નવી દિલ્હી, તા.૦૫: કેન્દ્ર સરકારના લાખો કર્મચારીઓ અને પેન્શનરો માટે એક ચિંતાજનક અહેવાલ સામે આવ્યો છે, જેમાં ૮મા પગાર પંચના અહેવાલ રજૂ કરવામાં જો વિલંબ થાય તો કર્મચારીઓને ભારે આર્થિક ફટકો પડી શકે છે. નવેમ્બર ૨૦૨૫માં સરકાર દ્વારા ગઠિત કરવામાં આવેલા ૮મા પગાર પંચની ૧૮ મહિનાની નિર્ધારિત સમયમર્યાદામાંથી ૧૦ મહિનાનો સમય વીતી ચૂક્યો છે અને હવે ભલામણો સોંપવા માટે ખૂબ જ ઓછો સમય બાકી છે. જો સમયસર અહેવાલ રજૂ કરીને તેનો અમલ કરવામાં નહીં આવે, તો ચોક્કસ પગાર સ્તરના કર્મચારીઓને રૂ. ૩.૩૨ લાખ સુધીનું આર્થિક નુકસાન સહન કરવું પડી શકે છે.

અહેવાલમાં વિલંબ થવાથી કર્મચારીઓને થનારા નુકસાનનું મુખ્ય કારણ પગાર સુધારણા સાથે જોડાયેલા એરિયર્સ (બાકી નીકળતી રકમ) ની ગણતરી છે. સામાન્ય રીતે સરકાર અમલીકરણની ચોક્કસ તારીખથી સુધારેલા મૂળભૂત પગાર (બેઝિક પે) ના આધારે એરિયર્સ ચૂકવતી હોય છે. પરંતુ જો કમિશનની ભલામણો મોડી આવે અથવા તેના અમલમાં વિલંબ થાય, તો કર્મચારીઓને મળવાપાત્ર એરિયર્સની અંતિમ રકમ પર તેની વિપરીત અસર પડે છે, જેનાથી કર્મચારીઓમાં ભારે અસંતોષ જોવા મળી રહ્યો છે.

મૂળભૂત પગાર ઉપરાંત મોંઘવારી ભથ્થું (DA) પણ કર્મચારીઓના કુલ પગારનો એક મોટો અને મહત્વપૂર્ણ હિસ્સો છે. નવા પગાર માળખાના અમલ પહેલા અને પછી સરકાર દ્વારા DA ની ગણતરી કરવાના નિયમો બદલાતા હોય છે. અહેવાલમાં વિલંબ થવાને કારણે DA ના બાકી લેણાંની ચૂકવણી અંગે પણ મોટી અનિશ્ચિતતા ઊભી થઈ છે, જે કર્મચારીઓના માસિક બજેટ અને નાણાકીય આયોજનને સીધી રીતે અસર કરી રહી છે.

આ ઉપરાંત કર્મચારીઓને મળતા અન્ય બે મુખ્ય નાણાકીય લાભો - હાઉસ રેન્ટ એલાઉન્સ (HRA) અને ટ્રાન્સપોર્ટ એલાઉન્સ (TPTA) ની ગણતરી પર પણ આ વિલંબની કાળી છાયા મંડાઈ રહી છે. પંચનો અંતિમ અહેવાલ અને સરકારનો નિર્ણય જ નક્કી કરશે કે આ ભથ્થાઓની આકારણી કઈ રીતે થશે. જો વિલંબના કારણે આ ભથ્થાઓનું સંપૂર્ણ એરિયર્સ ન મળે, તો કર્મચારીઓનો નાણાકીય હક છીનવાઈ જવાની ભીતિ સેવાઈ રહી છે.

નાણાકીય નિષ્ણાતોના અંદાજ મુજબ, મૂળભૂત પગારમાં સુધારો, DA નો તફાવત, HRA અને TPTA જેવા તમામ ભથ્થાઓના બાકી લેણાં ન મળવાની સ્થિતિમાં અલગ-અલગ પે-સ્કેલ ધરાવતા કર્મચારીઓને કુલ મળીને રૂ. ૩.૩૨ લાખ સુધીનું સીધું નુકસાન થઈ શકે છે. જોકે, વાસ્તવિક આંકડા અને નુકસાનનું સાચું આંકલન ત્યારે જ સ્પષ્ટ થશે જ્યારે પેનલ તેની અંતિમ ભલામણો સરકારને સોંપશે અને કેન્દ્ર સરકાર તેના પર આખરી મંજૂરીની મહોર મારશે.

ઉલ્લેખનીય છે કે, કેન્દ્ર સરકારે કર્મચારીઓના પગાર અને ભથ્થાંમાં સુધારા માટે નવેમ્બર ૨૦૨૫માં ૮મા પગાર પંચની રચના કરી હતી. નિયમ મુજબ પંચે ૧૮ મહિનાની અંદર પોતાનો અહેવાલ સુપ્રત કરવાનો હોય છે. હવે સમયમર્યાદાના ગણતરીના મહિના બાકી રહ્યા હોવાથી તમામ કર્મચારીઓની નજર સરકાર અને પગાર પંચની કામગીરી પર ટકેલી છે, જેથી સમયસર ભલામણો લાગુ થાય અને આર્થિક નુકસાનમાંથી બચી શકાય.