ચેન્નઈ, તા.૦૯: તમિલનાડુના સિરકાઝીમાં આરાસુર નજીકથી એક કાળજું કંપાવી દેનારી પરંતુ ગેટકીપરની બહાદુરીને સલામ કરવા મજબૂર કરતી ઘટના સામે આવી છે. સોમવારે સાંજે એક લેવલ ક્રોસિંગ પર જો ગેટકીપરે સેકન્ડના હજારમાં ભાગમાં નિર્ણય ન લીધો હોત, તો એક વ્યક્તિના શરીરના ચિથરેચિથરા ઉડી ગયા હોત. આ સમગ્ર ઘટનાના સીસીટીવી (CCTV) ફૂટેજ સોશિયલ મીડિયા પર વાયરલ થતાં જ લોકોના શ્વાસ અધ્ધર થઈ ગયા છે અને દરેક વ્યક્તિ આ જાંબાઝ રેલ્વે કર્મચારીની પ્રશંસા કરી રહી છે.
ઘટના સોમવારે સાંજે લગભગ ૪.૩૦ વાગ્યે લેવલ ક્રોસિંગ ગેટ નંબર ૨૧૪ પર બની હતી. અહીં મૂળ જયપુરના ૩૦ વર્ષીય બહાદુર યુવાન સંદીપ ચહર ગેટકીપર તરીકે ફરજ પર તૈનાત હતા. સંદીપ છેલ્લા સાત વર્ષથી મયિલાદુથુરાઈ જિલ્લામાં પોતાની સેવા આપી રહ્યા છે. સાંજના સમયે ટ્રેન આવવાની હોવાથી ક્રોસિંગ ગેટ સંપૂર્ણપણે બંધ કરી દેવામાં આવ્યો હતો. આ દરમિયાન સંદીપે જોયું કે એક આધેડ વયનો માણસ કાયદાનું ઉલ્લંઘન કરીને બંધ ફાટકની નીચેથી રેલ્વે ટ્રેક પાર કરવાનો જીવલેણ પ્રયાસ કરી રહ્યો છે.
મોતના મુખમાંથી ખેંચી લાવ્યો:
મયિલાદુથુરાઈથી વિલ્લુપુરમ જતી પેસેન્જર ટ્રેન પૂરપાટ ઝડપે નજીક આવી રહી હતી અને ટ્રેને હોર્ન મારવાનું શરૂ કરી દીધું હતું. દારૂના નશામાં ધૂત તે વ્યક્તિ ટ્રેક પર જ લથડાયો અને પાટા પર ફસાઈ ગયો. મોતને બિલકુલ સામે જોઈને સંદીપ ચહરે પોતાની જિંદગીની પરવા કર્યા વિના ટ્રેક તરફ દોટ મૂકી અને ટ્રેન એ શખ્સને કચડી નાખે તેની બિલકુલ થોડી ક્ષણો પહેલા જ તેને જોરદાર ઝાટકા સાથે પાટા પરથી દૂર ફેંકી દીધો.
આ નાટકીય અને હૃદયના ધબકારા વધારી દેનારા બચાવ કાર્યને યાદ કરતાં સંદીપ ચહરે જણાવ્યું કે, "તે સમયે હું પોતે ખૂબ ડરી ગયો હતો, પરંતુ લોકોની અને રેલ્વેની સલામતી સુનિશ્ચિત કરવી એ મારી પરમ ફરજ હતી. તે વ્યક્તિને પાટા પરથી હટાવ્યા પછી પણ મારા હાથ-પગ ધ્રૂજી રહ્યા હતા અને મને કંઈ સમજાયું નહીં કે હું શું પ્રતિક્રિયા આપું." પરિણીત સંદીપે ઉમેર્યું કે તેના સાત વર્ષના કાર્યકાળમાં આવી ભયાનક સ્થિતિનો સામનો તેણે પહેલીવાર કર્યો હતો.
આ વીડિયો વાયરલ થયા બાદ રેલ્વે પ્રશાસન પણ એક્શનમાં આવ્યું છે. દક્ષિણ રેલ્વેના તિરુચી ડિવિઝનના ઉચ્ચ અધિકારીઓએ સંદીપ ચહરની આ અજોડ બહાદુરીની નોંધ લીધી છે અને જાહેરાત કરી છે કે તેને આ હિંમતભર્યા કાર્ય માટે ટૂંક સમયમાં જ ભવ્ય રીતે સન્માનિત કરવામાં આવશે. બીજી તરફ, રેલ્વે પ્રોટેક્શન ફોર્સ (RPF) એ જણાવ્યું છે કે નશામાં ધૂત બચેલા વ્યક્તિની ઓળખ હજુ સુધી થઈ શકી નથી અને તેની સામે રેલ્વેના નિયમોના ઉલ્લંઘન બદલ કાયદેસરની કાર્યવાહી થઈ શકે છે.