​હૈદરાબાદ: તેલંગાણાની રાજધાની હૈદરાબાદના દિલસુખનગર બસ ડેપો નજીક આવેલા પ્રસિદ્ધ સંતોષી માતાના મંદિરમાં એક અત્યંત ચકચારમચાવનારી ઘટના સામે આવી છે. મંદિરમાં નિત્યક્રમ મુજબ ધાર્મિક પૂજા અને આરતી ચાલી રહી હતી તે સમયે અચાનક એક શખ્સ હાથમાં વૃક્ષની લાકડીઓ અને ડાળીઓ લઈને ગર્ભગૃહમાં ધસી આવ્યો હતો. આ શખ્સે મંદિરના પૂજારી પર હુમલો કરી, ગર્ભગૃહમાં સ્થાપિત દેવી સંતોષી માતાની પવિત્ર મૂર્તિ તરફ લાકડીઓ ફેંકી મૂર્તિને ખંડિત કરવાનો અને નુકસાન પહોંચાડવાનો પ્રયાસ કર્યો હતો.

​આ અણધારી ઘટનાને પગલે મંદિરમાં હાજર ભક્તો અને શ્રદ્ધાળુઓમાં ભારે અફડાતફડી મચી ગઈ હતી. જોકે, ઘટનાસ્થળે હાજર લોકોએ તુરંત જ તત્પરતા દાખવીને હુમલાખોરને સ્થળ પર જ ઘેરી લીધો હતો. રોષે ભરાયેલા લોકોએ તેને પકડી પાડીને કાબૂમાં લીધો હતો અને બાદમાં બનાવ અંગે સ્થળ પર પહોંચેલી સ્થાનિક પોલીસને સોંપી દીધો હતો.

​પોલીસ તપાસમાં પકડાયેલા આરોપીની ઓળખ મોહમ્મદ અંસારી તરીકે થઈ છે. સ્થાનિક પોલીસે આરોપીને કસ્ટડીમાં લઈને તેની સામે કાયદેસરની કાર્યવાહી હાથ ધરી છે. પ્રારંભિક પૂછપરછ અને તપાસ દરમિયાન એવું જાણવા મળ્યું છે કે આરોપી માનસિક અસ્થિરતા ધરાવે છે અને તેની સારવાર ચાલી રહી છે.

​દરમિયાન, મંદિર પરિસરમાં લગાવેલા સીસીટીવી (CCTV) કેમેરામાં આ આખી આઘાતજનક ઘટના કેદ થઈ ગઈ હતી, જેનો વીડિયો સોશિયલ મીડિયા પર વાયરલ થતાં સમગ્ર વિસ્તારમાં ભારે આક્રોશ અને ચર્ચા જાગી છે. સ્થાનિક રાજકીય નેતાઓ અને ધાર્મિક સંગઠનોએ આ ઘટનાની કડક શબ્દોમાં નિંદા કરી છે અને પૂજનીય સ્થળની સુરક્ષા સુનિશ્ચિત કરવા તેમજ જવાબદાર સામે સખતમાં સખત પગલાં ભરવાની માંગ કરી છે. સ્થિતિને ધ્યાનમાં રાખીને પોલીસે વિસ્તારમાં શાંતિ જાળવી રાખવા અને કોઈ પણ પ્રકારની અફવાઓ પર ધ્યાન ન આપવા નાગરિકોને અપીલ કરી છે.