ન્યૂયોર્ક : સંયુક્ત રાષ્ટ્ર મહાસભા (UNGA) ના ૮૧મા સત્ર દરમિયાન ન્યૂયોર્ક ખાતે ભારતના વિદેશ મંત્રી ડૉ. એસ. જયશંકરે પોતાની આક્રમક અને પ્રભાવશાળી રાજદ્વારી (Diplomatic) પ્રવૃત્તિઓથી વૈશ્વિક મંચ પર ભારતનો દબદબો ફરી એકવાર સાબિત કર્યો છે. ભારતીય પ્રતિનિધિમંડળનું નેતૃત્વ કરી રહેલા જયશંકરે ન્યૂયોર્ક પહોંચતાની સાથે જ વિશ્વના વિવિધ દેશોના વિદેશ મંત્રીઓ સાથે બેક-ટુ-બેક દ્વિપક્ષીય બેઠકોનો દોર શરૂ કર્યો હતો, જેમાં યુક્રેન સંઘર્ષ, વૈશ્વિક આર્થિક સહયોગ અને સંયુક્ત રાષ્ટ્ર સુરક્ષા પરિષદમાં સુધારા જેવા મહત્વપૂર્ણ મુદ્દાઓ છવાયેલા રહ્યા હતા.

જયશંકરે ફ્રાન્સના વિદેશ મંત્રી જીન-નોએલ બેરોટ સાથે મુલાકાત કરીને ભારત-ફ્રાન્સ 'વિશેષ વૈશ્વિક વ્યૂહાત્મક ભાગીદારી'ની સમીક્ષા કરી હતી. ત્યારબાદ તેમણે યુક્રેનના વિદેશ મંત્રી એન્ડ્રી સિબિહા સાથે ખાસ બેઠક યોજી હતી. આ બેઠકમાં યુક્રેન સંઘર્ષના ઉકેલ, કાળો સમુદ્ર (Black Sea) માં નૌકાવ્યવહારની સ્વતંત્રતા અને વૈશ્વિક ખાદ્ય સુરક્ષા જેવા સંવેદનશીલ મુદ્દાઓ પર ગંભીર ચર્ચા થઈ હતી. યુક્રેને વિજ્ઞાન, શિક્ષણ, આઈટી અને ફાર્માસ્યુટિકલ્સ ક્ષેત્રે ભારત સાથે ભાગીદારી વધારવાની ભારે ઉત્સુકતા દર્શાવી હતી.

વેપારી સંબંધો અને મજબૂત બહુપક્ષીયતા પર ભાર

યુક્રેન ઉપરાંત જયશંકરે સ્વિટ્ઝર્લેન્ડ, મોલ્ડોવા, ઇક્વાડોર, સ્લોવાકિયા અને હંગેરીના વિદેશ મંત્રીઓ સાથે પણ દ્વિપક્ષીય વાટાઘાટો કરી હતી. સ્વિસ વિદેશ મંત્રી ઇગ્નાઝિયો કેસિસ સાથેની બેઠકમાં ભારત-EFTA વેપાર કરારના અમલીકરણ અને આર્થિક સંબંધોને નવી ઊંચાઈએ લઈ જવા અંગે ચર્ચા થઈ હતી. હંગેરીના વિદેશ મંત્રી અનિતા ઓર્બન સાથેની પ્રથમ મુલાકાતમાં બંને દેશો વ્યૂહાત્મક ભાગીદારી આગળ ધપાવવા સંમત થયા હતા.

બાદમાં, જયશંકરે યુરોપિયન કાઉન્સિલના પ્રમુખ એન્ટોનિયો કોસ્ટા સાથે મજબૂત બહુપક્ષીયતા અને આંતરરાષ્ટ્રીય કાયદાના પાલન અંગેની મહત્વપૂર્ણ સમિટનું સહ-અધ્યક્ષતાપદ પણ સંભાળ્યું હતું. તેમણે વૈશ્વિક સપ્લાય ચેઈનને સુરક્ષિત કરવા અને પ્રભુત્વવાદી નીતિઓ સામે રિસ્ક ઘટાડવા પર ભાર મૂક્યો હતો. વિદેશ મંત્રી આગામી ૨૬ સપ્ટેમ્બરે સંયુક્ત રાષ્ટ્ર મહાસભાને સંબોધિત કરશે, જેના પર સમગ્ર વિશ્વની નજર ટકેલી છે.