અંદર પણ મીડિયા અને રાજકીય વિરોધીઓ સામે મોરચો માંડીને બેઠા છે.