નવી દિલ્‍હી, તા.૮: દેશની રાજધાની દિલ્‍હી ખાતે આયોજિત ઇન્‍ડિયા મોબાઇલ કોંગ્રેસના ૧૦મા ભવ્‍ય સંસ્‍કરણમાં પ્રધાનમંત્રી નરેન્‍દ્ર મોદીએ ડિજિટલ ટેકનોલોજી, સરકારી યોજનાઓ અને ભ્રષ્ટાચાર વિરુદ્ધ સરકારની મક્કમ નીતિઓ અંગે મહત્‍વના વિચારો રજૂ કર્યા હતા. આ પ્રસંગે કેન્‍દ્રીય સંચાર મંત્રી જ્‍યોતિરાદિત્‍ય સિંધિયા સહિત દેશ-વિદેશના અનેક ઉદ્યોગપતિઓ અને ટેકનોલોજી ક્ષેત્રના દિગ્‍ગજો ઉપસ્‍થિત રહ્યા હતા. પીએમ મોદીએ જણાવ્‍યું હતું કે છેલ્લા એક દાયકામાં મોબાઇલ ફોનની ભૂમિકામાં આમૂલ પરિવર્તન આવ્‍યું છે અને હવે તે જનતા માટે સુશાસનનું મુખ્‍ય દ્વાર બની ગયું છે.

સરકારી સહાય સીધી લાભાર્થીઓના બેંક ખાતામાં જમા કરાવવાની ડાયરેક્‍ટ બેનિફિટ ટ્રાન્‍સફર યોજનાનો ઉલ્લેખ કરતા પ્રધાનમંત્રીએ જણાવ્‍યું હતું કે આ ડિજિટલ પ્રણાલી દ્વારા અત્‍યાર સુધીમાં અંદાજે રૂ.૫૦ લાખ કરોડ સીધા જરૂરિયાતમંદોના ખાતામાં પહોંચાડવામાં આવ્‍યા છે. આ પારદર્શક વ્‍યવસ્‍થાના કારણે સિસ્‍ટમમાં રહેલા લીકેજ અટકયા છે અને સરકારી તિજોરીના આશરે રૂ.૫ લાખ કરોડ ખોટા હાથમાં જતા બચી ગયા છે. આ ક્રાંતિકારી બદલાવનો ઉલ્લેખ કરતા પીએમએ હસીને સવાલ કર્યો હતો કે, શું જે લોકોએ પોતાના મફત ભેટો અથવા ગેરકાયદેસર ફાયદા ગુમાવ્‍યા છે, તેઓ આના કારણે મોદીને પ્રેમ કરશે? આ કાર્યક્રમમાં પ્રધાનમંત્રીએ માત્ર સરકારી યોજનાઓ જ નહીં પરંતુ ડિજિટલ સુરક્ષા, સાયબર છેતરપિંડી અને ડીપફેક  જેવી આધુનિક ટેકનોલોજીથી ઊભા થતા ગંભીર પડકારો વિશે પણ ઊંડી ચિંતા વ્‍યક્‍ત કરી હતી. તેમણે ભારપૂર્વક જણાવ્‍યું કે ગ્‍લોબલ ડિજિટલ વર્લ્‍ડમાં સુરક્ષા માટે તમામ દેશોએ સાથે મળીને મજબૂત વૈશ્વિક માળખું બનાવવાની જરૂર છે. આ ઉપરાંત, ભારતના ગેમિંગ ઇકોસિસ્‍ટમ પર વાત કરતા તેમણે ખુશી વ્‍યક્‍ત કરી હતી કે આજે દેશના ૫૦ કરોડથી વધુ લોકો ગેમિંગ સાથે જોડાયેલા છે, જેમાં નાના શહેરો અને કસ્‍બાઓના યુવાનો અગ્રેસર ભૂમિકા ભજવી રહ્યા છે.