<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Thursday, 19th November 2026

દિલ્હી–મુંબઈ એક્સપ્રેસવેને કારણે રાજસ્થાનમાં ઔદ્યોગિક વિકાસને વેગ : નવ નવા ઔદ્યોગિક વિસ્તારો વિકસાવાશે

કોટામાં છ અને બુંદીમાં ત્રણ ઔદ્યોગિક ક્ષેત્ર : રૂ. ૧૦ હજાર કરોડથી વધુ રોકાણ આવવાની સરકારને આશા

જયપુર: રાજસ્થાન સરકારે દિલ્હી–મુંબઈ એક્સપ્રેસવે અને ભારતમાલા પ્રોજેક્ટથી મળતી પરિવહન સુવિધાનો લાભ ઉઠાવવા કોટા અને બુંદી જિલ્લામાં નવ નવા ઔદ્યોગિક વિસ્તારો વિકસાવવાની મંજૂરી આપી છે. આ યોજનાથી રૂ. ૧૦ હજાર કરોડથી વધુનું ખાનગી રોકાણ આકર્ષવાની અને મોટા પ્રમાણમાં રોજગારી ઊભી કરવાની અપેક્ષા છે.

રાજસ્થાન સ્ટેટ ઇન્ડસ્ટ્રિયલ ડેવલપમેન્ટ એન્ડ ઇન્વેસ્ટમેન્ટ કોર્પોરેશન એટલે કે રિકો દ્વારા રાજ્યના ઉદ્યોગ વિભાગના સહયોગથી આ વિસ્તારો વિકસાવાશે. કોટા જિલ્લામાં છ અને બુંદી જિલ્લામાં ત્રણ ઔદ્યોગિક ઝોન બનાવવામાં આવશે. જરૂરી જમીન ઉપલબ્ધ કરાવી દેવામાં આવી છે અને પ્રાથમિક સુવિધાઓ માટે નાણાકીય મંજૂરી પણ આપવામાં આવી છે.

કોટાના રામગંજમંડી વિસ્તારનાં રાજુખેડા, બુઢખાન અને છત્રપુરા ગામની નજીક મોટો સંકલિત ઔદ્યોગિક વિસ્તાર વિકસાવાશે. તેના રસ્તા, વીજળી, પાણી, જમીન સમતલીકરણ અને ગટર જેવી સુવિધાઓ માટે રૂ. ૧૭૦.૮૬ કરોડ મંજૂર થયા છે. માત્ર આ એક ઔદ્યોગિક ક્ષેત્રમાં રૂ. ૮૦૦થી ૧,૦૦૦ કરોડનું રોકાણ આવવાનો અંદાજ છે.

કનવાસ વિસ્તારમાં ધોતી ગામ પાસે ૨૨.૭૮ હેક્ટર જમીનમાં વધુ એક ઔદ્યોગિક પાર્ક માટે રૂ. ૨૯.૯૮ કરોડની જોગવાઈ કરવામાં આવી છે.

એક્સપ્રેસવેને કારણે દિલ્હી, મુંબઈ અને ગુજરાતનાં ઔદ્યોગિક તથા વેપારી કેન્દ્રો સુધી માલસામાન પહોંચાડવાનું વધુ સુગમ બનશે. જોકે રૂ. ૧૦ હજાર કરોડનો આંકડો હાલ અપેક્ષિત રોકાણનો છે, વાસ્તવમાં થઈ ચૂકેલા રોકાણનો નહીં

(11:44 PM IST)