​ઢાકા:બાંગ્લાદેશના પૂર્વ વડાપ્રધાન અને અવામી લીગના વડા શેખ હસીનાએ આગામી ડિસેમ્બર મહિનામાં સ્વેચ્છાએ સ્વદેશ પરત ફરવાની જાહેરાત કરતાં જ બાંગ્લાદેશના રાજકીય માહોલમાં ભારે ઉથલપાથલ મચી ગઈ છે. આ જાહેરાત બાદ બાંગ્લાદેશના રાજકીય વર્તુળોમાં આકરા પ્રત્યાઘાત જોવા મળી રહ્યા છે. નેશનલ સિટીઝન પાર્ટી (NCP) એ આ મુદ્દે સ્પષ્ટ શબ્દોમાં ચેતવણી આપતા જણાવ્યું છે કે, જો શેખ હસીના બાંગ્લાદેશની ધરતી પર પગ મૂકશે, તો તેમને કાયદાકીય પ્રક્રિયા હેઠળ ફાંસીના માંચડે ચડાવવામાં આવશે.

​શેખ હસીના, જેઓ વર્ષ 2024માં દેશમાં ફાટી નીકળેલા હિંસક વિરોધ પ્રદર્શનો બાદ સત્તા પરથી હટીને ભારતમાં નિર્વાસિત જીવન વિતાવી રહ્યા છે, તેમણે તાજેતરમાં એક નિવેદનમાં જણાવ્યું હતું કે, તેઓ તેમના પક્ષના વરિષ્ઠ નેતાઓ સાથે ડિસેમ્બરની આસપાસ બાંગ્લાદેશ પરત ફરશે અને અદાલત સમક્ષ આત્મસમર્પણ કરશે. તેમણે કહ્યું હતું કે, "તેઓ મને પકડી શકે છે, તેઓ મને મારી પણ શકે છે, તેમ છતાં મારે પરત જવું જ પડશે. જો મારો અંત લખેલો હોય, તો હું ઈચ્છું છું કે તે મારી પોતાની માતૃભૂમિ પર જ આવે."

​આ નિવેદન બાદ નેશનલ સિટીઝન પાર્ટીના કન્વીનર અને સંસદમાં વિરોધ પક્ષના ચીફ વ્હિપ નહિદ ઇસ્લામે કડક વલણ અપનાવ્યું છે. એક કાર્યક્રમ દરમિયાન બોલતા તેમણે કહ્યું કે, "અમે ઇન્ટરવ્યુમાં સાંભળ્યું છે કે તેઓ ડિસેમ્બરમાં પાછા આવવાનું આયોજન કરી રહ્યા છે. હવે અમારી માંગ છે કે તેઓ પાછા ફરે, જેથી તેમને અગાઉ ફટકારવામાં આવેલી ફાંસીની સજાનો અમલ કરી શકાય."

​ઉલ્લેખનીય છે કે, બાંગ્લાદેશની ઇન્ટરનેશનલ ક્રાઇમ્સ ટ્રિબ્યુનલે અગાઉ શેખ હસીનાને 'માનવતા વિરુદ્ધના ગુનાઓ' માટે ગેરહાજરીમાં ફાંસીની સજા સંભળાવેલી છે. આ સજા 2024ના વિદ્યાર્થી આંદોલન દરમિયાન કરવામાં આવેલી કથિત હિંસક કાર્યવાહીના સંદર્ભમાં આપવામાં આવી હતી. નહિદ ઇસ્લામે વધુમાં આક્ષેપ કર્યો હતો કે, શેખ હસીનાએ પોતાના પક્ષના કાર્યકરો અને નેતાઓને અધવચ્ચે છોડીને ભારત પલાયન કર્યું હતું. તેમણે અવામી લીગને એક રાજકીય પક્ષને બદલે 'નવી દિલ્હી દ્વારા નિયંત્રિત સંગઠન' ગણાવ્યું હતું.

​બાંગ્લાદેશના વર્તમાન વહીવટીતંત્રે હજુ સુધી આ અંગે સત્તાવાર રીતે બહુ ઓછી ટિપ્પણી કરી છે, પરંતુ નિષ્ણાતોનું માનવું છે કે શેખ હસીનાની વાપસી બાંગ્લાદેશની પહેલેથી જ નાજુક સ્થિતિને વધુ અસ્થિર બનાવી શકે છે. ખાસ કરીને ભારત અને બાંગ્લાદેશ વચ્ચેના રાજદ્વારી સંબંધો પર પણ તેની મોટી અસર પડવાની શક્યતા છે. શેખ હસીનાએ પોતે સ્પષ્ટ કર્યું છે કે તેમની આ પરત ફરવાની યોજના કોઈ વિદેશી સરકાર સાથે ચર્ચાયેલી નથી, પરંતુ તે તેમનો વ્યક્તિગત નિર્ણય છે. હવે જોવાનું એ રહેશે કે ડિસેમ્બર સુધીમાં આ રાજકીય સમીકરણો કેવો વળાંક લે છે.