હૈદરાબાદ, તા.૩૦: ઓનલાઇન ડેટિંગ એપ્લિકેશનના માધ્યમથી ઠગાઈના કિસ્સાઓ સતત વધી રહ્યા છે, ત્યારે હૈદરાબાદમાંથી એક સોફ્ટવેર એન્જિનિયર સાથે ડેટિંગ એપ દ્વારા જાળ બીછાવીને હજારો રૂપિયા લૂંટી લેવાનું મોટું કૌભાંડ સામે આવ્યું છે. ૨૭ વર્ષીય આઈટી એન્જિનિયર ચેરૂકુ હેમંતને ડેટિંગ એપ પર એક યુવતી સાથે મુલાકાત કરવી મોંઘી પડી હતી, જ્યાં પબમાં કલાકોની અંદર રૂ. ૨૯,૮૮૪ નું તોતિંગ બિલ પકડાવી દેવાતાં હોબાળો મચી ગયો હતો.

જુબિલી હિલ્સના '36 કેમિસ્ટ્રી પબ'માં રચાયું ષડયંત્ર

પીડિત એન્જિનિયર હેમંતના જણાવ્યા મુજબ, તેની ઓળખ 'Quack Quack' નામની ડેટિંગ એપ પર "દિવ્યા" નામની યુવતી સાથે થઈ હતી. બીજા જ દિવસે યુવતીએ તેને જુબિલી હિલ્સ સ્થિત '36 કેમિસ્ટ્રી પબ'માં મળવા માટે બોલાવ્યો હતો. પબમાં પહોંચ્યા બાદ યુવતીએ એક પછી એક સતત મોંઘી વાનગીઓ અને ડ્રિંક્સના ઓર્ડર આપવાનું શરૂ કરી દીધું હતું. થોડી જ વારમાં પબ મેનેજમેન્ટે રૂ. ૨૯,૮૮૪ નું બિલ ટેબલ પર મૂકી દીધું હતું. હેમંતનો દાવો છે કે તેણે આખી રાઈડ દરમિયાન માત્ર એક જ બીયર પીધી હતી.

નોન-આલ્કોહોલિક ડ્રિંક્સના નામે પ્રીમિયમ દારૂના બિલ બનાવ્યા!

હેમંતે ફરિયાદમાં ગંભીર આક્ષેપ કર્યો છે કે યુવતી જે ડ્રિંક્સ પી રહી હતી તે જોવામાં સાદા કે નોન-આલ્કોહોલિક લાગતા હતા, પરંતુ બિલમાં તેને અત્યંત મોંઘા પ્રીમિયમ આલ્કોહોલિક ડ્રિંક્સ તરીકે દર્શાવવામાં આવ્યા હતા. જ્યારે હેમંતે આટલા મોટા બિલ અંગે સ્પષ્ટતા માગી અને રકમ ચૂકવવાનો ઇનકાર કર્યો, ત્યારે પબના સ્ટાફ અને કદાવર બાઉન્સરોએ તેને ચારેય તરફથી ઘેરી લીધો હતો અને ધમકાવવાનો પ્રયાસ કર્યો હતો.

યુવતી રૂ. ૧૦,૦૦૦ ચૂકવ્યાનો દાવો કરી ફરાર, પોલીસ તપાસ શરૂ

પોતાનો જીવ જોખમમાં જોઈને આઈટી એન્જિનિયરે તાત્કાલિક પોલીસ હેલ્પલાઈન પર કૉલ કર્યો હતો. તે દરમિયાન "દિવ્યા ઉર્ફે કાવ્યા" નામની તે યુવતી પોતે રૂ. ૧૦,૦૦૦ નું યુપીઆઈ પેમેન્ટ કર્યું હોવાનું નાટક કરીને પબમાંથી ચપળતાપૂર્વક ભાગી છૂટી હતી. હેમંતને શંકા છે કે પબના માલિકો અને આ યુવતી મિલીભગત કરીને નિર્દોષ ગ્રાહકોને ફસાવવાનું અને લૂંટવાનું ગેરકાયદેસર નેટવર્ક ચલાવે છે. પોલીસે આ મામલે પબના સીસીટીવી ફૂટેજ, ટ્રાન્ઝેક્શન હિસ્ટ્રી અને બિલિંગ રેકોર્ડ જપ્ત કરીને આગળની કાનૂની કાર્યવાહી હાથ ધરી છે.