<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 21st November 2026

૪,૦૦૦ અગ્નિવીરોનો ડેટા લીક: ૧૪ વર્ષના કિશોરે AI ટૂલ્સથી વેબસાઇટ હેક કરી ડાર્ક વેબ પર $૫૦૦માં વેચવા મૂકી!

હરિયાણાના બલ્લભગઢથી દિલ્હી પોલીસ સ્પેશિયલ સેલના IFSO યુનિટની મોટી કાર્યવાહી : ભૂતપૂર્વ અગ્નિવીરોના રોજગાર માટેની ટેસ્ટ વેબસાઇટમાં ઘૂસણખોરી બાદ ડિજિટલ સુરક્ષા સામે ગંભીર સવાલો : ગૃહ મંત્રાલય પાસેથી મંગાવાયો સત્તાવાર ડેટાબેઝ

નવી દિલ્હી :  સાયબર સુરક્ષાને હચમચાવી દેનારી એક ચોંકાવનારી ઘટનામાં દિલ્હી પોલીસ સ્પેશિયલ સેલે હરિયાણાના બલ્લભગઢમાંથી માત્ર ૧૪ વર્ષના એક કિશોરને પકડી પાડ્યો છે, જેના પર આશરે ૪,૦૦૦ અગ્નિવીરોનો સંવેદનશીલ ડેટા ચોરીને ડાર્ક વેબ પર માત્ર $૫૦૦માં વેચવાનો પ્રયાસ કરવાનો ગંભીર આરોપ છે. તપાસકર્તાઓના જણાવ્યા અનુસાર, આ કિશોરે ભૂતપૂર્વ અગ્નિવીરોને અન્ય સરકારી વિભાગોમાં રોજગારની તકો શોધવામાં મદદ કરવા માટે તૈયાર કરાયેલી એક ટેસ્ટ વેબસાઇટની અનધિકૃત ઍક્સેસ મેળવી હતી. ચોંકાવનારી વાત એ છે કે તેણે આ ડેટા મેળવવા માટે આર્ટિફિશિયલ ઇન્ટેલિજન્સ (AI) ટૂલ્સનો ઉપયોગ કર્યો હોવાનું પ્રાથમિક તપાસમાં સામે આવ્યું છે અને ત્યારબાદ ડાર્ક વેબ પર જાહેરાત પોસ્ટ કરીને ૪,૦૦૦ અગ્નિવીરોની અંગત વિગતો હોવાનો દાવો કર્યો હતો.

દિલ્હી પોલીસના ઇન્ટેલિજન્સ ફ્યુઝન એન્ડ સ્ટ્રેટેજિક ઓપરેશન્સ (IFSO) યુનિટે કિશોરના ડિજિટલ ઉપકરણો જપ્ત કરીને તેમાંથી શંકાસ્પદ ડેટા રિકવર કર્યો છે અને હવે તેની સત્યતા ચકાસવાની પ્રક્રિયા તેજ કરી છે. જપ્ત કરાયેલી માહિતી અસલી છે કે કેમ અને ડેટા ભંગની હદ કેટલી છે તે નક્કી કરવા માટે પોલીસે કેન્દ્રીય ગૃહ મંત્રાલયને પત્ર લખીને અગ્નિવીરોના સત્તાવાર ડેટાબેઝની વિગતો માંગી છે, જેથી બંને ડેટાને મેચ કરીને ચકાસણી કરી શકાય. હાલ કાયદાકીય પ્રક્રિયા મુજબ પ્રાથમિક પૂછપરછ બાદ કિશોરને તેના પરિવારને સોંપવામાં આવ્યો છે, પરંતુ તેણે વેબસાઇટમાં કઈ રીતે ઘૂસણખોરી કરી તેની ટેકનિકલ તપાસ ઊંડાણપૂર્વક ચાલી રહી છે.

આ સમગ્ર પ્રકરણમાં સૌથી મોટી ચિંતા એ વાતની છે કે શું કોઈ તૃતીય પક્ષે ડાર્ક વેબ પરથી આ ડેટાબેઝ ખરીદ્યો છે કે ઍક્સેસ કર્યો છે, જેની તપાસ સુરક્ષા એજન્સીઓ કરી રહી છે. જૂન ૨૦૨૨માં કેન્દ્ર સરકાર દ્વારા આર્મી, નેવી અને એરફોર્સમાં ચાર વર્ષના કાર્યકાળ માટે શરૂ કરાયેલી અગ્નિપથ યોજના હેઠળના સૈનિકોની માહિતી આ રીતે જોખમમાં મુકાતા સંરક્ષણ સંબંધિત ડિજિટલ પ્લેટફોર્મની સાયબર સુરક્ષા પર મોટા સવાલો ઊભા થયા છે.

(6:13 PM IST)