લંડન : યુરોપ ખંડમાં આ વર્ષે ઉનાળાની સિઝન અત્યંત ઘાતક અને વિનાશકારી સાબિત થઈ છે. પ્રાપ્ત વિગતો અનુસાર, જૂનથી ઓગસ્ટ દરમિયાન પડેલી પ્રચંડ ગરમી અને હીટવેવના કારણે આશરે ૫૦,૩૯૧ લોકોના મોતના ચોંકાવનારા આંકડા સામે આવ્યા છે. વૈજ્ઞાનિકોના તાજેતરના અભ્યાસમાં ખુલાસો થયો છે કે આમાંથી અંદાજે ૩૨,૬૧૯ લોકોના મોત સીધી રીતે જળવાયુ પરિવર્તન અને ગ્લોબલ વોર્મિંગને આ1 આ વર્ષે તાપમાન વધવાના કારણે થયા છે, જે અગાઉના વર્ષોની સરખામણીમાં રેકોર્ડબ્રેક વધારો દર્શાવે છે.

ઘટનાની વિગતવાર માહિતી આપતા રિપોર્ટમાં જણાવવામાં આવ્યું છે કે ઇમ્પિરિયલ કોલેજ લંડનના સંશોધનકર્તાઓએ યુરોપના ૮૫૪ જેટલા પ્રમુખ શહેરોમાં તાપમાનની વધઘટ અને વિવિધ વય જૂથના લોકોના મોતના દરનું વ્યાપક વિશ્લેષણ કર્યા પછી આ અહેવાલ જાહેર કર્યો છે. આ શહેરો યુરોપની કુલ વસ્તીના આશરે ૪૦ ટકા હિસ્સો આવરી લે છે. ગરમીની આ ભીષણ અસર વિશેષરૂપે ઇટાલી, ફ્રાન્સ, સ્પેન અને જર્મની જેવા દેશોમાં સૌથી વધુ વિનાશક રહી છે, જ્યાં સામાન્ય જનજીવન સંપૂર્ણપણે અસ્તવ્યસ્ત થઈ ગયું હતું.

અભ્યાસના ચોંકાવનારા નિષ્કર્ષ મુજબ, અગાઉના વર્ષોમાં હીટવેવને કારણે મોટે ભાગે વડીલો કે વૃદ્ધો જ શિકાર બનતા હતા, પરંતુ આ વખતે આ ભયાનક ગરમીએ યુવાનોને પણ પોતાની ઝપેટમાં લીધા છે. ૨૦ થી ૪૪ વર્ષની વય જૂથના ૮૦૦ કરતાં વધુ યુવાનોએ પણ આ પ્રચંડ લૂના કારણે પોતાના પ્રાણ ગુમાવ્યા છે. ખાસ કરીને ૧૭ જૂનથી ૧ જુલાઈ દરમિયાનના માત્ર બે સપ્તાહના સમયગાળામાં જ કુલ મૃત્યુના ત્રીજા ભાગના લોકોએ દમ તોડી દીધો હતો, જ્યારે આ સમયગાળા દરમિયાન તાપમાન સામાન્ય કરતાં ૫.૩ ડિગ્રી સેલ્સિયસ જેટલું ઉપર નોંધાયું હતું.

વૈજ્ઞાનિકોએ ગંભીર ચેતવણી આપતા જણાવ્યું છે કે યુરોપની વર્તમાન ઇમારતો અને શહેરી માળખાકીય સુવિધાઓ આટલી બધી ભીષણ ગરમીનો સામનો કરવા માટે બિલકુલ સક્ષમ નથી. વાસ્તવિક મૃત્યુઆંક આના કરતા પણ ઘણો વધારે હોઈ શકે છે, કારણ કે આ અભ્યાસમાં મે મહિનાના ગરમીના આંકડાઓને સામેલ કરવામાં આવ્યા નથી. અશ્મિભૂત ઇંધણ (કોલસા, ઓઇલ અને ગેસ) ના સતત વપરાશ અને પ્રદૂષણને કારણે પૃથ્વીનું તાપમાન સતત વધી રહ્યું છે.

સંયુક્ત રાષ્ટ્ર પર્યાવરણ કાર્યક્રમના તાજેતરના ઉત્સર્જન ગેપ રિપોર્ટમાં પણ પૃથ્વીના ભવિષ્ય અંગે અત્યંત ચિંતાજનક ચિત્ર રજૂ કરવામાં આવ્યું છે. રિપોર્ટ અનુસાર, જો વર્તમાન વૈશ્વિક પ્રદૂષણ અને નીતિઓ યથાવત રહેશે તો આગામી ૭૫ વર્ષોમાં પૃથ્વીનું તાપમાન પૂર્વ-ઔદ્યોગિક સ્તરની સરખામણીમાં ૨.૮ ડિગ્રી સેલ્સિયસ સુધી વધી શકે છે, જે માનવજાતિ માટે એક મોટો ખતરો સાબિત થઈ શકે છે.

આ ગંભીર આબોહવાકીય કટોકટી સામે પહોંચી વળવા માટે વૈશ્વિક સ્તરે તાત્કાલિક અને નક્કર પગલાં લેવાની તાતી જરૂરિયાત છે. કાર્બન ઉત્સર્જન ઘટાડવા, ગ્રીન એનર્જીને પ્રોત્સાહન આપવા અને શહેરોમાં હીટ-રેઝિસ્ટન્ટ માળખાકીય સુવિધાઓ વિકસાવવા માટે નિષ્ણાતો દ્વારા ભાર મૂકવામાં આવી રહ્યો છે, જેથી ભવિષ્યમાં આ પ્રકારની કુદરતી હોનારતોથી માનવ જીવનને બચાવી શકાય.