બેંગલુરુ, તા.15: ભારતના સૌથી મોટા પરમાણુ પાવર પ્લાન્ટ, કુડનકુલમ ન્યુક્લિયર પાવર પ્રોજેક્ટ (KNPP) સાથે જોડાયેલી અત્યંત સંવેદનશીલ ફાઇલો ડેટા બ્રીચમાં ખુલ્લી પડી ગઈ હોવાના અહેવાલે દેશભરમાં સુરક્ષા ચિંતા જન્માવી છે. સાઈબર સુરક્ષા ક્ષેત્રે આ એક મોટી ગંભીર ઘટના માનવામાં આવી રહી છે, કારણ કે કુડનકુલમ પાવર પ્લાન્ટ ભારતની ઉર્જા સુરક્ષાનો મહત્વનો સ્તંભ છે. આ ડેટા લીક કેવી રીતે થયો અને તેમાં કેટલી સંવેદનશીલ માહિતી છે, તે અંગે તપાસ શરૂ કરવામાં આવી છે.
પ્રારંભિક અહેવાલો મુજબ, આ ડેટા બ્રીચમાં પ્લાન્ટની ટેકનિકલ માહિતી અને મહત્વપૂર્ણ દસ્તાવેજો સામેલ હોવાની આશંકા છે. સાઈબર ગુનેગારોએ જે રીતે આટલા સુરક્ષિત માનવામાં આવતા પ્રોજેક્ટના સર્વર્સમાંથી માહિતી ચોરી છે, તે સરકારી અને ખાનગી સંસ્થાઓની સાઈબર સુરક્ષા વ્યવસ્થા પર પણ સવાલો ઉભા કરે છે. આ પ્રકારની માહિતી લીક થવી એ માત્ર પ્રોજેક્ટની આંતરિક કામગીરી માટે જ નહીં, પરંતુ સમગ્ર દેશની પરમાણુ સુરક્ષા માટે જોખમી સાબિત થઈ શકે છે.
સત્તાવાર સ્તરે આ ઘટના બાદ તમામ સંબંધિત સુરક્ષા એજન્સીઓને એલર્ટ કરી દેવામાં આવી છે. નિષ્ણાતો માને છે કે જો પરમાણુ પ્લાન્ટના મહત્વપૂર્ણ નકશા કે ઓપરેશનલ પ્રોટોકોલ વિદેશી કે અસામાજિક તત્વોના હાથમાં જાય, તો તે દેશ માટે ગંભીર સ્થિતિ પેદા કરી શકે છે. હાલમાં, આઈટી નિષ્ણાતોની ટીમ લીક થયેલા ડેટાની ગંભીરતા તપાસી રહી છે અને ડેટા કયા સ્ત્રોતથી બહાર આવ્યો છે તે જાણવાનો પ્રયાસ કરી રહી છે.
આ ઘટના બાદ હવે પરમાણુ અને વ્યૂહાત્મક મહત્વ ધરાવતા પ્રોજેક્ટ્સની ડિજિટલ સુરક્ષાને વધુ કડક બનાવવા માટે સરકાર દ્વારા કડક સૂચનાઓ જારી કરવામાં આવશે તેવી શક્યતા છે. ડેટા બ્રીચના આ કિસ્સાએ સાબિત કરી દીધું છે કે પરંપરાગત સુરક્ષાની સાથે હવે ડિજિટલ સુરક્ષા પણ એટલી જ મહત્વપૂર્ણ છે. હવે જોવાનું એ રહેશે કે તપાસમાં આ સાઈબર હુમલા પાછળ કોનો હાથ છે અને તે કેવી રીતે અંજામ આપવામાં આવ્યો.