નવી દિલ્હી : કલ્પના કરો કે તમે રોજ કોઈ નોકરી માટે અરજી કરી રહ્યા છો, પરંતુ સામેથી કોઈ સકારાત્મક જવાબ કે ફોન કોલ પણ નથી આવતો. આવું એક કે બે વાર નહીં, પરંતુ સતત ૪૨૦ વખત થાય તો કોઈ પણ સામાન્ય માણસ હિંમત હારી જાય અથવા ડિપ્રેશનમાં સરી પડે. જોકે, ભારતીય મૂળની દીકરી દિવ્યા બંસલે આટલી મોટી સંખ્યામાં અસ્વીકાર (Rejections) નો સામનો કર્યા પછી પણ હાર ન માની અને અંતે અમેરિકાના ન્યૂયોર્ક જેવા સપનાના શહેરમાં શાનદાર નોકરી મેળવીને બતાવ્યું. પરંતુ, આ અસાધારણ સફળતા બાદ તેણે જે નિવેદન આપ્યું છે, તેનાથી તે રાતોરાત સોશિયલ મીડિયા પર વાયરલ થઈ ગઈ છે.
૪૨૦ રિજેક્શન બાદ બદલાયો જિંદગીને જોવાનો નજરીયો
આજકાલના યુવાનો જ્યારે કોઈ મોટી કંપનીમાં નોકરી મેળવે છે, ત્યારે તેઓ રાત-દિવસ તેમાં જ અટવાઈ જાય છે અને પોતાના અંગત જીવન તેમજ પરિવારને ભૂલી જતા હોય છે. પરંતુ દિવ્યા બંસલે નોકરી મેળવ્યા બાદ સોશિયલ મીડિયા પર અત્યંત વાસ્તવિક અને બિંદાસ વાત કહી છે. દિવ્યાએ સ્પષ્ટ કર્યું છે કે, તે પોતાની નવી જોબને ક્યારેય પોતાની આખી જિંદગી બનવા નહીં દે. તેના મતે, નોકરી એ જીવન ચલાવવાનો માત્ર એક ભાગ છે, આખી જિંદગી નથી. તે પોતાની લાઈફમાં દરેક જરૂરી વસ્તુ અને સંબંધોને સમાન સમય આપવા માંગે છે અને પોતાના સિદ્ધાંતો સાથે કોઈ સમજૂતી કરવા નથી માંગતી.
યુવાનો માટે પ્રેરણા સ્ત્રોત બની દિવ્યા
સોશિયલ મીડિયા પર દિવ્યાની આ વ્યવહારુ અને સ્પષ્ટવક્તા વિચારધારાની જોરદાર પ્રશંસા થઈ રહી છે. જે કોર્પોરેટ વર્લ્ડમાં લોકો 'વર્ક લાઈફ બેલેન્સ' માટે ઝઝૂમી રહ્યા છે, ત્યાં દિવ્યાનો આ કૂલ અંદાજ લોકોને ખૂબ જ પસંદ આવી રહ્યો છે. ઈન્ટરનેટ યુઝર્સ કહી રહ્યા છે કે, મુશ્કેલ સમયમાં હિંમત કેવી રીતે રાખવી અને સફળતા મળ્યા બાદ પણ પગ જમીન પર કેવી રીતે રાખવા, તે દિવ્યા પાસેથી શીખવા જેવું છે. આ સમાચાર આજે દેશના લાખો બેરોજગાર અને સંઘર્ષ કરી રહેલા યુવાનો માટે એક નવી આશાનું કિરણ લઈને આવ્યા છે.