કાઠમંડુ : નેપાળમાં આવેલા ભયાનક પૂર અને ભૂસ્ખલનના નવ દિવસ પછી ત્રિશૂળ-3એ જળવિદ્યુત પ્રોજેક્ટની એક અંધારી સુરંગમાંથી બે શ્રમિકોને હેમખેમ બહાર કાઢવામાં આવ્યા છે. આ ચમત્કારિક બચાવ અભિયાન શુક્રવારે નેપાળી સેનાના નેતૃત્વમાં હાથ ધરવામાં આવ્યું હતું જેમાં સુરક્ષા દળો અને નિષ્ણાતોએ ઉત્કૃષ્ટ સાહસ દાખવ્યું હતું. જમીનની અંદર ફસાયેલા આ શ્રમિકોમાં મેકેનિકલ ફોરમેન સંજય સાહ અને મેકેનિકલ સુપરવાઈઝર કબીર મર્હન સામેલ છે. આ ભયાનક આપત્તિએ સમગ્ર વિસ્તારને બાનમાં લીધો હતો અને શ્રમિકોના જીવન પર સતત જોખમ તોળાઈ રહ્યું હતું.

ઘટનાની વિગતો અનુસાર 26 ઓગસ્ટે ભોટેકોશી નદીમાં અચાનક વિકરાળ પૂર આવ્યું અને ભારે ભૂસ્ખલન થયું. સપ્તરી જિલ્લાના વતની અને નેપાળ વીજળી ઓથોરિટીના કર્મચારી સંજય સાહ જ્યારે આપત્તિ આવી ત્યારે પ્રોજેક્ટના કંટ્રોલ રૂમમાં પોતાની ડ્યુટી બજાવી રહ્યા હતા. અચાનક પાણી અને કાટમાળ ઘૂસી જવાથી ત્યાં દોડધામ મચી ગઈ હતી. સંજય સાહે પોતાના જીવની પરવા કર્યા વગર પહેલા પોતાના સાથીઓની સુરક્ષાને પ્રાથમિકતા આપી હતી. સામાન્ય રીતે ત્યાં પાંચ-છ સાત લોકો રહેતા હોય છે પરંતુ તે સમયે લગભગ 40-45 લોકો હાજર હતા. પોતાના સાથીઓને બહાર કાઢવામાં મદદ કરવાને કારણે સંજય સાહ પોતે બહાર નીકળવાની તક મેળવી શક્યા નહીં અને સુરંગમાં જ ફસાઈ ગયા.

જમીનની નીચે અંધારી સુરંગમાં વિતાવેલા નવ દિવસ સંજય સાહ અને કબીર મર્હન માટે અત્યંત ભયાનક હતા. સંજય સાહે સેનાની મેડિકલ ટીમને જણાવ્યું કે સુરંગમાં ફસાયેલા રહેવા દરમિયાન તેમણે નવ દિવસ સુધી સતત માત્ર ઈશ્વરને યાદ કર્યા અને પ્રાર્થના કરી. પૂર આવતાની થોડી ક્ષણો પહેલા 26 ઓગસ્ટે સવારે સાત વાગ્યે તેમણે પોતાની બહેન સુધા સાથે છેલ્લી વાત કરી હતી. ત્રણ મિનિટની તે વાતચીત દરમિયાન તેમણે પ્રોજેક્ટની મશીનરી બતાવી હતી અને કામ ચાલુ રાખવાની વાત કરી હતી જે પછી તેમનો ફોન બંધ થઈ ગયો હતો. તેમના જીવિત હોવાના સમાચાર મળતા જ તેમનો પરિવાર તુરંત કાઠમંડુ જવા રવાના થયો હતો.

બીજી બાજુ આ આપત્તિમાં ફસાયેલા બીજા શ્રમિક કબીર મર્હન કાઠમંડુના કીર્તિપુરના વતની છે અને તેઓ કુલેખાની જળવિદ્યુત પ્રોજેક્ટમાંથી મરામત કામ માટે ત્રિશૂળ-3એ આવ્યા હતા. તેઓ છેલ્લા 15 વર્ષથી વધુ સમયથી નેપાળ વીજળી ઓથોરિટી સાથે કામ કરી રહ્યા હતા. આપત્તિના એક દિવસ પહેલા 25 ઓગસ્ટે તેઓ ઘરેથી નીકળ્યા હતા અને તેમની પત્ની હીરા શોભા સાથે 26 ઓગસ્ટે સવારે વાત થઈ હતી. ભોટેકોશી નદીનું પાણી અને કાદવ જ્યારે પ્રોજેક્ટ પરિસરમાં ઘૂસ્યા ત્યારે સુરંગ અને જમીનની અંદરના ભાગો સુધી પહોંચવાનો રસ્તો સંપૂર્ણપણે બંધ થઈ ગયો હતો.

સફળતાપૂર્વક પાર પાડવામાં આવેલા આ બચાવ અભિયાનનું નેતૃત્વ નેપાળી સેનાએ કર્યું હતું જેમાં નેપાળ પોલીસ, સશસ્ત્ર પોલીસ બળના જવાનો તેમજ વિદેશી બચાવ નિષ્ણાતોએ પણ મહત્વપૂર્ણ ભૂમિકા ભજવી હતી. સુરંગમાંથી બહાર કાઢ્યા બાદ બંને શ્રમિકોને ઘટનાસ્થળે જ પ્રાથમિક સારવાર આપવામાં આવી હતી. કબીર મર્હનની તબિયત વધુ ગંભીર હોવાથી તેમને વહેલી તકે વીરેન્દ્ર સૈનિક હોસ્પિટલમાં દાખલ કરવામાં આવ્યા જ્યારે સંજય સાહની સ્થિતિ સ્થિર જણાવાઈ અને તેમને પણ આગળની તપાસ માટે હોસ્પિટલ લઈ જવામાં આવ્યા. આ સફળ રેસ્ક્યુ ઓપરેશન બાદ શ્રમિકોના પરિવારોએ રાહતનો શ્વાસ લીધો છે.