​વોશિંગ્ટન:વિશ્વના બે સૌથી શક્તિશાળી દેશો અમેરિકા અને ચીન વચ્ચે ચાલતી રાજદ્વારી ખેંચતાણ વચ્ચે એક અત્યંત મહત્વપૂર્ણ અને ચોંકાવનારા સમાચાર સામે આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પે વર્ષો જૂની અમેરિકી રાજદ્વારી પ્રોટોકોલની પરંપરાઓને બાજુ પર મૂકીને એક નવો ઇતિહાસ રચવાનો નિર્ણય લીધો છે. મળતી વિગતો અનુસાર, ચીનના રાષ્ટ્રપતિ શી જિનપિંગ જ્યારે અમેરિકાની મુલાકાતે પહોંચશે, ત્યારે તેમનું એરપોર્ટ પર ઉષ્માભર્યું સ્વાગત કરવા માટે રાષ્ટ્રપતિ ટ્રમ્પ પોતે એન્ડ્રુઝ એરફોર્સ બેઝ (Andrews Air Force Base) ખાતે હાજર રહેશે.

​સામાન્ય રીતે અમેરિકી પરંપરા મુજબ, વિદેશી રાષ્ટ્રાધ્યક્ષો જ્યારે અમેરિકી ધરતી પર પગ મૂકે છે ત્યારે તેમનું એરપોર્ટ પર સ્વાગત કરવા માટે ચીફ ઓફ પ્રોટોકોલ અથવા વિદેશ મંત્રાલયના વરિષ્ઠ અધિકારીઓ જાય છે, અને વાસ્તવિક સત્તાવાર મુલાકાત તથા સ્વાગત સમારોહ વ્હાઇટ હાઉસ ખાતે યોજાતો હોય છે. પરંતુ ડોનાલ્ડ ટ્રમ્પ આ પ્રથા તોડીને એરપોર્ટ પર જઈને ચીની પ્રમુખની આગેવાની કરનારા પ્રથમ અમેરિકી રાષ્ટ્રપતિ બનશે.

​આ રાજદ્વારી પહલ પાછળ વૈશ્વિક સ્તરે અનેક અટકળો સેવાઈ રહી છે. છેલ્લા કેટલાક સમયથી બંને દેશો વચ્ચે ટ્રેડ વોર, આર્થિક નીતિઓ અને જીઓ-પોલિટિક્સને લઈને ભારે કડવાશ જોવા મળી રહી છે. આ પરિસ્થિતિ વચ્ચે ટ્રમ્પનો આ નિર્ણય દર્શાવે છે કે તેઓ ચીન સાથેના દ્વિપક્ષીય સંબંધોને સુધારવા અને વ્યક્તિગત સ્તરે આદાન-પ્રદાન વધારવા માટે આતુર છે.

​વૈશ્વિક વિશ્લેષકોના મતે, વ્હાઇટ હાઉસના આ અભૂતપૂર્વ કદમથી શી જિનપિંગની આ મુલાકાત વધુ હાઇ-પ્રોફાઇલ અને મહત્વપૂર્ણ બની ગઈ છે. બંને દેશોના ટોચના નેતાઓ વચ્ચે યોજાનારી આ બેઠક પર સમગ્ર વિશ્વની નજર ટકેલી છે, કારણ કે આ મુલાકાત દરમિયાન લેવાનારા નિર્ણયો વૈશ્વિક અર્થતંત્ર અને રાજકારણની ભવિષ્યની દિશા નક્કી કરવામાં મહત્વનો ભાગ ભજવશે.