નવી દિલ્હી, તા.૨૩: રાજધાની દિલ્હીના કાલકાજી વિસ્તારમાં આવેલા અષ્ટ કુંજ (આસ્થા કુંજ) પાર્કમાં ૧૭ વર્ષની સગીર છોકરી પર થયેલા ભયાનક સામૂહિક દુષ્કર્મની ઘટના બાદ દિલ્હીનું તંત્ર હરકતમાં આવ્યું છે. દિલ્હીના લેફ્ટનન્ટ ગવર્નર (LG) તરનજીત સિંહ સંધુએ મહિલાઓ અને નાગરિકોની સુરક્ષાને ધ્યાનમાં રાખીને એક મોટો અને કડક નિર્ણય લીધો છે. તેમણે દિલ્હીના તમામ જાહેર ઉદ્યાનોનું ૧ અઠવાડિયાની અંદર વ્યાપક 'સેફ્ટી ઓડિટ' (સુરક્ષા ચકાસણી) પૂર્ણ કરવાનો અને પાર્કની આસપાસ 'પિંક પોલીસ' તૈનાત કરવાનો સખત આદેશ આપ્યો છે.

 

રાજભવન ખાતે ઉચ્ચ સ્તરીય સમીક્ષા બેઠક

ઘટનાની ગંભીરતાને ધ્યાનમાં રાખીને ઉપરાજ્યપાલ તરનજીત સિંહ સંધુએ રાજભવન ખાતે દિલ્હી પોલીસ કમિશનર, MCD કમિશનર અને DDA (દિલ્હી ડેવલપમેન્ટ ઓથોરિટી) ના વાઇસ ચેરમેન સાથે તાકીદની બેઠક યોજી હતી. આ બેઠકમાં LG એ સ્પષ્ટ નિર્દેશ આપ્યો હતો કે દિલ્હીના દરેક નાના-મોટા પાર્કની સુરક્ષા વ્યવસ્થાની સમીક્ષા કરવામાં આવે અને ૧ અઠવાડિયામાં આ અંગેનો વિસ્તૃત રિપોર્ટ સુપરત કરવામાં આવે.

 

સેફ્ટી ઓડિટમાં કઈ બાબતો પર ધ્યાન અપાશે?

1. પર્યાપ્ત લાઈટિંગ: સૂર્યાસ્ત પછી પાર્કના તમામ વિસ્તારોમાં યોગ્ય લાઈટિંગની વ્યવસ્થા સુનિશ્ચિત કરવી.

 

2. પ્રવેશ અને નિકાસ પર સુરક્ષા: પાર્કના તમામ એન્ટ્રી અને એક્ઝિટ પોઈન્ટ પર સુરક્ષા ગાર્ડ્સની હાજરી ફરજિયાત કરવી.

 

3. રાત્રિ પેટ્રોલિંગ: ગાર્ડ્સ અને સ્થાનિક બીટ કોન્સ્ટેબલ દ્વારા સૂર્યાસ્ત પછી નિયમિત પેટ્રોલિંગ હાથ ધરવું.

 

4. પિંક પોલીસ તૈનાતી: મહિલાઓની સુરક્ષા માટે ખાસ ‘પિંક પોલીસ’ કર્મચારીઓ અને બીટ વાનની તૈનાતી વધારવી.

 

5. સ્વચ્છતા અને જાળવણી: પાર્કમાં ઝાડી-ઝાંખરા અને અંધારા વાળા ખૂણાઓની સફાઈ કરવી.

 

સ્થાનિક સંસ્થાઓ અને RWA ની લેવાશે મદદ

અધિકારીઓએ જણાવ્યું હતું કે ઓડિટ દરમિયાન પાર્કની નજીક આવેલી શાળાઓ, કોલેજો અને સ્થાનિક રહેવાસી કલ્યાણ મંડળો (RWA) સાથે સંવાદ સાધીને તેમનો પ્રતિસાદ લેવામાં આવશે. વધુમાં, પાર્કની જાળવણી અને સુરક્ષા સુધારવા માટે તેને RWA અથવા ખાનગી સંસ્થાઓને સોંપવાની શક્યતાઓ પણ ચકાસવામાં આવશે.

 

ઉલ્લેખનીય છે કે કાલકાજી મંદિર નજીક આસ્થા કુંજ પાર્કમાં સગીરા પર સામૂહિક દુષ્કર્મ આચરનારા ત્રણેય આરોપીઓની દિલ્હી પોલીસે મંગળવારે ધરપકડ કરી લીધી હતી, જેમાં પોલીસ સાથેના એન્કાઉન્ટરમાં એક આરોપી પગમાં ગોળી વાગવાથી ઘાયલ થયો હતો.