અંતાલ્યા :  વિકાસશીલ અને ઉભરતા અર્થતંત્રો ધરાવતા દેશોમાં આગામી ૧૫ વર્ષ દરમિયાન રોજગારી ક્ષેત્રે અંદાજે ૮૦૦ મિલિયન (૮૦ કરોડ) નોકરીઓનો મોટો તફાવત સર્જાવાની ભયાનક શક્યતા વિશ્વ બેંક જૂથ દ્વારા વ્યક્ત કરવામાં આવી છે. તુર્કીના અંતાલ્યા શહેરમાં આયોજિત COP31 ક્લાઇમેટ ફાઇનાન્સ સમિટ દરમિયાન વિશ્વ બેંકના પ્રમુખ અજય બંગાએ આંકડાકીય વિગતો આપતા જણાવ્યું હતું કે આ સમયગાળા દરમિયાન ઉભરતા દેશોમાં આશરે ૧.૨ અબજ યુવાનો ૧૮ વર્ષની વય વટાવીને કામકાજની ઉંમરે પહોંચશે, પરંતુ તેની સામે દેશો પાસે ઉપલબ્ધ મર્યાદિત સંસાધનોને કારણે માત્ર ૪૦૦ મિલિયન નવી નોકરીઓનું જ સર્જન થઈ શકશે.
અજય બંગાએ ભારપૂર્વક જણાવ્યું હતું કે રોજગારીમાં સર્જાનારો આ જંગી તફાવત વિશ્વભરમાં ગરીબી, સ્થળાંતર અને સામાજિક સ્થિરતા સામે ગંભીર પરિણામો લાવશે. હાલમાં ક્ષેત્રીય સંઘર્ષો, વધતું જતું દેવું, કુદરતી આફતો અને માળખાકીય સુવિધાઓની મર્યાદાઓને કારણે વિકાસશીલ રાષ્ટ્રો પાસે પોતાની વિકાસલક્ષી મહત્વાકાંક્ષાઓ પૂર્ણ કરવા માટેના નાણાકીય સંસાધનો અત્યંત સીમિત થઈ રહ્યા છે. ૩૦ જૂન સુધીના વર્ષમાં વિશ્વ બેંકે વિકાસશીલ દેશો માટે કુલ ૨૩૦ બિલિયન ડોલરનું ભંડોળ એકત્ર કર્યું હતું, જેમાં ૧૧૨ બિલિયન ડોલરની ખાનગી મૂડીનો સમાવેશ થાય છે.
જોકે, મધ્યમ આવક ધરાવતા દેશોની સરખામણીમાં સૌથી ઓછી આવક ધરાવતા ગરીબ દેશોમાં મૂડીનો પ્રવાહ સાવ સપાટ રહ્યો હોવા અંગે બંગાએ ચિંતા વ્યક્ત કરી હતી. તેમણે ઉમેર્યું કે ગરીબ બજારો સુધી જાહેર સંસાધનો પહોંચાડવા અત્યંત જરૂરી છે. આ ઉપરાંત આબોહવા પરિવર્તનના ખતરા સામે ટકી રહેવા ઉભરતા અર્થતંત્રોને વધુ સક્ષમ 'સ્માર્ટ વિકાસ' મોડેલની જરૂર છે, જેમાં પૂર પ્રતિરોધક રસ્તાઓ અને અતિશય ગરમીમાં પણ બાળકો ભણી શકે તેવી ઇન્સ્યુલેટેડ શાળાઓ જેવી ભૌતિક સ્થિતિસ્થાપકતા શરૂઆતથી જ નિર્માણ પામે.
આગામી સમયમાં વૈશ્વિક સ્તરે ઉદ્ભવનારી આ બેરોજગારીની કટોકટી અને આબોહવા પરિવર્તનના દબાણને પહોંચી વળવા આંતરરાષ્ટ્રીય નાણાકીય સંસ્થાઓ તેમજ શ્રીમંત રાષ્ટ્રો દ્વારા ગરીબ દેશો માટે મૂડી રોકાણના નવા માર્ગો તૈયાર કરવામાં આવે તે સમયની માંગ છે. વિશ્વ બેંક દ્વારા રજૂ કરાયેલા આ આંકડાઓ સામે આવ્યા બાદ હવે વિવિધ દેશોની સરકારો પોતાની આર્થિક નીતિઓ અને રોજગાર સર્જનના માળખામાં કેવા ક્રાંતિકારી ફેરફારો કરે છે તેના પર સૌની નજર રહેશે.